Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 2

Ombiimbeli embo lya za kuKalunga

Ombiimbeli embo lya za kuKalunga

1, 2. Omolwashike Ombiimbeli yi li omagano omawanawa ga za kuKalunga?

OHO kala wu uvite ngiini ngele wa pewa omagano kukuume koye? Oho kala wa hala oku ga tala mbala, noho kala wa nyanyukwa sho kuume koye e ge ku pa. Oho mu pandula nokuli.

2 Ombiimbeli omagano ngoka twa pewa kuKalunga. Otayi tu pe uuyelele mboka kaatu na we mpoka tatu vulu oku wu adha. Pashiholelwa, otayi tu lombwele kutya Kalunga okwa shiti egulu nevi nosho wo aantu yotango. Oyi na wo omakotampango nenge omayele ngoka tage tu kwathele uuna tu li muupyakadhi. MOmbiimbeli otatu ilongo mo nkene Kalunga ta ka gwanitha po elalakano lye lyokuninga evi ehala ewanawa. Ombiimbeli oyi li shili omagano omawanawa ga za kuKalunga!

3. Oshike to ka mona, sho to konakona Ombiimbeli?

3 Sho to konakona Ombiimbeli, oto ka mona kutya Kalunga okwa hala wu ninge kuume ke. Sho to ilongo oshindji kombinga ye, oto ka ninga kuume ke kopothingo.

4. Oshike tashi kumitha unene kombinga yOmbiimbeli?

4 Ombiimbeli oya tolokwa momalaka 2 600 lwaampono. Opwa nyanyangidhwa Oombiimbeli omabiliyona ogendji. Aantu oyendji muuyuni awuhe ohaye yi lesha momalaka gawo. Oshiwike kehe, aantu ye vulithe pemiliyona ohaya mono Oombiimbeli melaka lyawo. Kapu na embo lilwe tali vulu okuyelekwa nOmbiimbeli.

5. Omolwashike tatu tile kutya Ombiimbeli oya ‘nyolithwa kombepo yaKalunga’?

 5 Ombiimbeli oya ‘nyolithwa kombepo yaKalunga.’ (Lesha 2 Timoteus 3:16.) Otashi vulika yamwe ya tye: ‘Ngele Ombiimbeli oya nyolwa kaantu, omolwashike haku tiwa kutya oya za kuKalunga?’ Ombiimbeli otayi yamukula tayi ti: ‘Aantu mokupopya elaka lya za kuKalunga, oya wilikwa kombepo ondjapuki.’ (2 Petrus 1:21) Shika osha faathana nomunangeshefa ta lombwele amushanga gwe a nyole ontumwafo. Mbela otaku ka tiwa ontumwafo ndjoka oya nyolwa kulye? Oya nyolwa komunangeshefa, ihe hakuamushanga. Sha faathana, Omunyoli gwOmbiimbeli oKalunga, ihe haantu mboka a longitha oku yi nyola. Kalunga oye e ya wilike ya nyole omadhiladhilo ge. Ombiimbeli  oyo lela “oohapu dhaKalunga.” — 1 Aatessalonika 2:13; tala eyelitho eti-2.

OMBIIMBELI OYI LI PAUSHILI

6, 7. Omolwashike tatu vulu okutya Ombiimbeli ayihe otayi tsu kumwe?

6 Ombiimbeli oya nyolwa muule woomvula dhi vulithe 1 600. Aanyoli yayo oya li ko pomathimbo ga yoolokathana. Yamwe oya li ya aalongwantu, nayalwe kaya li ya longwa. Pashiholelwa, Lukas okwa li ondohotola. Yalwe oya li aanamapya, aayuli yoohi, aasita yiimuna, aahunganeki, aapanguli naakwaniilwa. Aanyoli yOmbiimbeli oya li ye na omaithano ga yoolokathana. Nonando ongawo, omambo agehe ngoka ya nyola, otaga tsu kumwe noitaga kondjithathana. *

7 Oontopolwa dhotango dhaGenesis otadhi popi omaupyakadhi nkene ga tameke muuyuni. Omanga oontopolwa dhEhololo tadhi popi nkene Kalunga te ke ga kandula po, sho ta ka ninga evi oparadisa. Ombiimbeli oya popya kombinga yondjokonona yaantu mboka ya li ko uule woomvula omayovi dha ka pita. Oya popya wo kutya elalakano lyaKalunga ohali gwanithwa po aluhe.

8. Gandja iiholelwa mbyoka tayi ulike kutya Ombiimbeli oyi li paushili miinima yuunongononi.

8 Ombiimbeli kayi shi embo lyuunongononi nenge lyosikola, ihe shoka tayi popi kombinga yuunongononi oshoshili. Embo lya za kuKalunga, osho twa tegelela li kale ngawo. Pashiholelwa, embo lyaLevitikus oli na uuyelele mboka Aaisraeli ya li ya pewa kuKalunga, opo ya keelele omikithi kaadhi taandele. Shika osha nyolelwe nale manga aantu inaaya tseya kutya oombuto noombakiteli ohadhi etitha omikithi. Ombiimbeli oya longa wo aantu kutya evi  oli li powalawala. (Job 26:7) Aantu oyendji oya li yi itaala kutya evi olya yelekana, ihe Ombiimbeli oye shi yelitha nawa kutya evi oli li ongonga. — Omayeletumbulo 8:31.

9. Uushili waanyoli yOmbiimbeli otawu tu ulukile shike?

9 Ombiimbeli ohayi popi aluhe oshili kombinga yondjokonona. Omambo ogendji gondjokonona inaga popya naanaa oshili yi ihwapo. Pashiholelwa, aanyoli yago ihaya popi naanaa oshili uuna iigwana yawo ya sindika. Mepingathano naashono, aanyoli yOmbiimbeli inaye shi holeka sho Aaisraeli ya li ya sindika. Oya nyola wo kombinga yomapuko gawo. Pashiholelwa, membo lyaNumeri, Moses okwa popya kutya okwa li a ningi epuko enene, ndyoka lya li lye mu geelitha kuJehova. (Numeri 20:2-12) Ombiimbeli oya za kuKalunga, molwaashoka aanyoli yayo aanashili. Shoka otashi ulike lela kutya otatu vulu okwiinekela Ombiimbeli.

OMBIIMBELI EMBO LI NA OMAYELE OMAWANAWA

10. Omolwashike omayele ngoka ge li mOmbiimbeli tage tu kwathele kunena?

10 Ombiimbeli oya ‘nyolithwa kombepo yaKalunga noyi na oshilonga shokulonga oshili, okukumagidha nokupukulula.’ (2 Timoteus 3:16) Omayele gOmbiimbeli otage tu kwathele kunena. Jehova oku tu shi nawa, oshoka oye e tu shita. Onkee ohu uvu ko nawa omadhiladhilo nomaiyuvo getu. Oku tu shi nawa e tu vule, nokwa hala tu kale twa nyanyukwa. Oku shi shoka tashi tu opalele naashoka itaashi tu opalele.

11, 12. (a) Omayele omawanawa geni Jesus a gandja muMateus ontopolwa 5 sigo 7? (b) Oshike ishewe tatu ilongo mOmbiimbeli?

11 MuMateus ontopolwa 5 sigo 7, otatu adha mo omayele omawanawa. Moontopolwa ndhoka Jesus okwa popi kombinga yankene tatu vulu okukala twa nyanyukwa, nkene tu na okukala naantu, nkene tu na okugalikana nankene tu na okutala ko iimaliwa. Nonando omayele ngoka okwe ga  popya pwa pita oomvula 2 000, oge na natango oshilonga notage tu kwathele.

12 MOmbiimbeli Jehova ote tu longo wo omakotampango ngoka tage tu kwathele tu kale tu na onkalamwenyo yi li nawa, tu kale hatu longo nuudhiginini notu kale tu na ombili nayalwe. Omakotampango gOmbiimbeli ohage tu kwathele aluhe, kutya nduno otse oolye, ohatu kala peni, nenge uupyakadhi wetu owu thike peni. — Lesha Jesaja 48:17; tala eyelitho eti-3.

OTATU VULU OKWIINEKELA OMAHUNGANEKO GOMOMBIIMBELI

Jesaja okwa li a hunganeka kutya oshilando shaBabilonia otashi ka hanagulwa po

13. Jesaja okwa li a popi kutya oshilando Babilonia otashi ka ningilwa shike?

13 Omahunganeko gomOmbiimbeli ohaga gwanithwa aluhe. Pashiholelwa, Jesaja okwa hunganekele kutya Babilonia otashi ka hanagulwa po. (Jesaja 13:19) Okwa li a hokolola nkene oshilando shoka tashi ka hanagulwa po. Oshilando shoka osha li shi na omiyelo ominene nosha dhingolokwa komulonga. Nonando ongawo, Jesaja okwa li a hunganeka kutya omulonga otagu ka pwina nomiyelo otadhi ka thigwa dhe eguluka. Aaponokeli oya li taya ka yuga ko oshilando inaaya kondja. Jesaja okwa li wo a hunganeke kutya omulumentu gwedhina Kores ota ka sinda Babilonia. — Lesha Jesaja 44:27–45:2; tala eyelitho eti-4.

14, 15. Ehunganeko lyaJesaja olya li lya gwanithwa ngiini?

14 Konima yoomvula omathele gaali sho ehunganeko ndyoka lya nyolwa nale, etangakwiita limwe olya thiki muBabilonia, nolya li lyi ilongekidha oku shi ponokela. Olye a li te li wilike? Omukwaniilwa gwaPersia, Kores, ngaashi naanaa sha li sha hunganekwa. Mbela etangakwiita lyaKores olya li ngaa tali ka vula okuhomona Babilonia, ngaashi sha hunganekwa komupolofeti Jesaja?

15 Uusiku mboka oshilando sha ponokelwa, Aababilonia  oya li ye na oshituthi. Oya li yu uvite ye li megameno, molwaashoka oshilando osha li sha dhingolokwa kenkolokuma enene nokomulonga. Kores netangakwiita lye oya li ya fulu omukanka pondje yoshilando, mu kungulukile omeya gomulonga sigo ga ningi omashona. Kungeyi, osha ningi oshipu, opo aakwiita Aapersia ya taaguluke omulonga yaye moshilando. Etangakwiita lyawo olya li lya taaguluka ngiini enkolokuma lyaBabilonia? Ngaashi naanaa ehunganeko  lye shi popi, omiyelo dhoshilando odha li dha thigwa dhe eguluka. Kungawo, aakwiita oye ya moshilando inaaya kondja.

16. (a) Jesaja okwa li hunganeke shike kombinga yaashoka tashi ka ningilwa oshilando shaBabilonia? (b) Otu shi shi ngiini kutya ehunganeko lyaJesaja olya gwanithwa?

16 Jesaja okwa hunganeka kutya kapu na nando ogumwe ta ka kala muBabilonia. Okwa ti: “Kape na we mpoka tashi ka kalwa kaantu.” (Jesaja 13:20) Mbela oohapu ndhoka odha gwanithwa ngaa shili? Eeno, oshoka ehala mpoka pwa li Babilonia, oli li ookilometa 80 kuumbangalantu waBaghdad moIrak nopu na owala omakulukuma. Sigo onena ihamu kala aantu. Jehova okwa kombo po Babilonia ‘noshikombe shoka hashi kutha po nenge hashi hanagula po ayihe.’ — Jesaja 14:22, 23. *

Omakulukuma gaBabilonia

17. Omolwashike tu na okwiinekela omahunganeko gaKalunga?

17 Otu na okwiinekela shoka Ombiimbeli tayi popi kombinga yonakuyiwa, oshoka omahunganeko gayo ogendji oga gwanithwa nale. Otatu vulu okukala nuushili kutya Jehova ota ka ninga evi oparadisa ngaashi e shi uvaneka.  (Lesha Numeri 23:19.) Otu na uushili kutya “Kalunga ngoka ihaa fundju, okwe tu uvanekele omwenyo gwaaluhe, manga uuyuni inaau shitwa.” — Titus 1:2. *

OMBIIMBELI OTAYI VULU OKU KU LUNDULULA

18. Paulus okwa hokolola ngiini “oohapu dhaKalunga”?

18 Otwi ilonga kutya kaku na embo lilwe tali vulu okuyelekanithwa nOmbiimbeli. Uuna Ombiimbeli tayi popi kombinga yuunongononi nenge yondjokonona, ohayi kala aluhe tayi tsu kumwe noyi li mondjila. Ohayi gandja wo omayele omawanawa noyi na omahunganeko ogendji ngoka ga gwanithwa nale. Ombiimbeli oyi na wo uuyelele owundji wu vulithe pwaamboka. Omuyapostoli Paulus okwa nyola a ti: “Oohapu dhaKalunga odhi na omwenyo nodhi na oonkondo.” Mbela shoka otashi ti shike? — Lesha Aahebeli 4:12.

19, 20. (a) Ombiimbeli otayi ku kwathele ngiini wi itseye nawa? (b) Ongiini to vulu okuulika kutya owa pandula Ombiimbeli ndjoka yi li omagano?

19 Ombiimbeli otayi vulu oku ku lundulula. Otayi vulu oku ku kwathela wi itseye nawa. Otayi vulu oku ku kwathela wu uve ko omadhiladhilo nomaiyuvo goye gomuule. Pashiholelwa, otashi vulika tu kale tu uvite kutya otu hole Kalunga. Opo tu ulike kutya otu mu hole, otwa pumbwa okuvulika kwaashoka Ombiimbeli tayi ti.

20 Ombiimbeli embo lya za kuKalunga shili. Okwa hala tu yi leshe, tu yi konakone notu kale tu yi hole. Oyi li omagano ngoka tu na okupandula. Onkene, yi konakona, opo wu uve ko elalakano lyaKalunga li na ko nasha naantu. Montopolwa tayi landula, otatu ki ilonga oshindji kombinga yelalakano ndyoka.

^ okat. 6 Aantu yamwe ohaya ti kutya Ombiimbeli itayi tsu kumwe, ihe shika kashi shi shoshili. Tala embo The Bible — God’s Word or Man’s?, Ontopolwa 7, lya nyanyangidhwa kOonzapo dhaJehova.

^ okat. 16 Ngele owa hala okulesha uuyelele owundji kombinga yomahunganeko gomOmbiimbeli, lesha okambo A Book for All People, epandja 27-29, ka nyanyangidhwa kOonzapo dhaJehova.

^ okat. 17 Ehunganeko kombinga yehanagulo lyaBabilonia, halyo owala ehunganeko lyOmbiimbeli lya gwanithwa. Oto vulu okumona uuyelele womahunganeko ngoka ga gwanithwa taga popi kombinga yaJesus Kristus meyelitho eti-5.

Tseya oshindji

ONKUNDANA OMBWANAWA YA ZA KUKALUNGA

Ongiini tatu vulu okukala nuushili kutya shoka shi li mOmbiimbeli oshoshili?

Ngele Ombiimbeli oya nyolithwa kuKalunga, nena itayi vulu okuyelekanithwa nando onembo limwe.

OOLYE TAYA LONGO EHALO LYAJEHOVA KUNENA?

Oshili yOmbiimbeli oya li ya monika ishewe ngiini?

Ongiini tatu vulu okukala tu na uushili kutya otu na euvoko lyomondjila lyaashoka Ombiimbeli tayi longo?