Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 8

Uukwaniilwa waKalunga oshike?

Uukwaniilwa waKalunga oshike?

1. Egalikano lini lya tseyika nawa kaantu oyendji?

AANTU omamiliyona ogendji oye shi nawa Egalikano lyOmuwa nenge Tate yetu ngu wu li megulu. Jesus okwa li a longitha egalikano ndyoka, opo a longe aalongwa ye nkene ye na okugalikana. Okwa li a galikana kombinga yashike? Omolwashike egalikano ndyoka lya simana kutse?

2. Jesus okwe tu longo tu galikane kombinga yiinima itatu yini ya simana?

2 Jesus okwa ti: “One omu na oku galikana ngeyi: ‘Tate yetu, ngu u li megulu: Edhina lyoye nali yapulwe, oshilongo shoye nashi ye, ehalo lyoye nali gwanithwe kombanda yevi wo ngaashi megulu.’” (Lesha Mateus 6:9-13.) Omolwashike Jesus e tu longo tu galikane kombinga yiinima mbyoka itatu? — Tala eyelitho eti-20.

3. Otatu ki ilonga shike kombinga yUukwaniilwa waKalunga?

3 Otwi ilonga kutya edhina lyaKalunga oJehova. Otwi ilonga wo kutya elalakano lyaKalunga li na sha naantu nosho wo nevi olini. Omolwashike Jesus a galikana ta ti: “Oshilongo shoye nashi ye”? Natu tale kutya Oshilongo nenge Uukwaniilwa waKalunga oshike, notawu ka ninga shike. Otatu ki ilonga wo nkene tawu ka yapulitha edhina lyaKalunga.

UUKWANIILWA WAKALUNGA OSHIKE?

4. Uukwaniilwa waKalunga oshike, nolye Omukwaniilwa gwawo?

4 Jehova okwa dhika po epangelo lye megulu. Ombiimbeli otayi li ithana Uukwaniilwa waKalunga. Okwa  hogolola Jesus a kale Omukwaniilwa gwalyo. Jesus oye “Omuwa gwaawa nOmukwaniilwa gwaakwaniilwa.” (Ehololo 17:14) Oku na oonkondo e vule aapangeli ayehe kombanda yevi. Ota vulu wo okweetela aantu uuwanawa, e vule omupangeli kehe.

5. Epangelo lyaKalunga otali ka pangela okuza peni, notali ka pangela oolye?

5 Konima yomasiku 40, sho Jesus a yumudhwa, okwa shuna megulu. Jehova okwe mu langeke po a ninge Omukwaniilwa gwUukwaniilwa we. (Iilonga 2:33) Epangelo lyaKalunga otali ya li pangele aantu kombanda yevi, okuza megulu. (Ehololo 11:15) Ombiimbeli otayi popi kutya Uukwaniilwa waKalunga ‘owomegulu.’ — 2 Timoteus 4:18.

6, 7. Omolwashike Jesus e vule aapangeli ayehe?

6 Ombiimbeli otayi ti kutya Jesus oku vule aapangeli ayehe, oshoka “ita si we.” (Aaroma 6:9) Ngele tatu mu yelekanitha naapangeli yetu mboka haya si, Jesus kapu na we esiku a ka se. Omauwanawa agehe ngoka te ke tu ningila otaga ka kalelela.

7 Ombiimbeli oya hunganeka kutya Jesus ota ka kala Omukwaniilwa kee na okatongo noku na olukeno. Oya ti: “Ombepo yOmuwa otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila Omuwa — oye nota ka nyanyukilwa etilo okutila Omuwa. Iha pangula pakutala kwomeho, ye iha tokola pakuuva omauvila, ihe ohu uthile oonakuhepa nuuyuuki.” (Jesaja 11:2-4) Mbela ino hala okupangelwa komukwaniilwa a tya ngawo?

8. Otu shi shi ngiini kutya Jesus ita ka pangela oye awike?

8 Kalunga okwa hogolola aantu yamwe ya ka pangele pamwe naJesus megulu. Pashiholelwa, omuyapostoli Paulus okwa li a lombwele Timoteus ta ti: “Ngele tatu tsikileni  okwiidhidhimika, otatu ka pangeleni wo pamwe naye.” (2 Timoteus 2:12) Aantu yangapi taya ka pangela pamwe naJesus?

9. Aantu yangapi taya ka pangela pamwe naJesus, na Jehova okwa tameke oku ya hogolola uunake?

9 Ngaashi twi ilonga mOntopolwa 7, omuyapostoli Johannes okwa li a mono Jesus memoniko, e li Omukwaniilwa megulu pamwe naakwaniilwa yalwe 144 000. Mbela aakwaniilwa mboka oyo oolye? Johannes okwa ti oyo “mboka ya ndhindhilikwa edhina lye [lyaJesus] nolyaHe miipala yawo.” Okwa ti wo kutya “ohaa landula Onzigona [Jesus] shaa mpoka ta yi. Oyo oya kulilwa mo maantu ooyakwawo.” (Lesha Ehololo 14:1, 4.) Aakwaniilwa 144 000 oyo Aakriste aadhiginini mboka Kalunga a hogolola ya ‘ka pangele kombanda yevi,’ okuza megulu pamwe naJesus. Ngele ya si, ohaya yumudhwa ya ka kale nomwenyo megulu. (Ehololo 5:10) Okuza ngaa pethimbo lyaayapostoli, Jehova okwa kala ta hogolola Aakriste aadhiginini ya ninge iilyo yaakwaniilwa 144 000.

10. Omolwashike Jehova a hogolola Jesus naakwaniilwa 144 000 oyo ya ka pangele aantu?

10 Jehova oku na ko nasha natse shili, nomolwaashono a hogolola aantu ya ka pangele pamwe naJesus. Jesus ota ka kala omupangeli omwaanawa, oshoka oku uvite ko onkalo yetu. Okwa li omuntu kombanda yevi, onkene oku shi nkene hatu kala tu uvite uuna tatu mono iihuna. Paulus okwa popya kutya Jesus oku “uvitile uunkundi wetu olukeno,” nokwa “makelwa miinima ayihe ngashika tse.” (Aahebeli 4:15; 5:8) Aakwaniilwa 144 000 nayo oya li aantu kombanda yevi. Oya kondja nokwaagwanenena nonuuwehame. Onkee ano, otatu vulu okukala nuushili kutya Jesus naakwaniilwa 144 000, ihaya kala owala yu uvite ko onkalo yetu. Ohaya kala wo yu uvite ko omaupyakadhi getu.

 UUKWANIILWA WAKALUNGA OTAWU KA NINGA SHIKE?

11. Omolwashike Jesus a li a longo aalongwa ye ya galikane ehalo lyaKalunga li gwanithwe megulu?

11 Jesus okwa li a longo aalongwa ye ya galikane ehalo lyaKalunga li gwanithwe megulu. Omolwashike mbela? Otwi ilonga mOntopolwa 3 kutya Satana okwa tsu ondumbo naJehova. Konima sho Satana a yono, Jehova okwa li e mu pitike pamwe naayengeli mboka kaaye shi aadhiginini nenge oompwidhuli, ya kale megulu uule wokathimbo. Ano pethimbo mpoka, haayehe megulu ya li taya longo ehalo lyaKalunga. Otatu ki ilonga oshindji kombinga yaSatana noompwidhuli mOntopolwa 10.

12. Iiningwanima iyali ya simana yini ya hokololwa mEhololo 12:10?

12 Ombiimbeli oya yelitha kutya Jesus okwa li ta ka kondjitha Satana, konima ngele a ningi Omukwaniilwa gwUukwaniilwa waKalunga. (Lesha Ehololo 12:7-10.) Ehololo 12:10 oya hokolola iiningwanima iyali ya simana mbyoka ya ningwa nale. Shotango, Uukwaniilwa waKalunga owa li wa tameke okupangela. Jesus Kristus oye Omukwaniilwa gwawo. Oshitiyali, Satana okwa li u umbwa mo megulu.

13. Megulu omwa kala mu li ngiini, sho Satana u umbwa mo?

13 Ombiimbeli otayi hokolola enyanyu ndyoka aayengeli aadhiginini ya li ye na, sho Satana noompwidhuli dhe yu umbwa mo megulu. Oya ti: “Nyanyukweni, ne omagulu naantu amuhe mboka mu li mo!” (Ehololo 12:12) Ngashingeyi megulu omu na ombili nuukumwe, oshoka ayehe mboka ye li mo otaya longo ehalo lyaKalunga.

Satana noompwidhuli dhe oyu umbwa mo megulu, e taya umbilwa kombanda yevi. Okuza kesiku ndyoka kombanda yevi okwa kala ku udha okumona iihuna, ihe otaku ka hula po masiku.

14. Onkalo kombanda yevi oyi li ngiini, sho Satana u umbwa mo megulu?

14 Onkalo kombanda yevi oya lunduluka. Otatu mono iihuna, oshoka ‘omuhindadhi okwa kulukile kutse u  udha ondjahi, sho e shi shi kutya oku na ko ashike okathimbo okafupi kowala.’ (Ehololo 12:12) Satana okwa geya sho u umbwa mo megulu naasho e shi kutya masiku, ota ka hanagulwa po. Ota ningi ngaashi ta vulu, opo e ete omaupyakadhi, uuwehame nokumona iihuna kombanda yevi.

15. Elalakano lyaKalunga li na ko nasha nevi olini?

15 Elalakano lyaKalunga li na ko nasha nevi inali lunduluka natango. Okwa hala aantu ya gwanenena ya ka kale moparadisa kombanda yevi sigo aluhe. (Episalomi 37:29) Mbela Uukwaniilwa waKalunga otawu ke shi enda ngiini?

16, 17. Daniel 2:44 otayi tu longo shike kombinga yUukwaniilwa waKalunga?

16 Ehunganeko ndyoka li li muDaniel 2:44 otali ti: “Pomasiku gaaleli mboka Kalunga komegulu ota ka dhika po oshilongo shoka shaa na hulilo. Itashi ka sindika nando, ihe otashi ka yonagula po iilongo mbyoka ayihe, nosho shene otashi kala sigo aluhe.” Ehunganeko ndyoka otali tu longo shike kombinga yUukwaniilwa waKalunga?

17 Shotango, otali tu longo kutya Uukwaniilwa waKalunga otawu ka tameka okupangela “pomasiku gaaleli mboka.” Shino otashi ti kutya omapangelo oko taga ka adhika natango kombanda yevi, sho Uukwaniilwa tawu ka tameka okupangela. Oshitiyali, otali tu longo kutya Uukwaniilwa waKalunga otawu ka pangela sigo aluhe noitawu ka pingenwa po nando kepangelo lilwe. Oshititatu, Uukwaniilwa waKalunga otawu ka kondjitha omapangelo ngoka ge li kombanda yevi. Otawu ka sindana nowo awuke tawu ka pangela evi alihe. Kungawo, aantu otaya ka kala ye na epangelo ewanawa ndyoka inaaya mona nando onale.

18. Iita mbyoka tayi ka kondjwa pokati kepangelo lyaKalunga nomapangelo gokombanda yevi, ohayi ithanwa ngiini?

 18 Uukwaniilwa nenge epangelo lyaKalunga otali ka kondjitha ngiini omapangelo ngoka ge li kombanda yevi? Manga iita yahugunina mbyoka hayi ithanwa Armagedon inaayi tameka, oompwidhuli otadhi ka ya “kaakwaniilwa yokombanda yevi alihe oku ya hanganitha, ya ka hinge iita mesiku enene lyaKalunga Omunankondoadhihe.” Omapangelo otaga ka kondjitha Uukwaniilwa waKalunga. — Ehololo 16:14, 16; tala eyelitho eti-10.

19, 20. Omolwashike twa pumbwa Uukwaniilwa waKalunga wu ye?

19 Omolwashike twa pumbwa Uukwaniilwa waKalunga wu ye? Opu na omatompelo gatatu. Lyotango, tse aalunde, hatu ehama nohatu si. Ombiimbeli otayi ti kutya otatu ka kala nomwenyo sigo aluhe, ngele Uukwaniilwa wa tameke okupangela. Johannes 3:16 otayi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”

20 Etompelo etiyali, muuyuni omu udha aakolokoshi. Aantu oyendji ohaya fundju, ohaya kengelele noye na eihumbato ewinayi. Tse itatu vulu oku ya hanagula po, ihe Kalunga ote ke shi ninga. Aantu ayehe mboka inaaya hala okweetha po uukolokoshi otaya ka hanagulwa po piita yaArmagedon. (Lesha Episalomi 37:10.) Etompelo etitatu, omapangelo ngoka taga pangele ngashingeyi omakwanyanya, inaga tompola sha noge na iineya. Inaga hala okukwathela aantu ya vulike kuKalunga. Ombiimbeli otayi ti kutya “omuntu ta pangele omukwawo noku mu pangelela oshiponga.” — Omuuvithi 8:9, OB-1954.

21. Uukwaniilwa waKalunga otawu ka shilipaleka ngiini kutya ehalo lyaKalunga otali gwanithwa kombanda yevi?

 21 Konima ngele iita yaArmagedon ya hulu, Uukwaniilwa waKalunga otawu ka shilipaleka kutya ehalo lyaKalunga otali gwanithwa kombanda yevi. Ngiini mbela? Otawu ka hanagula po Satana noompwidhuli dhe. (Ehololo 20:1-3) Aantu itaya ka ehama we nenge ya se. Ayehe mboka aadhiginini otaya ka kala nomwenyo sigo aluhe mOparadisa omolwekulilo. (Ehololo 22:1-3) Uukwaniilwa otawu ka yapulitha edhina lyaKalunga. Ngiini mbela? Uuna epangelo lyaKalunga tali ka pangela kombanda yevi, aantu ayehe otaya ka simanekitha edhina lyaJehova. — Tala eyelitho eti-21.

JESUS OKWA NINGI OMUKWANIILWA UUNAKE?

22. Otu shi shi ngiini kutya sho Jesus a shuna megulu, ina thikila ta ningi Omukwaniilwa?

22 Jesus okwa li a longo aalongwa ye ya galikane taya ti: “Oshilongo shoye nashi ye.” Shika osha li shu ulike kutya Uukwaniilwa waKalunga otawu ke ya konahiya. Tango Jehova okwa li ta ka dhika po epangelo lye, e ta langeke po Jesus a ninge Omukwaniilwa gwalyo. Mbela sho Jesus a shuna megulu, okwa thikile ta ningi Omukwaniilwa? Aawe. Petrus naPaulus oya li ya yelitha nawa kutya Jesus okwa li a tegelele ko manga, konima sho a yumudhwa.  Oya li yu ulike kutya shoka sha li sha hunganekwa mEpisalomi 110:1 otashi popi kombinga yaJesus. Mehunganeko ndyoka Jehova okwa popi a ti: “Kuutumba mpaka kolulyo lwandje, sigo tandi tula aatondi yoye kohi yoompadhi dhoye.” (Iilonga 2:32-35; Aahebeli 10:12, 13) Mbela Jesus okwa li e na okutegelela ethimbo li thike peni, opo Jehova e mu ninge Omukwaniilwa?

Uukwaniilwa waKalunga otawu ka ningitha ehalo lyaKalunga li gwanithwe kombanda yevi

23. (a) Jesus okwa tameke okupangela uunake? (b) Otatu ki ilonga shike montopolwa tayi landula?

23 Uule woomvula odhindji ndhoka dha tetekele omumvo 1914, Aakriste mboka ya li ye na ehalo lyokutseya oshili, oya li yu uvu ko kutya omumvo ngoka ogwa li tagu ka kala gwa simana. Iiningwanima mbyoka ya kala nokuningwa okuza mo 1914 oyu ulike kutya Aakriste mboka oye li mondjila. Momumvo ngoka Jesus okwa li a tameke okupangela e li Omukwaniilwa. (Episalomi 110:2) Konima yaashono, Satana okwa li u umbilwa kombanda yevi, ihe “oku na ko ashike okathimbo okafupi kowala.” (Ehololo 12:12) Montopolwa tayi landula, otatu ka mona uunzapo owundji mboka tawu ulike kutya otu li pethimbo ndyoka. Otatu ki ilonga wo kutya masiku Uukwaniilwa waKalunga otawu ka ningitha ehalo lyaKalunga li gwanithwe kombanda yevi. — Tala eyelitho eti-22.