Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 3

Kalunga okwa shita aantu nelalakano lyashike?

Kalunga okwa shita aantu nelalakano lyashike?

1. Kalunga okwa shita aantu nelalakano lyashike?

KALUNGA okwa shita aantu nelalakano. Okwa li a shiti aantu yotango, Adam naEva, ya kale moshikunino oshiwanawa. Okwe ya tula mo nelalakano ya mone aanona, ya ninge evi alihe oparadisa noya pangele iinamwenyo. — Genesis 1:28; 2:8, 9, 15; tala eyelitho eti-6.

2. (a) Otu shi shi ngiini kutya Kalunga ota ka gwanitha po elalakano lye? (b) Ombiimbeli oya ti shike kombinga yokukala kombanda yevi sigo aluhe?

2 Mbela sho to dhiladhila, opu na ngaa esiku natu ka kale ishewe moparadisa? Jehova ota ti: “Onda popi, notashi ka gwanithwa.” (Jesaja 46:9-11; 55:11) Ota ka gwanitha shoka u uvaneka nokapu na shoka tashi mu yi moshipala. Jehova okwa shita evi nelalakano li kalwe, ihe “ine li shita li mbugale.” (Jesaja 45:18) Okwa hala aantu yu udhithe evi alihe. Mbela Kalunga okwa hala aantu yeni oyo ya kale kevi? Okwa hala ya kale ko ethimbo li thike peni? Ombiimbeli otayi ti: “Aayuuki otaa ka thigulula evi e taa kala mo sigo aluhe.” Episalomi 37:29; Ehololo 21:3, 4.

3. Epulo lini tashi vulika wi ipule?

3 Aantu kunena ohaye ehama nohaya si. Momahala ogendji, ohaya kondjo nohaya dhipagathana. Otu wete lela kutya ndika halyo lya li elalakano lyaKalunga. Oshe ende ngiini opo iinima yi kale ngeyi, nomolwashike? Ombiimbeli oyo owala tayi vulu oku tu pa eyamukulo.

 OMUTONDI GWAKALUNGA

4, 5. (a) Olye a longitha eyoka, a popye naEva moshikunino shaEden? (b) Ohashi ende ngiini, opo omuntu ngoka a li omunashili, a ninge omufuthi?

4 Ombiimbeli otayi tu lombwele kutya Kalunga oku na omutondi, ngoka hi ithanwa “omuhindadhi nenge Satana.” Moshikunino shaEden, Satana okwa li a longitha eyoka, opo a popye naEva. (Ehololo 12:9; Genesis 3:1) Okwa ningitha eyoka li kale lya fa olyo tali popi shili. — Tala eyelitho eti-7.

5 Oshe ende ngiini opo omuyengeli gumwe a ninge Satana? Opwa li omuyengeli gumwe a tala sho Kalunga ta longekidhile Adam naEva oshikunino. Omuyengeli ngoka oye a kokeke iikala iiwinayi e ta ningi Satana. (Job 38:4, 7) Oshe ende ngiini opo a ninge Satana? Natu shi yelekanithe nomuntu ngoka a li omunashili petameko, ihe konima yethimbo okwa ningi omufuthi. Omuntu ngoka ina valwa nando omufuthi. Otashi vulika a tameke okukala e hole iinima yaantu nokukala e yi ihalela. Otashi vulika a kale aluhe he yi dhiladhila sigo okahalu ke ka koko, e te yi yaka po. Kungeyi, okwi iningi ye mwene omufuthi. — Lesha Jakob 1:13-15; tala eyelitho eti-8.

6. Oshe ende ngiini, opo omuyengeli gumwe a ninge omutondi gwaKalunga?

6 Omuyengeli ngoka naye osho naanaa a ningi ngawo. Konima sho Jehova a shiti Adam naEva, okwe ya lombwele ya valathane ‘nokuudhitha evi alihe.’ (Genesis 1:27, 28) Otashi vulika omuyengeli ngoka a li ti ipopile ta ti: “Aantu otaya vulu okulongela ndje, pehala lyokulongela Jehova.” Sho a kala te shi dhiladhila ethimbo ele, oshe mu ningitha a kale a hala aantu ye mu longele, pehala ya longele Jehova. Onkee ano, okwa fundju Eva nokwe mu pukitha. (Lesha Genesis 3:1-5.) Kungeyi, okwa ningi Satana Ondiyapoli, omutondi gwaKalunga.

7. (a) Omolwashike Adam naEva ya si? (b) Omolwashike hatu kulupa nohatu si?

 7 Adam naEva inaya vulika kuKalunga, sho ya li oshiyimati shoka ya li yi indikwa. (Genesis 2:17; 3:6) Oya yono kuJehova, nokonima yethimbo oya ka sa, ngaashi naanaa Jehova a tile. (Genesis 3:17-19) Oluvalo lwaAdam naEva olwa thigulula uulunde kuyo, onkene sigo onena ohalu si. (Lesha Aaroma 5:12.) Opo tu uve ko nawa kutya omolwashike oluvalo lwaAdam naEva lwa thigulula uulunde, natu tale koshiholelwa. Dhiladhila ando to ningi oomboloto moshipana shi na embondokela. Oomboloto adhihe otadhi kala dhi na embondokela. Sho Adam inaa vulika kuJehova, okwa ningi omulunde. Atuheni aalunde ngaashi Adam, molwaashoka otu li oluvalo lwe. Shoka oshe tu ningitha tu kale hatu kulupa nohatu si. — Aaroma 3:23; tala eyelitho eti-9.

8, 9. (a) Satana okwa li a hala Adam naEva yi itaale shike? (b) Omolwashike Jehova inaa dhipaga mboka ya tsu ondumbo naye pethimbo mpoka?

8 Satana okwa tsu ondumbo naJehova, sho a pukitha Adam naEva kaaya vulike kuJehova. Okwa li a hala yi itaale kutya Jehova omuniifundja, noku li omupangeli omwiinayi ngoka inee ya halela uuwanawa. Satana okwa ti kutya aantu inaya pumbwa Kalunga e ya lombwele shoka ye na okuninga. Okwa ti wo kutya Adam naEva oyo yene ye na okutokola shoka shi li mondjila naashoka sha puka. Mbela Jehova okwa li ta ka ninga po shike? Okwa li ta vulu okudhipaga po Satana, naAdam naEva e ta hulitha po iikala yokwaavulika. Mbela shoka osha li ngaa tashi ku ulika kutya Satana omuniifundja? Hasho nando.

9 Jehova ine ya dhipaga po pethimbo mpoka. Pehala lyaashono, okwe etha aantu yi ipangele yo yene uule wokathimbo. Shika osha li tashi ka ulika kutya Satana omuniifundja nosho wo kutya Jehova oku shi shoka she tu  opalela. Otatu ki ilonga kombinga yaashoka mOntopolwa 11. Mbela oto dhiladhila ngiini kombinga yetokolo ndyoka Adam naEva ya ningi? Mbela osha li shili mondjila kuyo okwiitaala Satana nokukala inaaya vulika kuKalunga? Jehova okwa li a pe Adam naEva kehe shimwe ya li ya pumbwa. Okwe ya pe omwenyo gwa gwanenena, ehala ewanawa lyokukala niilonga mbyoka ya li haya nyanyukilwa.  Satana ine ya ningila nando oshimwe oshiwanawa. Andola opo wa li, ando owa ningi po shike?

10. Etokolo lini lya simana kehe gumwe e na okuninga?

10 Kunena, natse otu na emanguluko lyokuninga omatokolo. Omatokolo ngoka ohaga nwetha mo onkalamwenyo yetu ayihe. Otatu vulu okuhogolola okukala hatu vulika kuJehova e li Omupangeli gwetu nenge kuSatana. Ngele otwa tokola tu vulike kuJehova, otatu ku ulika kutya Satana omuniifundja. (Episalomi 73:28; lesha Omayeletumbulo 27:11.) Aantu owala aashona haya vulika kuKalunga, molwaashono haye omupangeli gwuuyuni mbuka. Ngele Kalunga haye omupangeli gwuuyuni, olye omupangeli gwawo?

OLYE TA PANGELE UUYUNI?

Ando omapangelo agehe ngoka ge li muuyuni kaga li gaSatana, mbela ando okwa vulu ngaa oku ga pa Jesus?

11, 12. (a) Sho Satana u uvaneke okupa Jesus omapangelo, otashi tu ulukile shike? (b) Omanyolo geni tagu ulike kutya Satana oye ta pangele uuyuni?

11 Jesus oku shi kutya olye ta pangele uuyuni. Oshikando shimwe, Satana okwa li e mu “ulukile omapangelo agehe gomuuyuni nomasimano gago.” Okwa li wo u uvanekele Jesus a ti: “Ayihe mbika otandi yi ku pe, ngele to tsile ndje oongolo e to galikana ndje.” (Mateus 4:8, 9; Lukas 4:5, 6) Ando omapangelo ngoka kaga li gaSatana, mbela ando okwa vulu ngaa oku ga pa Jesus? Hasho nando. Shoka otashi ulike kutya omapangelo agehe ogaSatana.

12 Otashi vulika wi ipule to ti: ‘Oshe ende ngiini opo Satana a ninge omupangeli gwuuyuni? Mbela Jehova Kalunga Omunankondoadhihe haye ngaa a shita iinima ayihe?’ (Ehololo 4:11) Oye, ihe nonando ongawo, Jesus okwi ithana Satana “omupangeli guuyuni mbuka.” (Johannes 12:31; 14:30; 16:11) Omuyapostoli Paulus okwi ithana Satana Ondiyapoli, ‘kalunga kuuyuni mbuka.’ (2 Aakorinto 4:3, 4) Omuyapostoli Johannes okwa nyola ta ti: “Uuyuni auhe ou li mepangelo lyomuhindadhi.” — 1 Johannes 5:19.

 UUNAKE UUYUNI WASATANA TAWU KA HANAGULWA PO?

13. Omolwashike twa pumbwa uuyuni uupe?

13 Uuyuni mbuka otawu ende tawu nayipala noonkondo. Otu wete nkene iita, uulingilingi, iineya nelongithonkondo yi indjipala. Kutya nduno aantu oya kambadhale shi thike peni, itaya vulu okuhulitha po omaupyakadhi agehe ngoka. Masiku Kalunga ota ka hanagula po uuyuni mbuka wa yonuka, piita ye iinene mbyoka hayi ithanwa Armagedon, e te wu pingene po nuuyuni uupe wuuyuuki. — Ehololo 16:14-16; tala eyelitho eti-10.

14. Kalunga okwa hogolola lye a ninge Omukwaniilwa gwUukwaniilwa we? Ombiimbeli otayi tu lombwele shike kombinga yaJesus?

14 Jehova okwa hogolola Jesus Kristus a ninge Omukwaniilwa gwUukwaniilwa we nenge gwepangelo lye lyomegulu. Oomvula omayovi dha ka pita, Ombiimbeli oya popya kutya Jesus ota ka pangela e li “Omuwa gwombili,” nepangelo ndyoka kali na esiku li ka hule po. (Jesaja 9:6, 7) Jesus okwa li a longo aalanduli ye ya galikane kombinga yepangelo ndyoka, sho a ti: ‘Oshilongo shoye nashi ye, ehalo lyoye nali gwanithwe kombanda yevi wo ngaashi megulu.’ (Mateus 6:10) MOntopolwa 8, otatu ki ilonga nkene Uukwaniilwa waKalunga tawu ka pingena po omapangelo gomuuyuni. (Lesha Daniel 2:44.) Uukwaniilwa mboka otawu ka ninga evi oparadisa ombwanawa. — Tala eyelitho eti-11.

UUYUNI UUPE OWU LI POPEPI

15. “Evi epe” oshike?

15 Ombiimbeli oya hunganeka kutya ‘otwa tegelela egulu epe nevi epe, moka tamu ka kala uuyuuki.’ (2 Petrus 3:13; Jesaja 65:17) Uuna Ombiimbeli tayi popi ‘uuyuni’ nenge evi, otayi popi aantu mboka ye li kombanda yevi. (Genesis 11:1) “Evi epe” moka tamu ka kala uuyuuki otali thaneke aantu ayehe mboka haya vulika kuKalunga noya lalekwa nuuyamba kuye.

16. Omagano gashike omawanawa Kalunga u uvanekela aantu mboka taya ka kala muuyuni uupe, noshike tu na okuninga, opo tu ke ga mone?

 16 Jesus oku uvaneka kutya mboka taya ka kala muuyuni uupe waKalunga, otaya ka kala ye na “omwenyo gwaaluhe.” (Markus 10:30) Otu na okuninga shike, opo tu ke gu mone? Lesha Johannes 3:16 nosho wo 17:3 wu mone eyamukulo. Natu tale shoka Ombiimbeli tayi ti kombinga yankene onkalamwenyo tayi ka kala mOparadisa kombanda yevi.

17, 18. Otu shi shi ngiini kutya kombanda yevi otaku ka kala ombili, notatu ka kala tu li megameno?

17 Uukolokoshi, iita, omiyonena nelongithonkondo otayi ka hula po. Itaku ka kala we aakolokoshi kombanda yevi. (Episalomi 37:10, 11) Kalunga ota ka “hulitha po omalugodhi kombanda yevi alihe.” (Episalomi 46:9; Jesaja 2:4) Kevi otaku ka kala owala mboka ye hole Kalunga nohaya vulika kuye. Otaku ka kala ombili sigo aluhe. — Episalomi 72:7.

18 Oshigwana shaJehova otashi ka kala megameno. Pethimbo Ombiimbeli ya nyolwa, Kalunga okwa li ha gamene Aaisraeli, uuna taya vulika kuye. (Levitikus 25:18, 19) MOparadisa itatu ka kala twa tila nando omuntu nenge oshinima shontumba. Otatu ka kala aluhe twa gamenwa. — Lesha Jesaja 32:18; Mika 4:4.

19. Otu shi shi ngiini kutya muuyuni uupe itamu ka kala ondjala?

19 Itamu ka kala ondjala. “Moshilongo namu kale eloolo lyiilya; kiikulundundu naku kale omapya, niiyimati nayi monike ngaashi yokuLibanon.” (Episalomi 72:16) Jehova Kalunga ketu ‘ote ke tu yambeka,’ ‘nevi otali ka menitha iimeno yalyo.’ — Episalomi 67:6.

20. Otu shi shi ngiini kutya evi otali ka ninga oparadisa?

20 Evi alihe otali ka ninga oparadisa. Aantu otaya ka kala ye na omagumbo nomapya omawanawa. (Lesha Jesaja 65:21-24; Ehololo 11:18.) Evi alihe otali ka kala naanaa  ngaashi oshikunino shaEden sha li. Jehova ote ke tu pa aluhe shoka twa pumbwa. Ombiimbeli otayi mu popi tayi ti: “Oto kamununa eke lyoye e to kutitha iinamwenyo ayihe kesilohenda lyoye.” — Episalomi 145:16.

21. Otu shi shi ngiini kutya pokati kaantu niinamwenyo, otapu ka kala ombili?

21 Pokati kaantu niinamwenyo, otapu ka kala ombili. Iinamwenyo itayi ka monitha we aantu oshiponga. Aanona nayo otaya ka kala megameno, nonando oya kale popepi niinamwenyo mbyoka ya nika oshiponga. — Lesha Jesaja 11:6-9; 65:25.

22. Jesus ota ka ningila shike mboka taye ehama?

22 Itamu ka kala we nando ogumwe te ehama. Sho Jesus a li kombanda yevi, okwa li a aludha aantu. (Mateus 9:35; Markus 1:40-42; Johannes 5:5-9) Jesus e li Omukwaniilwa gwUukwaniilwa waKalunga, ota ka aludha kehe gumwe. Muuyuni uupe, kapu na ngoka ta ka tya: “Otandi ehama.” — Jesaja 33:24; 35:5, 6.

23. Kalunga ota ka ningila shike mboka ya sa?

23 Aasi otaya ka yumuka. Kalunga oku uvaneka kutya ota ka yumudha aantu omamiliyona. Okwa ti: “Oku na eyumuko lyaayuuki nolyaalunde.” — Iilonga 24:15, OB-1954; Lesha Johannes 5:28, 29.

24. Mbela owu uvitile ngiini oku ka kala mOparadisa?

24 Atuheni otatu vulu okuhogolola tu tseye Jehova noku mu longela, nenge tu ninge owala shoka twa hala. Ngele otwa hogolola tu longele Jehova, otatu ka kala nonkalamwenyo ombwanawa monakuyiwa. Omolwashike tatu tile ngawo? Omolwaashoka Jesus okwa li u uvanekele omulumentu gumwe, ngoka a alelwa pamwe naye a ti: “Oto ka kala pamwe nangame mOparadisa.” (Lukas 23:43) Ngashingeyi otatu ki ilongeni oshindji kombinga yaJesus Kristus, nankene ta ka gwanitha po omauvaneko gaKalunga.