Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 11

Omolwashike aantu haya mono iihuna?

Omolwashike aantu haya mono iihuna?

1, 2. Aantu oyendji ohayi ipula nashike?

EKUTHIKUTHI enenenene lya zi mefuta, olya hanagula po omukunda gumwe. Omulumentu gumwe oku umbu ondjembo mongeleka, e te ehameke nokudhipaga aantu oyendji. Omuvali gumwe e na aanona yatano okwa si kokankela.

2 Uuna iiponga yopaunshitwe nenge uupyakadhi wa fa mpoka wa holoka, aantu oyendji ohayi ipula kutya, “Omolwashike mbela?” Oyendji ohayi ipula kutya omolwashike uuyuni wu udha uutondwe nokumona iihuna. Mbela opu na esiku limwe wa li to ipula ngawo?

3, 4. (a) Habakuk okwa li a pula omapulo geni? (b) Jehova okwa li e mu yamukula ngiini?

3 MOmbiimbeli otamu popiwa omulumentu gumwe ngoka a li e na eitaalo lya kola muKalunga. Omulumentu ngoka omupolofeti Habakuk, nokwa li hi ipula omapulo ngaashi ngoka ga popiwa metetekelo. Okwa li a pula Jehova ta ti: “Omolwashike to talitha ndje omalwa? Sigo uunake to idhidhimikile iilonga yuukolokoshi? Eyonuko nomathiminiko oga kunduka ndje, naapehe ope na omalugodhi noontamanana.” —  Habakuk 1:3.

4 MuHabakuk 2:2, 3 otamu popiwa kutya Kalunga okwa li a yamukula omapulo gaHabakuk nokwe mu uvanekele kutya onkalo otayi ka lunduluka. Jehova oku hole aantu noonkondo. Ombiimbeli otayi ti: ‘Oye omusilishimpwiyu gwetu.’ (1 Petrus 5:7) Kalunga oku tonde okumona aantu taya mono iihuna e tu vule. (Jesaja 55:8, 9) Natu ka kundathane epulo tali landula: Omolwashike aantu taya mono iihuna?

 OMOLWASHIKE AANTU HAYA MONO IIHUNA?

5. Aalongi yomalongelokalunga oyendji ohaya longo aantu shike kombinga yokumona iihuna? Ombiimbeli otayi tu longo shike?

5 Aasita naawiliki moongeleka, olundji ohaya ti kutya sho aantu taya mono iihuna ehalo lyaKalunga. Aantu yamwe ohaya ti kutya iinima ayihe mbyoka hayi ningilwa aantu, mwa kwatelwa iiponga yinyanyalitha, oyu uthwa nale kuKalunga. Ohaya ti wo kutya kapu na siku aantu yu uve ko kutya omolwashike he shi ningile. Yalwe nokuli ohaya ti aanona naakuluntu ohaya si, opo ya ka kale naKalunga megulu. Shika kashi shi shoshili. Jehova haye nando omweetithi gwiinima iiwinayi mbyoka hayi ningwa. Ombiimbeli otayi ti: “Itashi vulika Kalunga a longe uugoyoki. Omunankondoawike ita vulu okulonga uuwinayi.” —  Job 34:10.

6. Omolwashike aantu oyendji haya pe Kalunga ombedhi omolwokumona iihuna hoka ku li muuyuni?

6 Aantu oyendji ohaya pe Kalunga ombedhi omolwokumona iihuna hoka ku li muuyuni. Ohaye shi ningi, molwaashoka ohaya dhiladhila kutya Kalunga oye ta pangele uuyuni. Ngaashi twi ilonga mOntopolwa 3, omupangeli gwuuyuni mbuka oSatana Ondiyapoli.

7, 8. Omolwashike aantu taya mono iihuna?

7 Ombiimbeli otayi tu lombwele kutya “uuyuni auhe ou li mepangelo lyomuhindadhi.” (1 Johannes 5:19) Omupangeli gwuuyuni, Satana, okwa nika oshiponga noku na onyanya. Oye “ta pukitha uuyuni auhe.” (Ehololo 12:9) Aantu oyendji oye haya holele, nomolwaashoka wu wete muuyuni mu udha aantu haya fundju, ye na uutondwe nonyanya.

8 Opu na omatompelo galwe kutya omolwashike aantu taya mono iihuna. Sho Adam naEva ya yono, oya taambekidha uulunde koyana. Omolwuulunde mbono, aantu otaya monitha yakwawo iihuna. Olundji oya hala okukala ya simana ye vule yakwawo. Ohaya kondjo, haya yi kiita nohaya  hepekathana. (Omuuvithi 4:1; 8:9) Omathimbo gamwe aantu ohaya mono iihuna, ‘omolwethimbo niiningwanima inaayi tegelelwa.’ (Omuuvithi 9:11, NW) Ngele oya adhika pehala nopethimbo lya puka, iiponga niinima yilwe iiwinayi ohashi vulika yi ya ningilwe.

9. Omolwashike tu shi shi nawa kutya Jehova oku na etompelo ewanawa sho e etha okumona iihuna ku kale po?

9 Jehova haye nando he etitha okumona iihuna. Haye e na okupewa ombedhi sho pu na iita, omiyonena nomahepeko. Kalunga haye he etitha iiponga yopaunshitwe, ngaashi omakakamo gevi, iikungulu nomafundja. Ethimbo limwe otashi vulika wi ipule kutya, ‘Ngele Jehova oye omunankondo a shiga ko meshito alihe, omolwashike itaa hulitha po iinima iiwinayi mbyoka tayi ningwa?’ Otu shi shi kutya Kalunga oku na ko nasha natse shili. Onkee ano, oku na etompelo ewanawa sho e etha okumona iihuna ku kale po. —  1 Johannes 4:8.

OMOLWASHIKE KALUNGA E ETHA OKUMONA IIHUNA KU KALE PO?

10. Satana okwa lundile Jehova a ti ngiini?

10 Ondiyapoli oya pukitha Adam naEva moshikunino shaEden. Satana okwa lundile Kalunga kutya ke shi Omupangeli omuwanawa. Okwa ti kutya Kalunga okwa li i indika Adam naEva sha oshiwanawa. Satana okwa li a hala yi itaale kutya ye ota ka kala omupangeli omuwanawa e vule Jehova. Okwa li a hala yi itaale kutya inaya pumbwa Kalunga. —  Genesis 3:2-5; tala eyelitho eti-27.

11. Epulo lini tu na okuyamukula?

11 Adam naEva kaya li ya vulika kuJehova nokaya li we taya longele kumwe naye. Oya li ye shi oye na uuthemba wokutokola kuyo yene shoka shi li mondjila naashoka sha puka. Jehova oku ulike ngiini kutya aatangalali mboka oya li ya puka nosho wo kutya oku shi shoka tashi tu opalele? Ngashingeyi natu tale eyamukulo kepulo ndyoka.

12, 13. (a) Omolwashike Jehova inaa hanagula po Adam naEva nziya? (b) Jehova okwa li a pe Satana naantu ompito ya mone shike?

 12 Jehova ina hanagula po Adam naEva nziya konima sho ya yono. Okwe etha ya mone aanona. Jehova okwa pitike aanona yawo ya hogolole kutya olye ya hala a kale omupangeli gwawo. Elalakano lyaJehova olyo okuudhitha evi naantu ya gwanenena. Shoka osha li tashi ka ningwa kutya nduno Ondiyapoli oyi ninge po shike. —  Genesis 1:28; Jesaja 55:10, 11.

13 Satana okwa pataneke Jehova montaneho yaayengeli omamiliyona. (Job 38:7; Ehololo 5:11) Onkee ano, Jehova okwa pe Satana ompito, opo u ulike kutya Satana omuniifundja. Jehova okwe etha aantu ya dhike po omapangelo gawo yene, taya wilikwa kuSatana. Jehova okwe shi ningi, opo ya mone ngele otaya vulu ngaa okupondola kaaye na ekwatho lye.

14. Sho aantu ya kala nokwiipangela uule woomvula omayovi, oshu ulike shike?

14 Aantu oya kala nokwiipangela yo yene uule womimvo odhindji, ihe inaya pondola. Shono oshu ulike kutya Satana omuniifundja nosho wo kutya aantu oya pumbwa ekwatho lyaKalunga. Omupolofeti Jeremia okwa popi oshili sho a ti: “Omuwa, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.” —  Jeremia 10:23.

OMOLWASHIKE JEHOVA A TEGELELE PU PITE ETHIMBO ELE?

15, 16. (a) Omolwashike Jehova e etha okumona iihuna ku kale po ethimbo ele? (b) Omolwashike Jehova inaa kandula po uupyakadhi mboka we etithwa kuSatana?

15 Omolwashike Jehova e etha okumona iihuna ku kale po ethimbo ele? Omolwashike ihaa keelele iinima iiwinayi kaayi ningwe? Omolwaashoka oshi na okukutha ethimbo ele, opo aantu yi imonene ko kutya uuyuni kawu na siku  wu hwepopale uuna tawu pangelwa kuSatana. Omapangelo gopantu oga kala nokupangela ethimbo ele, ihe inaga pondola. Nonando oga ninga ehumokomeho muunongononi, iinima ngaashi okwaanuuyuuki, ondjala, omiyonena niita oyi indjipala inaashi monika nale. Itatu vulu okwiipangela tse yene pwaa na ekwatho lyaKalunga.

16 Jehova ina kandula po uupyakadhi mboka we etithwa kuSatana. Ngele okwe shi ningi, otashi ka ningitha aantu yi itaale kutya otaya vulu okwiipangela yo yene. Ota kala wo a fa ta yambidhidha epangelo lyaSatana, ihe ke na esiku e shi ninge. Jehova iha fundju, noke na nando esiku a ka yambidhidhe omadhiladhilo ga fa mpoka. —  Aahebeli 6:18.

17, 18. Jehova ota ka ningila shike uupyakadhi mboka we etithwa kuSatana?

17 Mbela Jehova ota vulu ngaa okukandula po uupyakadhi awuhe mboka we etithwa kuSatana nokaantu? Eeno, Kalunga iha nyengwa kusha. Oku shi kutya uunake ta ka katukila Satana onkatu. Konima yaashono, ota ka ninga evi oparadisa, ngaashi naanaa a li a lalakanena. Ayehe mboka “ye li moombila” otaya ka yumuka. (Johannes 5:28, 29) Aantu itaye ke ehama we noitaya ka sa we. Jesus ota ka kandula po uupyakadhi awuhe mboka we etithwa kuSatana. Jehova ota ka longitha Jesus “a hanagule po iilonga yomuhindadhi.” (1 Johannes 3:8) Otwa pandula Jehova sho e tu idhidhimikila uule wethimbo, opo tu mu tseye nawa. Okwe tu pa wo ompito yokuhogolola ngele otwa hala a kale Omupangeli gwetu. (Lesha 2 Petrus 3:9, 10.) Nonando otatu mono iihuna, ohe tu kwathele tu idhidhimike. —  Johannes 4:23; Lesha 1 Aakorinto 10:13.

18 Jehova ihe tu thiminike tu mu hogolole a ninge Omupangeli gwetu. Okwe tu pa emanguluko lyokuninga omatokolo. Natu taleni kutya emanguluko ndyoka otali ti shike kutse.

 OTO KA LONGITHA NGIINI EMANGULUKO LYOKUNINGA OMATOKOLO?

19. Jehova okwe tu pa omagano geni, nomolwashike tu na okukala twe ga lenga?

19 Omagano omawanawa ngoka Jehova e tu pa gokuninga omatokolo, oge tu yoolola ko thiluthilu kiinamwenyo. Iinamwenyo ohayi valwa nomaukwatya ngoka hage yi wilike yi ninge iinima yontumba. Mbela tse osho tu li ngawo? Aawe, ohatu hogolola shoka twa hala okuninga monkalamwenyo. Ohatu hogolola wo ngele otwa hala okulongela Jehova nenge inatu hala. (Omayeletumbulo 30:24) Tse inatu fa omashina ngoka haga ningi owala shoka ga nuninwa okuninga. Otwa manguluka okuhogolola kutya otwa hala okukala aantu ya tya ngiini. Ohatu hogolola ookuume ketu naashoka twa hala okuninga monkalamwenyo. Jehova okwa hala tu nyanyukilwe onkalamwenyo.

20, 21. Etokolo lini wu na okuninga ngashingeyi?

20 Jehova okwa hala tu kale tu mu hole. (Mateus 22:37, 38) Okwa fa he ngoka ha kala a nyanyukwa okuuva okamwana taka ti: “Tate ondi ku hole.” Oha kala a nyanyukwa, unene tuu ngele take shi popi tashi zi komutima, ihe hakethiminiko. Jehova okwe tu pa emanguluko lyokuhogolola ngele otatu mu longele nenge hasho. Satana nosho wo Adam naEva oya tindi okulongela Jehova. Oto ka longitha ngiini emanguluko lyoye lyokuninga omatokolo?

21 Longitha emanguluko lyoye wu longele Jehova. Opu na aantu yalwe omamiliyona mboka ya tokola okunyanyudha Jehova, e taya tindi okugama kombinga yaSatana. (Omayeletumbulo 27:11) Oshike wu na okuninga ngashingeyi, opo wu ka kale muuyuni uupe waKalunga moka itaamu ka kala okumona iihuna? Ontopolwa tayi landula otayi ka yamukula epulo ndyoka.