Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 5

Ekulilo omagano ge na ondilo ga za kuKalunga

Ekulilo omagano ge na ondilo ga za kuKalunga

1, 2. (a) Oshike hashi ningitha omagano ga kale ge na ongushu kungoye? (b) Omolwashike ekulilo li li omagano omawanawa kaaku na we?

MBELA owa pelwe nale omagano omawanawa? Omagano kage na okukala gondilo, opo ando ga kale ge na ongushu kungoye. Oho kala wa pandula omagano ngoka ge ku nyanyudha nenge wa li we ga pumbwa.

2 Kalunga okwe tu pa omagano ogendji. Opu na gamwe ngoka twa pumbwa unene ge vule agehe ngoka e tu pa. Omagano ngoka omawanawa kaaku na we. Jehova okwa tumu Omwana, Jesus Kristus, opo tu vule oku ka kala nomwenyo sigo aluhe. Oshinima shoka osho tatu ki ilonga montopolwa ndjika. (Lesha Mateus 20:28.) Jehova oku ulika kutya oku tu hole sho a tumu Jesus kombanda yevi e tu kulile.

EKULILO OSHIKE?

3. Omolwashike aantu haya si?

3 Ekulilo olyo omukalo gumwe ngoka Jehova a longitha, opo a mangulule aantu muupika wuulunde neso. (Aaefeso 1:7) Opo tu uve ko kutya omolwashike ekulilo lya li lya pumbiwa, tango otu na okutseya kutya oshike sha ningilwe po oomvula omayovi dha ka pita moshikunino shaEden. Aavali yetu yotango, Adam naEva, oya yono, e ta ya si. Ohatu si, oshoka otwa thigulula uulunde kuyo. — Tala eyelitho eti-9.

4. Adam okwa li a shitwa a tya ngiini?

 4 Sho Jehova u umbu omuntu gwotango, Adam, okwa li e mu shiti a gwanenena. Okwa li e na olutu nomadhiladhilo kaage na epuko lyasha. Kapu na siku a li te ke ehama, ta ka kulupa nenge ta ka sa. Jehova oye a shita Adam, nokwa li e mu tala ko e li omwana. (Lukas 3:38) Jehova okwa li ha popi naAdam aluhe. Okwa li a yelithile nawa Adam shoka e na okuninga nokwe mu pe iilonga mbyoka a li e hole. — Genesis 1:28-30; 2:16, 17.

5. Ombiimbeli oya hala okutya ngiini sho tayi ti kutya Adam okwa li a shitwa “oshifetha” shaKalunga?

5 Adam okwa li a shitwa “oshifetha” shaKalunga. (Genesis 1:27) Okwa li a shitwa nomaukwatya ga fa gaKalunga ngaashi ohole, uunongo, uuyuuki noonkondo. Adam ka li a fa eshina. Kalunga okwa li e mu shiti e na emanguluko lyokuhogolola shoka shi li mondjila naashoka sha puka. Andola Adam okwa vulikile kuKalunga, ando okwa kala mOparadisa sigo aluhe.

6. Sho Adam inaa vulika kuKalunga, okwa kanitha shike? Shika osha gumu ngiini oluvalo lwe?

6 Adam sho inaa vulika kuKalunga okwa li a tokolelwa eso. Okwa kanitha ekwatathano lyopothingo naJehova, omwenyo gwa gwanenena nosho wo Oparadisa. (Genesis 3:17-19) Adam naEva kaya li ya vulika kuKalunga, nokungawo, kaya li we ye na etegameno lyasha. Ombiimbeli otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Adam sho a yono, okwi ‘ilanditha’ po ye mwene noluvalo lwe muupika wuulunde neso. (Aaroma 7:14) Mbela opu na ngaa esiku tatu ka manguluka mo muupika mboka? Eeno.

7, 8. Ekulilo oshike?

 7 Ekulilo oshike? Eyamukulo olya kwatela mo iinima iyali. Shotango, ekulilo ofuto ndjoka hayi gandjwa, opo omuntu a mangululwe nenge yi futile po oshinima shontumba. Oshitiyali, ekulilo ofuto ndjoka hayi gandjwa yi thike naanaa pwaashoka sha kanithwa.

8 Kapu na omuntu a li ta vulu okufutila po shoka sha kanithwa kuAdam sho a yono, e te tu etele eso. Jehova oye awike a ningi elongekidho, opo e tu mangulule mo muulunde neso. Natu taleni nkene ekulilo lya li lya ningwa nankene tali vulu oku tu kwathela.

JEHOVA OKWA GANDJA NGIINI EKULILO?

9. Ekulilo olya li lya futwa ngiini?

9 Kapu na nando ogumwe gwomutse ta vulu okufutila po omwenyo gwa gwanenena ngoka gwa kanithwa kuAdam. Omolwashike mbela? Omolwaashoka atuhe inatu gwanenena. (Episalomi 49:7, 8) Ekulilo olya li owala tali vulu okufutilwa po nomwenyo gwa gwanenena. Ombiimbeli otayi ti kutya Jesus okwa gandja omwenyo gwe gu ninge ‘iikulila yaantu ayehe.’ (1 Timoteus 2:6) Ekulilo olya li li na okukala nongushu yi thike pomwenyo ngoka gwa kanithwa kuAdam.

10. Jehova okwa li a gandja ngiini ekulilo?

10 Jehova okwa li a gandja ngiini ekulilo? Okwa li a tumu Omwana, Jesus, kombanda yevi, ngoka e li omushitwa gwotango. (1 Johannes 4:9, 10) Jesus okwa li a thigi He megulu, e te ya kombanda yevi nehalo ewanawa. (Aafilippi 2:7) Jehova okwa tumu Jesus kombanda yevi hoka a valwa e li omuntu a gwanenena, noka li e na uulunde washa. — Lukas 1:35.

Jehova okwa yamba po Omwana omuholike, opo e tu kulile

11. Ongiini omuntu gumwe a li a vulu okukulila aantu ayehe?

 11 Sho Adam inaa vulika kuJehova, okwa kanithile aantu ayehe omwenyo gwa gwanenena. Mbela opu na omuntu gulwe a li ta vulu okukutha po eso? Eeno. (Lesha Aaroma 5:19.) Jesus ina yona, ihe okwa gandja omwenyo gwe gwa gwanenena, opo e tu kulile. (1 Aakorinto 15:45) Omwenyo gwe ogwo gwa longithwa gu kuthe po eso lyoluvalo lwaAdam aluhe. — 1 Aakorinto 15:21, 22.

12. Omolwashike Jesus a li e na okumona iihuna?

12 Ombiimbeli otayi hokolola nawa nkene Jesus a hepekwa sigo omeso. Okwa li a dhengwa nonyanya, a alelwa komuti gwomahepeko nokwi idhidhimikile uuwehame sigo omeso. (Johannes 19:1, 16-18, 30) Omolwashike Jesus a li e na okumona iihuna? Satana okwa ti kutya kapu na omuntu ta vulu okukala omudhiginini kuKalunga ngele ota mono iihuna. Jesus oku ulika kutya omuntu a gwanenena ota vulu okukala omudhiginini kuKalunga, nonando ota hepekwa noonkondo. Dhiladhila owala nkene Jehova a li u uvite omolwuudhiginini waJesus! — Omayeletumbulo 27:11; tala eyelitho eti-15.

13. Uunake ekulilo lya li lya gandjwa?

13 Momumvo 33, mo 14 Nisan, omwedhi gwOshijuda, Jehova okwe etha aatondi ya dhipage Omwana, Jesus. (Aahebeli 10:10) Konima yomasiku gatatu, Jehova okwa yumudha Jesus nolutu lwopambepo, ihe hanolutu lwopanyama. Mbela ekulilo olya li lya gandjwa uunake? Oosho Jesus a shuna kuHe, megulu. Okwa gandja omwenyo gwe gwopantu gwa gwanenena kuHe gu li ekulilo, omolwoluvalo lwaAdam. (Aahebeli 9:24) Ngashingeyi otu na ompito yokumanguluka mo muulunde neso, omolwekulilo. — Lesha Aaroma 3:23, 24.

 EKULILO OLYE TU ETELA UUWANAWA WUNI?

14, 15. Otu na okuninga shike, opo oondjo dhetu dhi dhimwe po?

14 Omagano gekulilo ngoka Kalunga e tu pa oge tu kwathela. Natu ka taleni nkene tage tu kwathele ngashingeyi nomonakuyiwa.

15 Oondjo dhetu ohadhi dhimwa po. Omathimbo gamwe ohatu ningi omapuko mokupopya nomiilonga. Kashi shi oshipu okulonga shoka shu uka aluhe. (Aakolossa 1:13, 14) Otu na okuninga shike, opo tu dhiminwe po? Otu na shili okwiiyela ombedhi, nokwiindila Jehova neifupipiko e tu dhimine po. Ngele otwe shi ningi, otatu vulu okukala nuushili kutya oondjo dhetu odha dhimwa po. — 1 Johannes 1:8, 9.

16. Oshike tu na okuninga, opo tu kale tu na eiyuvo lya yela?

16 Otatu vulu okukala neiyuvo lya yela. Uuna twa ninga sha sha puka, eiyuvo lyetu ohali kala tali tu nyenyetele. Ohatu kala tu uvite tu na ondjo. Otashi vulika nokuli tu teke omukumo. Omathimbo gamwe ohatu kala tu wete twaa na oshilonga, ihe katu na okusa uunye. Ngele otwi indile Jehova e tu dhimine po, ota ka pulakena kutse note ke tu dhimina po. (Aahebeli 9:13, 14) Jehova okwa hala tu mu lombwele uupyakadhi nuunkundi wetu kehe. (Aahebeli 4:14-16) Uuna twe shi ningi, otatu vulu okukala tu na ombili naye.

17. Sho Jesus e tu sile, omalaleko nuuyamba geni tatu ka mona?

17 Otatu vulu okukala netegameno lyoku ka kala nomwenyo sigo aluhe. Ombiimbeli otayi ti: “Eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” (Aaroma 6:23) Jesus okwe tu sile, notatu vulu oku ka kala nomwenyo sigo aluhe notu na uukolele wa gwana. (Ehololo 21:3, 4) Oshike tu na okuninga, opo tu ka mone omalaleko nuuyamba ngoka?

 ULIKA KUTYA OWA PANDULA EKULILO

18. Otu shi shi ngiini kutya Jehova oku tu hole?

18 Dhiladhila kutya oho kala wu uvite ngiini, ngele wa pewa omagano omawanawa. Ekulilo olyo omagano ge na ondilo ngoka itaaga vulu okuyelekwa nasha. Otu na okupandula lela Jehova sho e ge tu pa. Johannes 3:16 ote tu lombwele kutya ‘Kalunga okwa kala e hole uuyuni, nokwa gandja Omwana awike.’ Jehova oku tu hole shili, nomolwaashono e tu tumine Omwana omuholike, Jesus. Jesus naye oku tu hole, molwaashoka okwi igandja nehalo ewanawa e tu sile. (Johannes 15:13) Jehova naJesus oye tu ulukila shili ohole, sho ye tu pe omagano gekulilo. — Aagalati 2:20.

Sho tatu ilongo kombinga yaJehova, otatu ka ninga ookuume ke, nohole yetu yoku mu hola otayi koko

19, 20. (a) Ongiini to vulu okuninga kuume kaKalunga? (b) Ongiini to vulu okuulika kutya owa pandula ekuliloyambo lyaJesus?

19 Sho wi ilonga kutya Kalunga oku ku hole unene, ongiini to vulu okuninga kuume ke? Kashi shi oshipu okukala wu hole omuntu ngoka kuu shi. Johannes 17:3 otayi ti kutya oto vulu okutseya Jehova. Uuna to shi ningi ohole yoye yoku mu hola otayi koko. Oto ka kala wo wa hala oku mu nyanyudha noto ka ninga kuume ke. Onkee ano, tsikila okwiilonga kombinga yaJehova mokukonakona Ombiimbeli. — 1 Johannes 5:3.

20 Ulika kutya owa pandula ekuliloyambo lyaJesus. Ombiimbeli otayi ti kutya “oongoka i itaala Omwana, oku na omwenyo gwaaluhe.” (Johannes 3:36) Okukala tu na eitaalo otashi ti shike? Otashi ti kutya otu na okuninga shoka Jesus e tu longa. (Johannes 13:15) Okupopya owala kutya otwi itaala muJesus inashi gwana. Opo tu ulike kutya otwa pandula ekulilo, otu na okuulika kutya otu na eitaalo. MuJakob 2:26 otamu popiwa kutya ‘eitaalo lyaa na iilonga olya sa.’

21, 22. (a) Omolwashike tu na okukala hatu kala pEdhimbuluko lyeso lyaJesus omumvo kehe? (b) Otatu ka kundathana shike mOntopolwa 6 no 7?

 21 Kala ho kala pEdhimbuluko lyeso lyaJesus. Ongulohi ndjoka ya tetekele eso lye, Jesus okwa li a lombwele aalongwa ye ya kale haya dhimbulukwa eso lye. Shika ohatu shi ningi omumvo kehe, nohashi ithanwa Edhimbuluko lyeso lyaJesus nenge “Uulalelo wOmuwa.” (1 Aakorinto 11:20; Mateus 26:26-28) Jesus okwa hala tu kale tu shi kutya okwa gandja omwenyo gwe gwa gwanenena, sho e tu kulile. Okwa ti: “Shi ningeni nokudhimbulukwa ndje.” (Lesha Lukas 22:19.) Uuna wu li pEdhimbuluko, oto ulike kutya oto dhimbulukwa ekulilo lyaJesus nohole onene ndjoka ye naHe ye ku ulukila. — Tala eyelitho eti-16.

22 Ekulilo olyo omagano omawanawa kaaku na we ngoka twa pewa. (2 Aakorinto 9:14, 15) Omagano ngaka ge na ondilo otage ke etela uuwanawa aantu omamiliyona mboka ya sa. Ontopolwa 6 no 7 otayi kundathana nkene mboka ya sa taya ka mona uuwanawa mekulilo.