Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 16

Longa shoka sha hokiwa kuJehova

Longa shoka sha hokiwa kuJehova

1, 2. Epulo lini wu na okwiipula, nomolwashike lya simana?

SHO wa konakona Ombiimbeli, owa mona kutya aantu oyendji ohaya ti kutya otaya longele Kalunga. Ngele to tala komalongo gawo nenge kiilonga yawo, otaya longo shoka Kalunga e tonde. (2 Aakorinto 6:17) Jehova ote tu lombwele tu ze mo momalongelokalunga giifundja, ‘muBabilon oshinene.’ (Ehololo 18:2, 4) Mbela owa za mo ngaa? Atuheni otu na okuninga etokolo. Otu na okwiipula ngeyi: ‘Mbela onda hala okulongela Kalunga momukalo ngoka a hala nenge omomukalo ngoka nda hala?’

2 Ngele owa za mo nale momalongelokalunga giifundja, owa ninga nawa. Otashi vulika pu na natango iinima yimwe ho ningi, yi na ekwatathano nago. Natu kundathane yimwe yomuyo. Natu tale wo kutya omolwashike sha simana wu yi tale ko ngaashi Jehova he yi tala ko.

OKUGALIKANA IIHONGWATHANO NAATHITHI

3. (a) Omolwashike tashi vulika shi kale oshidhigu kuyamwe, ye ethe po okulongitha iihongwathano? (b) Ombiimbeli otayi ti shike kombinga yokulongitha iihongwathano?

3 Aantu yamwe oya kala haya longitha iihongwathano momagumbo gawo uule womimvo odhindji, opo ya galikane Kalunga. Ngele oho yi longitha, otashi vulika wu kale wu uvite nayi ngele to galikana Kalunga, itoo yi longitha. Dhimbulukwa kutya Jehova okwe tu longa nkene tu na oku mu galikana. Ombiimbeli oya popya kutya Jehova ina hala tu longithe iihongwathano uuna tatu mu galikana. —  Lesha Eksodus 20:4, 5; Episalomi 115:4-8; Jesaja 42:8; 1 Johannes 5:21.

4. (a) Omolwashike kaatu na okugalikana aathithi? (b) Omolwashike Jehova a li a lombwele Aaisraeli kaaya popye noonakusa?

 4 Aantu yamwe ohaya longitha ethimbo olindji nosho wo oonkondo dhawo ya simaneke aathithi. Otashi vulika ye ya galikane nokuli. Otwi ilonga kutya oonakusa itaya vulu oku tu kwathela nenge ye tu etele oshiponga. Kaye na omwenyo pehala limwe li ili. Osha nika oshiponga okupopya nayo. Ngele otwa mono etumwalaka ndyoka lya fa lya za kunakusa, osha yela nale kutya olya za koompwidhuli. Jehova okwa li a lombwele Aaisraeli kaaya popye noonakusa. Okwe ya lombwele wo kaaya kuthe ombinga muumpulile woludhi kehe. —  Deuteronomium 18:10-12; tala eyelitho eti-26 neti-31.

5. Oshike tashi ku kwathele we ethe po okulongitha iihongwathano uuna to galikana Kalunga nowu ethe po okugalikana aathithi?

5 Oshike tashi ku kwathele we ethe po okulongitha iihongwathano uuna to galikana Kalunga? Oshike tashi ku kwathele we ethe po okugalikana aathithi? Owa pumbwa okulesha Ombiimbeli e to dhiladhila nkene Jehova a tala ko iilonga ya tya ngaaka. Jehova oku yi ‘tonde’ nokwe yi tala ko ya nyata. (Deuteronomium 27:15) Galikana Jehova esiku kehe, opo e ku kwathele wu kale ho tala ko iinima ngaashi he yi tala ko. Galikana wo e ku kwathele wu kale ho mu longele momukalo ngoka a hokwa. (Jesaja 55:9) Kala wu na uushili kutya Jehova ote ke ku pa oonkondo ndhoka wa pumbwa, opo we ethe po iinima ayihe yi na ekwatathano nomalongelokalunga giifundja.

MBELA OTU NA OKUDHANA OKRISMESA?

6. Omolwashike aasita ya li ya hogolola evalo lyaJesus li kale hali dhanwa mo 25 Desemba?

6 Okrismesa ohayi dhanwa apuhe muuyuni. Aantu oyendji ohaye yi ithana kutya evalo lyaJesus. Okrismesa oyi na ekwatathano nomalongelokalunga giifundja. Embo limwe lyuuyelele otali yelitha kutya aapagani yomuRoma  oya li haya dhana evalo lyetango mo 25 Desemba. Aasita oya li ya hala aapagani ya ninge Aakriste. Onkee ano, oya tokola ya kale haya dhana evalo lyaJesus mo 25 Desemba, nonando ina valwa mesiku ndyoka. (Lukas 2:8-12) Aalongwa yaJesus kaya li haya dhana Okrismesa. Embo Sacred Origins of Profound Things otali ti kutya uule womimvo 200 dha ka pita, konima yokuvalwa kwaJesus, “kapwa li ngoka a li e shi kutya Jesus okwa valwa naanaa uunake, naantu kaya li ye na nasho.” Okrismesa oya tameke okudhanwa konima yomimvo omathele sho Jesus a shuna nale megulu.

7. Omolwashike Aakriste yashili ihaaya dhana Okrismesa?

7 Aantu oyendji oya tseya kutya Okrismesa naashoka hashi ningwa po oya za kaapagani. Mwaashoka hashi ningwa po, omwa kwatelwa okudhana iituthi nokupaathana omagano. Pashiholelwa, moIngilanda nomiitopolwa yimwe yaAmerika, opwa li ethimbo limwe aantu yi indikwa ya dhane Okrismesa, oshoka oya tamekela kaapagani. Kehe ngoka te yi dhana, okwa li ha geelwa. Konima yethimbo aantu oya tameke ishewe oku yi dhana. Mbela omolwashike Aakriste yashili ihaaya dhana Okrismesa? Omolwaashoka oya hala okunyanyudha Jehova mukehe shimwe taya ningi.

MBELA OTU NA OKUDHANA OMAVALO?

8, 9. Omolwashike Aakriste yonale ya li ihaaya dhana omavalo?

8 Aantu oyendji muuyuni ohaya dhana omavalo. Mbela Omukriste oku na okudhana omavalo? Aantu ayehe mboka ya popiwa mOmbiimbeli ya dhana omavalo, kaya li haya longele Jehova. (Genesis 40:20; Markus 6:21) Oya li haya dhana omavalo, opo ya simaneke iikalunga yawo. Embo The World Book Encyclopedia olya ti kutya Aakriste yonale “oya li ya tala ko okudhana evalo lyagumwe ku li omukalondjigilile gwoshipagani.”

 9 Aaroma nAagreka yonale oya li yi itaala kutya pevalo lyomuntu kehe, ohapu kala oshishitwa shopambepo. Oshishitwa shoka osho hashi gamene omuntu aniwa monkalamwenyo ye. Embo The Lore of Birthdays olya ti kutya oshishitwa shoka shopambepo “ohashi kala shi na ekwatathano lyopaumpulile noshikalunga shesiku moka omuntu a valwa.”

10. Omolwashike Aakriste kunena ihaaya dhana omavalo?

10 Mbela Jehova okwa hokwa iituthi mbyoka yi na ekwatathano nomalongelokalunga giifundja? Aawe, ine yi hokwa. (Jesaja 65:11, 12) Natse ihatu dhana omavalo nenge omasiku gomafudho agehe ngoka ge na ekwatathano nomalongelokalunga giifundja.

MBELA HOKA KWA TAMEKELA OSHINIMA OKU NA NGAA OSHILONGA?

11. Omolwashike aantu yamwe haya dhana omasiku gomafudho, noshike tu na okukala twa lenga?

11 Aantu yamwe oye shi kutya Okrismesa nomasiku galwe ngoka haga dhanwa, oga tamekela kaapagani. Nonando ongawo, otaya tsikile noku ga dhana. Oyu uvite kutya omasiku ngoka oge li ompito ombwanawa yokukala pamwe noyaandjawo. Mbela nangoye osho wu uvite ngawo? Inashi puka okukala wa hala okukala pamwe noyaandjeni. Jehova oye omutotipo gwegumbo. Okwa hala tu kale tu na ekwatathano ewanawa noyaandjetu. (Aaefeso 3:14, 15) Otwa pumbwa okukala twa lenga ekwatathano ewanawa naJehova. Katu na okunyanyudha yaandjetu mokukala hatu kutha ombinga momasiku gomafudho ngoka ge na ekwatathano nomalongelokalunga giifundja. Omuyapostoli Paulus okwa ti kutya natu “kambadhaleni okwiilonga okutseya shoka sho opalela Omuwa.” —  Aaefeso 5:10.

12. Oshike hashi ningitha esiku lyefudho li kale inaali hokiwa kuJehova?

12 Aantu yamwe ohaya kala yu uvite kutya hoka kwa tamekela  omasiku gomafudho kaku na oshilonga. Momeho gaJehova hoka ga tamekela oku na oshilonga. Jehova ina hokwa omasiku ngoka ga za komalongelokalunga giifundja nenge ngoka taga simaneke aantu nenge iilongo. Pashiholelwa, Aaegipiti oya li haya ningile iikalunga yawo iituthi oyindji. Konima sho Aaisraeli ya zi muEgipiti, nayo oya kala haya dhana iituthi mbyoka. Oye yi ithana ‘iituthi yOmuwa.’ Jehova okwe ya geele omolwoshinima shoka. (Eksodus 32:2-10) Omupolofeti Jesaja okwe tu ladhipika kaatu ‘gume shoka sha nyata.’ —  Lesha Jesaja 52:11.

LONGITHA OONDUNGE DHOKUYOOLOLA

13. Omapulo geni tashi vulika wi ipule, ngele owe etha po okudhana omasiku gomafudho?

13 Otashi vulika ho kala wu na omapulo ogendji, okuza sho we etha po okudhana omasiku gomafudho. Otashi vulika wi ipule omapulo taga landula. Ondi na okuninga ngiini uuna aaniilonga pamwe nangame taya pula ndje kutya omolwashike ihaandi dhana Okrismesa? Ondi na okuninga ngiini ngele onda pewa omagano gOkrismesa? Ondi na okuninga ngiini ngele kuume kandje kopandjokana okwa hala tu dhane esiku lyefudho? Ongiini tandi vulu okukwathela aamwandje kaaya kale yu uvite nayi, sho ihaatu dhana Okrismesa nenge omavalo?

14, 15. Oshike to vulu okuninga uuna omuntu te ku halele Okrismesa ya yambekwa nenge te ku pe omagano?

14 Longitha oondunge dhokuyoolola moonkalo ndhoka. Pashiholelwa, ngele omuntu okwa ti: “Otii ku halele Okrismesa ya yambekwa,” ino mu ipwililikila. Oto vulu owala okutya, “Onda pandula.” Ngele omuntu okwa hala okuuva kutya omolwashike ihoo dhana Okrismesa, oto vulu oku mu yelithila. Shi ninga nombili, nuukeka nonesimaneko. Ombiimbeli otayi ti: “Oohapu dheni nadhi  kale aluhe oombwanawa notadhi hokitha omuntu oku mu pulakena. Kambadhaleni, mu kale aluhe mu shi, nkene mu na okuyamukula aantu.” (Aakolossa 4:6) Otashi vulika wu mu yelithile kutya owu hole okukala pamwe naantu nosho wo oku ya pa omagano. Oho shi ningi owala momasiku galwe, kaage shi ngoka gomafudho.

15 Owu na okuninga shike uuna wa pewa omagano? Ombiimbeli inayi tu tulila po omusholondondo gwoompango ndhoka tu na okulandula. Pehala lyaashono, otayi tu lombwele tu kale aluhe tu na eiyuvo lya yela mukehe shimwe tatu ningi. (1 Timoteus 1:18, 19) Otashi vulika omuntu ngoka te ku pe omagano inaa tseya kutya iho dhana omasiku gomafudho. Otashi vulika gumwe e ku lombwele ta ti: “Ondi shi kutya iho dhana omavalo nenge Okrismesa, ihe onda hala oku ku pa omagano ngaka.” Monkalo ya tya ngawo ongoye wu na okutokola ngele oto taamba omagano ngoka nenge hasho. Kala wu na eiyuvo lya yela sho to ningi etokolo ndyoka. Ino ninga etokolo ndyoka tali ka yona po ekwatathano lyoye naJehova.

UUNA YAANDJENI YA HALA OKUDHANA OMASIKU GOMAFUDHO

Mboka haya longele Jehova oya nyanyukwa

16. Owu na okuninga shike ngele yaandjeni oya hala ya dhane esiku lyefudho?

16 Owu na okuninga shike uuna yaandjeni ya hala okudhana esiku lyefudho? Ino pumbwa okutamanana nayo. Dhimbulukwa kutya oye na uuthemba wokutokola shoka ya hala okuninga. Popya nayo nombili e to simaneke omatokolo gawo ngaashi wa hala ya simaneke goye. (Lesha Mateus 7:12.) Owu na okuninga shike ngele yaandjeni oya hala wu dhane pamwe nayo esiku lyefudho? Manga inoo ninga etokolo, galikana Jehova e ku kwathele wu ninge etokolo li li mondjila. Dhiladhila kombinga yetokolo  lyoye manga inoo li ninga, e to ka konga uuyelele. Kala aluhe ho ningi shoka tashi nyanyudha Jehova.

17. Oshike wu na okuninga, wu kwathele aamwoye kaaya kale yu uvite nayi, sho ihaamu dhana omasiku gomafudho?

17 Oshike wu na okuninga, wu kwathele aamwoye kaaya kale yu uvite nayi, sho ihaamu dhana omasiku gomafudho? Kala ho unganeke omainyanyudho gontumba pamwe nayo pethimbo li ili. Kala ho ya pe omagano. Kala ho kala pamwe nayo noku yu ulukila ohole.

LONGA SHOKA SHA HOKIWA KUJEHOVA

18. Omolwashike tu na okukala hatu yi kokugongala?

18 Otu na okweetha po thiluthilu iinima ayihe mbyoka yi na ekwatathano nomalongelokalunga giifundja. Otu na wo okulonga shoka sha hokiwa kuJehova. Ngiini mbela? Otu na aluhe okukala hatu yi kokugongala. (Lesha Aahebeli 10:24, 25.) Okugongala oku li oshitopolwa sha simanenena shelongelokalunga lyashili. (Episalomi 22:22; 122:1) Ohatu tsaathana omukumo, uuna twa gongala pamwe. —  Aaroma 1:12.

19. Omolwashike wu na okuuvithila aantu oshili ndjoka wi ilonga mOmbiimbeli?

19 Ngele otwa hala tu longe shoka sha hokiwa kuJehova, otu na okuuvithila aantu. Otu na oku ya lombwela shoka twi ilonga mOmbiimbeli. Aantu oya gwililwa po kiinima iiwinayi mbyoka tayi ningwa kombanda yevi. (Hesekiel 9:4) Otashi vulika wu shi yamwe mboka ya gwililwa po kiinima mbyoka. Ya lombwela kombinga yonakuyiwa ombwanawa ndjoka twa tegelela. Kala ho yi kokugongala noho uvithile aantu oshili ndjoka yi li mOmbiimbeli. Ngele owe shi ningi, oto ka mona kutya ino pumbwa okuninga iinima yi na ekwatathano nelongelokalunga lyiifundja. Oto ka kala wa nyanyukwa. Jehova ota ka yambeka wo oonkambadhala dhoye sho to mu longele momukalo ngoka a hokwa. —  Maleaki 3:10.