Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

Omayelitho

Omayelitho

1 JEHOVA

Edhina lyaKalunga oJehova. Edhina ndyoka otali ti: “Oha ningitha.” Jehova oye Omunankondoadhihe, noye a shita kehe shimwe. Oku na oonkondo dhokuninga kehe shoka a hala okuninga.

MOshihebeli, edhina lyaKalunga ohali nyolwa noondanda ne. MOshiingilisa ohali nyolwa YHWH nenge JHVH. Edhina lyaKalunga olya holoka mOmbiimbeli momanyolo gOshihebeli lwiikando 7 000 lwaampo. Aantu oyendji muuyuni ohaya tumbula edhina Jehova momikalo dhi ili nodhi ili, shi ikolelela kunkene hali tumbulwa melaka lyawo.

Ontop. 1, okat. 15

2 OMBIIMBELI OYA “NYOLITHWA KOMBEPO YAKALUNGA”

Kalunga oye Omunyoli gwOmbiimbeli, ihe okwa longitha aantu ye yi nyole. Shika osha faathana nomunangeshefa ta lombwele amushanga gwe a nyole ko kontumwafo ye. Kalunga okwa longitha ombepo ye ondjapuki a wilike aanyoli yOmbiimbeli ya nyole omadhiladhilo ge. Ombepo ondjapuki oye ya wilike momikalo dha yoolokathana. Oya li hayi ya ningitha ya mone omamoniko nenge ya lale oondjodhi, yo taya nyola shoka ya mona mo.

Ontop. 2, okat. 5

3 OMAKOTAMPANGO

Omakotampango ogo omalongo gOmbiimbeli ngoka hage tu kwathele tu ninge omatokolo gomondjila. Pashiholelwa, ekotampango ndyoka tali ti kutya “ookuume aawinayi otaa yonagula omikalo omiwanawa,” otali tu longo kutya aantu mboka hatu endathana nayo otaya vulu oku tu nwetha mo, kutya nduno omomukalo omwaanawa nenge omwiinayi. (1 Aakorinto 15:33, OB-1954) Omanga ekotampango ndyoka tali ti kutya “shono omuntu te shi kunu, osho wo ta ka teya,” otali tu longo kutya itatu vulu okuyanda iizemo yiilonga yetu. — Aagalati 6:7.

Ontop. 2, okat. 12

  4 EHUNGANEKO

Ehunganeko olyo etumwalaka lya za kuKalunga. Otashi vulika li kale tali yelitha kombinga yehalo lye, tali longo sha aantu, tali gandja elombwelo nenge li kale etumwalaka lyepangulo. Otashi vulika wo li kale tali popi kombinga yoshinima tashi ka ningwa monakuyiwa. MOmbiimbeli omu na omahunganeko ogendji ga gwanithwa nale.

Ontop. 2, okat. 13

5 OMAHUNGANEKO KOMBINGA YAMESIASA

Jesus oye a gwanitha po omahunganeko ogendji gomOmbiimbeli ngoka taga popi kombinga ye, e li Mesiasa. Tala oshimpungu “ Omahunganeko kombinga yaMesiasa.”

Ontop. 2, okat. 17, enyolo lyopevi

6 ELALAKANO LYAJEHOVA LI NA KO NASHA NEVI

Jehova okwa shiti evi li kale ehala lyokukala aantu mboka ye mu hole. Elalakano lye inali lunduluka. Masiku ota ka hulitha po uukolokoshi awuhe, e ta pe aantu ye omwenyo gwaaluhe.

Ontop. 3, okat. 1

7 SATANA ONDIYAPOLI

Satana oye omuyengeli gwotango ngoka a tsu ondumbo naKalunga. Edhina Satana otali ti: “Omupataneki,” oshoka oha pataneke Jehova. Edhina Ondiyapoli otali ti: “Omulundili,” oshoka oha lundile Jehova noha pukitha aantu.

Ontop. 3, okat. 4

  8 AAYENGELI

Jehova okwa shiti aayengeli manga inaa shita evi. Oya li ya shitwa ya kale megulu. Opu na aayengeli omamiliyona omathele. (Daniel 7:10) Oye na omadhina nomaukwatya ga yoolokathana. Ohaya longele Jehova nuudhiginini noye li aaifupipiki, oshoka ohaya indike aantu ye ya galikane. Oye na oondondo dha yoolokathana nohaya longo iilonga yi ili noyi ili. Iilonga mbyoka oya kwatela mo okulonga komeho yoshipangelapundi shaJehova nokugandja omatumwalaka ge kaapiya ye. Ohaya gamene nohaya wilike aapiya yaJehova kombanda yevi. Ohaya gandja wo omatumwalaka gepangulo nohaya ambidhidha iilonga yokuuvitha. (Episalomi 34:7; Ehololo 14:6; 22:8, 9) Monakuyiwa otaya ka kondja pamwe naJesus piita yaArmagedon. — Ehololo 16:14, 16; 19:14, 15.

Ontop. 3, okat. 5; Ontop. 10, okat. 1

9 UULUNDE

Kehe shoka tatu dhiladhila nenge tatu ningi, kaashi li metsokumwe nehalo lyaJehova, ohashi ithanwa uulunde. Uulunde otawu vulu okuyona po ekwatathano lyetu naJehova. Onkee ano, ohe tu pe oompango nomithikampango dhi tu kwathele tu yande okuyonena owina. Petameko Jehova okwa li a shiti iinima ayihe kaayi na nando epuko lyasha. Sho Adam naEva inaaya vulika kuJehova, oya yono noya ningi aalunde. Oya kulupa noya si. Ngashingeyi natse ohatu kulupa nohatu si, oshoka otwa thigulula uulunde kuyo.

Ontop. 3, okat. 7; Ontop. 5, okat. 3

10 ARMAGEDON

Armagedon iita yaKalunga mbyoka tayi ka hanagula po uuyuni waSatana nuukolokoshi awuhe.

Ontop. 3, okat. 13; Ontop. 8, okat. 18

 11 UUKWANIILWA WAKALUNGA

Uukwaniilwa waKalunga owo epangelo ndyoka Kalunga a dhika po megulu. Jesus Kristus oye Omukwaniilwa gwawo. Monakuyiwa, Kalunga ota ka longitha Uukwaniilwa mboka, opo a hulithe po uukolokoshi awuhe. Uukwaniilwa waKalunga owo tawu ka pangela evi.

Ontop. 3, okat. 14

12 JESUS KRISTUS

Kalunga okwa shiti tango Jesus, manga inaa shita iinima yilwe. Jehova okwe mu tumu kombanda yevi, opo a sile aantu ayehe. Konima sho Jesus a dhipagwa, Jehova okwe mu yumudha. Ngashingeyi Jesus ota pangele megulu e li Omukwaniilwa gwUukwaniilwa waKalunga.

Ontop. 4, okat. 2

13 EHUNGANEKO LYIIWIKE 70

Ombiimbeli oya hunganeka kutya Mesiasa okwa li ta ka ninginithwa uunake. Oya ti kutya okonima ngele iiwike 69 ya hulu. Iiwike mbyoka oya li ya tameke momumvo 445, komeho yeyalulo lyoomvula dhongashingeyi noya li ya hulu momumvo 29, eyalulo lyoomvula dhongashingeyi.

Otu shi shi ngiini kutya iiwike mbyoka oya hulu momumvo 29? Iiwike 69 oya li ya tameke momumvo 445, komeho yeyalulo lyoomvula dhongashingeyi. Momumvo moka omo Nehemia a thiki muJerusalem e ta tameke okutungulula oshilando. (Daniel 9:25; Nehemia 2:1, 5-8) Uuna tatu uvu oshitya oshiwike, momadhiladhilo getu ohamu ya omasiku gaheyali. Ano iiwike mbyoka ya popiwa mehunganeko ndika kayi shi iiwike yomasiku gaheyali, ihe oyo omimvo heyali. Shika oshi li metsokumwe noohapu ndhoka tadhi ti: “Omumvo gumwe ogu lile po esiku kehe.” (Numeri 14:34; Hesekiel 4:6) Shika osha hala okutya, oshiwike kehe oshi thike pomimvo heyali. Sha hala okutya, iiwike 69 oyi thike pomimvo 483 (69 x 7). Ngele otwa yalula omimvo 483 okuza pomumvo 445, komeho yeyalulo lyoomvula dhongashingeyi, otashi ke tu eta pomumvo 29, eyalulo lyoomvula  dhongashingeyi. Momumvo moka, omo Jesus a li a ninginithwa e ta ningi Mesiasa. — Lukas 3:1, 2, 21, 22.

Ehunganeko ndika olya popya wo kombinga yoshiwike shilwe, tashi ulike kutya opu na omimvo heyali dha gwedhwa po. Momukokomoko gwomimvo ndhoka, Mesiasa okwa li ta ka dhipagwa momumvo 33. Petameko lyomumvo 36, onkundana ombwanawa yUukwaniilwa oya li ya tameke okuuvithilwa iigwana ayihe, ihe hAajuda ayeke. — Daniel 9:24-27.

Ontop. 4, okat. 7

 14 ELONGO LYIIFUNDJA LI NA KO NASHA NUUKWATATU

Ombiimbeli otayi ti kutya Jehova oye Omushiti nosho wo kutya okwa shiti Jesus, manga inaa shita iinima yilwe ayihe. (Aakolossa 1:15, 16) Jesus ke shi Kalunga Omunankondoadhihe. Kapu na siku a tile kutya oku thike puKalunga. Okwa ti: “Tate oye omunene e vule ndje.” (Johannes 14:28; 1 Aakorinto 15:28) Oongeleka dhimwe ohadhi longo aantu kutya Kalunga Omukwatatu. Ohadhi ti kutya Kalunga oHe, Kalunga Omwana na Kalunga ombepo ondjapuki. Oshitya Uukwatatu inashi longithwa mo mOmbiimbeli, oshoka kashi shi elongo lyoshili.

Ombepo ondjapuki kayi shi omuntu, ihe oyo oonkondo dhaKalunga kaadhi wetike ndhoka ha longitha, opo a gwanithe po ehalo lye. Pashiholelwa, Aakriste yonale oya li yu ‘udhithwa Ombepo Ondjapuki.’ Jehova okwa ti: “Otandi ka tilila Ombepo yandje maantu ayehe.” — Iilonga 2:1-4, 17.

Ontop. 4, okat. 12; Ontop. 15, okat. 17

15 OMUSHIGAKANO

Aakriste yashili ihaya longitha omushigakano mokulongela Kalunga kwawo. Omolwashike mbela?

  1.  Omushigakano ogwa kala hagu longithwa momalongelokalunga giifundja uule womimvo odhindji. Pethimbo lyonale ogwa li hagu longithwa mokugalikana eshito nopiituthi yopamuthigululwakalo yoshipagani yomilalo. Omimvo 300 dhopetameko konima yeso lyaJesus, Aakriste kaya li haya longitha omushigakano mokulongela Kalunga kwawo. Konima Omupangeli Omuroma Constantine okwa ningi omushigakano gu li endhindhiliko lyUukwakriste. Ogwa li hag longithwa, opo Uukwakriste wu kale wu shiwike apuhe. Kakele kaashono, omushigakano kagu nasha naJesus Kristus. O-New Catholic Encyclopedia oya ti: “Omushigakano otagu adhika momithigululwakalo dhAakriste nodhaamboka kaaye shi Aakriste.”

  2.  Jesus ina sila komushigakano. Oshitya shOshigreka shoka sha tolokwa “omushigakano” otashi ti lelalela “oshiti shu ukilila” nenge “opaala.” Ombiimbeli yedhina Companion Bible oya ti: “Kapu na sha shoka sha nyolwa [mEtestamendi Epe]  momanyolo gOshigreka tashi ulike kutya omushigakano, iiti iyali ya shigakana.” Osha yela kutya, Jesus okwa sile koshiti shu ukilila.

  3.  Jehova ina hala nando tu longithe iihongwathano nenge omandhindhiliko gontumba moku mu longela. — Eksodus 20:4, 5; 1 Aakorinto 10:14.

Ontop. 5, okat. 12

16 EDHIMBULUKO

Jesus okwa lombwela aalongwa ye ya kale haya dhimbulukwa eso lye. Ohaye shi ningi omumvo kehe mo 14 Nisan, mesiku naanaa lya faathana naandyoka Aaisraeli ya li haya dhana Opaasa. Oshikwiila nomaviinu mbyoka tayi thaneke olutu nombinzi yaJesus, ohayi taambathanwa pEdhimbuluko. Mboka taya ka pangela pamwe naJesus megulu, ohaya li oshikwiila nohaya nu omaviinu. Mboka ye na etegameno lyoku ka kala nomwenyo sigo aluhe kombanda yevi, ohaya ulike esimaneko mokukala pEdhimbuluko, ihe ihaya li oshikwiila nenge ya nwe omaviinu.

Ontop. 5, okat. 21

17 OMWENYO

Oshitya shOshihebeli noshOshigreka shoka sha tolokwa “omwenyo” mOmbiimbeli, osha longithwa okuulika kiinima ngaashi (1) omuntu, (2) oshinamwenyo, (3) omwenyo gwomuntu nenge gwoshinamwenyo. Tala kiiholelwa yimwe:

  • Omuntu. Ombiimbeli otayi ti: “Tala, oomwenyo dhaayehe odhandje: ongashika omwenyo gwahe, ongaashi wo omwenyo gwomwana – odho odhandje mwene. Omwenyo nguka tagu yono – ogwo gu na okusa.” (Hesekiel 18:4, OB-1954) Oshitya omwenyo shoka sha longithwa menyolo ndyoka otashi ulike komuntu, oshoka omuntu oye owala ha vulu okuyona.

  • Oshinamwenyo. “Kalunga okwa popi a ti: ‘Momeya namu wiwime iinamwenyo yomaludhi gi ili nogi ili, noondhila nadhi tuke keyalelo lyegulu.’” Natango “Kalunga okwa popi e ta ti: ‘Evi nali etithe po iinamwenyo yomaludhi agehe: iimuna, iihono niiyamakuti.’ Osho nosha ningwa.” — Genesis 1:20, 24.

  •  Omwenyo gwomuntu nenge gwoshinamwenyo. Jehova okwa li a lombwele Moses a ti: ‘Ayehe ya li ya hala omwenyo gwoye, oya sa.’ (Eksodus 4:19, OB-1954) Sho Jesus a li kombanda yevi, okwa popi a ti: “Ongame omusita ngo omwaanawa. Omusita omwaanawa ota gandjele oonzi omwenyo gwe.” — Johannes 10:11.

    Oshikwawo, uuna omuntu ta ningi sha ‘nomwenyo gwe aguhe,’ otashi ti kutya ote shi ningi nehalo ewanawa shi thike poonkondo dhe. (Mateus 22:37; Deuteronomium 6:5) Oshitya omwenyo otashi vulu wo okulongithwa shu ukithwa kehalo lyokuninga sha. Omuntu a sa ota vulu okwiithanwa omwenyo gwa sa. — Numeri 6:6; Omayeletumbulo 23:2; Jesaja 56:11; Haggai 2:13.

Ontop. 6, okat. 5; Ontop. 15, okat. 17

18 OMBEPO

Oshitya shOshihebeli noshOshigreka shoka sha tolokwa “ombepo” mOmbiimbeli, otashi ulike kiinima ya yoolokathana. Olundji otashi ulike koshinima shoka ihaashi monika, ngaashi ombepo nenge omufudho gwomuntu nenge gwoshinamwenyo. Oshitya shika ohashi vulu wo okulongithwa uuna taku popiwa aantu yopambepo nosho wo ombepo ondjapuki, ndjoka yi li oonkondo dhaKalunga. Ombiimbeli itayi longo nando kutya ombepo oyo oshinima hashi tsikile okukala nomwenyo ngele omuntu a si. — Eksodus 35:21; Episalomi 104:29; Mateus 12:43; Lukas 11:13.

Ontop. 6, okat. 5; Ontop. 15, okat. 17

19 GEHENNA

Oshitya shOshigreka Gehenna mOmbiimbeli yOshindonga osha tolokwa “oheli.” Gehenna olyo edhina lyesilu lya li popepi naJerusalem moka mwa li hamu fikilwa iiyagaya. Kapu na shoka tashi ulike kutya pethimbo lyaJesus, opwa li aantu nenge iinamwenyo hayi umbilwa nenge hayi fikilwa mesilu ndyoka. Onkee ano, Gehenna kali shi ehala ihaali monika, moka aantu mboka ya sa haya kala taya pi sigo aluhe. Sho Jesus a popi kombinga yaamboka  haya umbilwa muGehenna, okwa li ta popi kombinga yehanagulo lyaaluhe. — Mateus 5:22; 10:28.

Ontop. 7, okat. 20

20 EGALIKANO LYOMUWA

Egalikano lyOmuwa olyo oshiholelwa shegalikano shoka Jesus a li a gandja, opo a longe aalongwa ye nkene ye na okugalikana. Ohali ithanwa wo Tate yetu ngu wu li megulu. Pashiholelwa, Jesus okwe tu longo tu galikane ngeyi:

  • “Edhina lyoye nali yapulwe”

    Uuna tatu popi oohapu ndhika, otatu pula Jehova a yeleke edhina lye kiifundja ayihe. Shika oshi na okuningwa, opo aantu ayehe mboka ye li kombanda yevi nomegulu ya tumbaleke noya simaneke edhina lye.

  • “Oshilongo shoye nashi ye”

    Uuna tatu popi oohapu ndhika, otatu pula epangelo lyaKalunga li ye li hanagule po uuyuni waSatana wuukolokoshi, li pangele kombanda yevi noli ninge evi oparadisa.

  • “Ehalo lyoye nali gwanithwe kombanda yevi”

    Uuna tatu popi oohapu ndhika, otatu pula elalakano lyaKalunga li na ko nasha nevi li gwanithwe. Ngele lya gwanithwa, aantu aavuliki noya gwanenena, otaya ka kala mOparadisa sigo aluhe, ngaashi Jehova a li a hala sho a shiti aantu.

Ontop. 8, okat. 2

21 EKULILO

Jehova okwa gandja ekulilo, opo a hupithe aantu muulunde neso. Ekulilo olya li lya pumbiwa, li futile po omwenyo gwopantu gwa gwanenena ngoka Adam a kanitha. Olya li wo lye shi ningi tashi wapa, opo aantu ya kale nekwatathano naJehova, ndyoka lya li lya teka po. Jehova okwa tumu Jesus kombanda yevi, opo a sile aantu ayehe. Ngashingeyi aantu ayehe oye na ompito yoku ka kala nomwenyo gwaaluhe noya gwanenena, omolweso lyaJesus.

Ontop. 8, okat. 21; Ontop. 9, okat. 13

 22 OMOLWASHIKE OMUMVO 1914 GWA SIMANA?

Ehunganeko ndyoka li li muDaniel ontopolwa ontine olya ti kutya Kalunga ota ka dhika po Uukwaniilwa we mo 1914..

Ehunganeko: Jehova okwa li a ningitha omukwaniilwa Nebukadnezzar a mone mondjodhi emoniko lyomuti omuleeleka ngoka gwa li gwa kewa po. Mondjodhi ndjoka, oshithindi shomuti ngoka osha li sha mangwa nomalyenge giiyela iiluudhe niikushu, opo kaashi koke uule ‘womimvo heyali.’ Konima yaashoka, omuti ngoka ogwa li tagu ka koka ishewe. — Daniel 4:1, 10-16.

Shoka ehunganeko tali ti kutse: Omuti otagu thaneke epangelo lyaKalunga. Uule womimvo odhindji, Jehova okwa kala ha longitha aakwaniilwa muJerusalem ya pangele oshigwana shaIsraeli. (1 Ondjalulo 29:23) Sho aakwaniilwa mboka ya kala kaaye shi aadhiginini, uuthemba wawo wokupangela oye wu kuthwa. Jerusalem osha li sha hanagulwa po momumvo 607, komeho yeyalulo lyoomvula dhongashingeyi. Sho sha hanagulwa po, “omimvo heyali” odha tameke. (2 Aakwaniilwa 25:1, 8-10; Hesekiel 21:25-27) Jesus okwa ti kutya “aapagani otaa ka lyatagula Jerusalem, sigo ethimbo lyawo lya hulu po.” Ethimbo ndyoka a popi olyo “omimvo heyali.” (Lukas 21:24) Onkee ano, “omimvo heyali” inadhi hula po pethimbo Jesus a li kombanda yevi. Jehova okwa li u uvaneke kutya ota ka langeka po omukwaniilwa pehulilo ‘lyomimvo heyali.’ Epangelo lyOmukwaniilwa nguka omupe, Jesus, olya li tali ka etela aantu yaKalunga kombanda yevi omalaleko nuuyamba ogendji sigo aluhe. — Lukas 1:30-33.

Uule ‘womimvo heyali’: “Omimvo heyali” odha li uule womimvo 2 520. Ngele otwa yalula omimvo 2 520 okuza momumvo 607, komeho yeyalulo lyoomvula dhongashingeyi, otatu ka mona omumvo 1914. Momumvo moka omo Jehova a langeke po Jesus, e li Mesiasa, Omukwaniilwa gwUukwaniilwa We megulu.

 Oshe ende ngiini, opo tu mone omwaalu 2 520? Ombiimbeli otayi ti kutya omimvo ndatu netata odhi thike pomasiku 1 260. (Ehololo 12:6, 14) Onkee ano, ngele owa mbalipaleke omimvo ndhoka, otadhi ku pe “omimvo heyali” ndhoka tadhi ka kala dhi thike pomasiku 2 520. Omasiku 2 520 oge thike pomimvo 2 520, ngaashi sha popiwa kutya “omumvo gumwe ogu lile po esiku kehe.” — Numeri 14:34; Hesekiel 4:6.

Ontop. 8, okat. 23

23 MIKAEL OMUYENGELI OMUKULUNTU

Ombiimbeli oya popya kutya opu na owala omuyengeli gumwe omukuluntu, nedhina lye oMikael. — Daniel 12:1; Judas 9.

Mikael oye Omuwiliki gwetangakwiita lyaayengeli aadhiginini yaKalunga. Ehololo 12:7 otayi ti: “Mikael naayengeli ye oya kondjitha oshikoko pamwe naayengeli yasho.” Embo lyEhololo otali popi kutya Omuwiliki gwetangakwiita lyaKalunga oJesus. Onkee ano, edhina limwe lyaJesus oMikael. — Ehololo 19:14-16.

Ontop. 9, okat. 4

24 OMASIKU GAHUGUNINA

Uutumbulilo mbuka otawu ulike kethimbo iiningwanima iinene tayi ka ningwa kombanda yevi manga Uukwaniilwa waKalunga inaawu hanagula po uuyuni waSatana. MOmbiimbeli omwa longithwa omautumbulilo ngaashi ‘ehulilo lyuuyuni’ nosho wo “uuna Omuna gwOmuntu te ya,” ngoka tagu ulike kethimbo lya faathana. (Mateus 24:3, 27, 37) Omasiku gahugunina oga tameke sho Uukwaniilwa waKalunga wa tameke okupangela momumvo 1914, notaga ka hula po sho uuyuni waSatana tawu ka hanagulwa po piita yaArmagedon. — 2 Timoteus 3:1; 2 Petrus 3:3.

Ontop. 9, okat. 5

 25 EYUMUKO

Uuna Kalunga a yumudha omuntu ngoka a sa, ohashi ithanwa eyumuko. MOmbiimbeli omwa popiwa omayumuko ge li omugoyi. Mboka ya li ya yumudha aantu ongaashi: Elia, Elisa, Jesus, Petrus naPaulus. Iikumithalonga mbyoka oya li ye yi longo koonkondo dhaKalunga. Jehova oku uvaneka kutya ota ka yumudha ‘aayuuki naalunde’ ya ka kale nomwenyo kombanda yevi. (Iilonga 24:15, OB-1954) Ombiimbeli oya popya wo kombinga yaamboka taya ka yumudhwa ya ka kale megulu. Shino otashi ka ningwa sho mboka ya hogololwa kuKalunga, taya ka yumudhwa ya ka kale megulu pamwe naJesus. — Johannes 5:28, 29; 11:25; Aafilippi 3:11; Ehololo 20:5, 6.

Ontop. 9, okat. 13

26 UUMPULILE

Uumpulile owo omukalo moka aantu haya kwatathana noonakusa kuyo yene nenge okupitila momuntu gwontumba, ngaashi onganga. Aantu mboka haya longitha uumpulile ohaye shi ningi, molwaashoka oyi itaala omalongo giifundja kutya oonakusa ohaya shituka e taya ningi iiluli. Oompwidhuli ohadhi pukitha wo aantu kaaya vulike kuKalunga. Iinima ngaashi: eanekelonyothi, okwaanekela, uumpulile, uulodhi, iidhila nokulongitha oonkondo kaadhi li paunshitwe nayo uumpulile. Opu na iinima ngaashi omambo, iifo, okulesha oonyothi dhi na ko nasha nomwedhi moka omuntu a valwa, oomuvi, omapulakata noongalo. Iinima mbyoka ohayi ningitha uumpulile, oompwidhuli nenge iinima mbyoka yi na oonkondo kaadhi li paunshitwe yi kale tayi monika ya fa kaayi na oshiponga nenge iihokithi okutala. Iinima mbyoka hayi ningwa pomafumviko, ngaashi okusimaneka oonakusa, okututula uudhano pomafumviko, okudhimbulukwa esiku nakusa a sa, oonkuluhedhi ndhoka hadhi landulwa dhi na ko nasha nomuselekadhi nenge nomusilwalume nosho wo okupopya nomidhimba nayo oyi na ekwatathano noompwidhuli. Olundji aantu ohaya longitha iingangamithi uuna taya longitha uumpulile. — Aagalati 5:20; Ehololo 21:8.

Ontop. 10, okat. 10; Ontop. 16, okat. 4

 27 UUNAMAPANGELO WAJEHOVA

Jehova oye Omunankondoadhihe noye a shita eshito alihe. (Ehololo 15:3) Oye Mwene gwiinima ayihe noye e na uuthemba wokupangela eshito alihe. (Episalomi 24:1; Jesaja 40:21-23; Ehololo 4:11) Okwa tula po oompango dhi na ko nasha nakehe shimwe a shita. Oku na wo uuthemba wokulangeka po yalwe ya pangele. Ohatu ambidhidha uunamapangelo waKalunga mokukala tu mu hole nohatu vulika kuye. — 1 Ondjalulo 29:11.

Ontop. 11, okat. 10

28 OKUKUTHA MO ELA

Okukutha mo ela oshinima hashi ningilwa owina, opo omuntu a dhipage okanona hoka inaaka valwa. Ela ihali zi mo owala kulyo lyene nenge li gwe mo owala ngeya. Uuna omuntu a ningi omusimba, okanona hoka take ende taka koko muye ohaka kala omuntu i ilile, ihe kake shi nando oshitopolwa sholutu lwayina.

Ontop. 13, okat. 5

29 OKUTULWA OMBINZI

Nguka ogu li omukalo gwopaunamiti moka ombinzi nenge iitopolwa iinene yayo ya simana hayi kuthwa momuntu e tayi tulwa momuntu omukwawo nenge tayi tulwa momuntu tayi zi mekende lyombinzi. Iitopolwa iinene ine yombinzi oyo: oplasma, oosele dhombinzi ontiligane, oosele dhombinzi ontokele noplatelets.

Ontop. 13, okat. 13

 30 EPUTUDHO

MOmbiimbeli oshitya “omakumagidho” nenge eputudho itashi ti kutya egeelo. Eputudho olya kwatela mo okupewa omayele, okulongwa nokupukululwa. Jehova iha ungaunga nonyanya naamboka ha putudha. (Omayeletumbulo 4:1, 2) Okwa tulila po aavali oshiholelwa oshiwanawa. Eputudho ndyoka ha gandja ohali kwathele lela omuntu nokonima yethimbo oha ka kala e li hokwa. (Omayeletumbulo 12:1) Jehova oku hole aantu ye nohe ya dheula. Ohe ya pe omalombwelo ngoka hage ya kwathele ya lundulule omadhiladhilo ga puka. Ohe ya kwathele wo ya kale haya dhiladhila nohaya katuka momukalo ngoka tagu mu nyanyudha. Kaavali, eputudho olya kwatela mo okukwathela aanona yawo yu uve ko kutya omolwashike ye na okukala haya vulika. Olya kwatela mo wo oku ya longa ya kale ye hole Jehova nosho wo Oohapu dhe, Ombiimbeli, noyu uve ko omithikampango dhe.

Ontop. 14, okat. 13

31 OOMPWIDHULI

Oompwidhuli iishitwa yopambepo ihaayi monika, mbyoka yi na oonkondo oonene dhi vule dhaantu. Oompwidhuli odho aayengeli aakolokoshi. Oya ningi aakolokoshi sho inaaya vulika kuKalunga e taya ningi aatondi ye. (Genesis 6:2; Judas 6) Oya landula Satana sho ya tsu ondumbo naJehova. — Deuteronomium 32:17; Lukas 8:30; Iilonga 16:16; Jakob 2:19.

Ontop. 16, okat. 4