Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 18

Mbela ondi na okwiiyapulila Kalunga nokuninginithwa?

Mbela ondi na okwiiyapulila Kalunga nokuninginithwa?

1. Epulo lini to vulu okwiipula sho wa konakona nawa embo ndika?

OWI ilonga iinima oyindji mOmbiimbeli, sho wa konakona embo ndika. Owi ilonga kombinga yomwenyo gwaaluhe ngoka tu uvanekelwa kuKalunga. Owi ilonga wo kutya oonakusa oye li monkalo yini nosho wo kutya oku na eyumuko. (Omuuvithi 9:5; Lukas 23:43; Johannes 5:28, 29; Ehololo 21:3, 4) Otashi vulika wa tameka okugongala pamwe nOonzapo dhaJehova. Owi itaala kutya ohadhi longele Kalunga momukalo ngoka a hokwa. (Johannes 13:35) Otashi vulika wa panga uukuume  wopothingo naJehova nowa tokola oku mu longela. Nonando ongawo, otashi vulika to ipula kutya ‘ondi na okuninga shike, opo ndi longele Kalunga?’

2. Omolwashike omulumentu gwokuEtiopia a li a tokola a ninginithwe?

2 Omulumentu gumwe gwokuEtiopia ngoka a li ko pethimbo lyaJesus osho a li i ipula ngawo. Konima yomimvo dhontumba sho Jesus a yumudhwa, omulongwa gwe, Filippus, okwa li u uvithile omulumentu ngoka. Okwa li e mu yelithile kutya Jesus oye Mesiasa. Omuetiopia okwa li a gumwa kwaashoka i ilongo. Okwa pula ta ti: “Tala! Omeya ogo ngaka, oshike tashi imbi ndje ndi ninginithwe?” —  Iilonga 8:26-36NW.

3. (a) Jesus okwa li a lombwele aalanduli ye a ti ngiini? (b) Omuntu oku na okuninginithwa ngiini?

3 Ombiimbeli oya popya kutya owu na okuninginithwa, ngele owa hala okulongela Jehova. Jesus okwa lombwele aalanduli ye a ti: “Indeni mu ka ninge aantu ayehe yomiigwana ayihe aalongwa yandje, mu ya ninginithe.” (Mateus 28:19, NW) Jesus okwa tula po oshiholelwa oshiwanawa, oshoka oye a ninginithwa tango. Okwa li a tulwa thiluthilu kohi yomeya, ihe ka li owala a shashwa omeya momutse. (Mateus 3:16, NW) Kunena uuna omuntu ta ninginithwa, oku na wo okutulwa thiluthilu kohi yomeya.

4. Uuna to ninginithwa, oho ulukile aantu shike?

4 Uuna to ninginithwa, oho ulukile aantu kutya owa hala lela okuninga kuume kaKalunga noku mu longela. (Episalomi 40:7, 8) Otashi vulika wi ipule kutya ‘ondi na okuninga shike, opo ndi ninginithwe?’

OWA PUMBWA ONTSEYO NEITAALO

5. (a) Oshike wa pumbwa okuninga tango, manga inoo ninginithwa? (b) Omolwashike wu na aluhe okukala pokugongala?

5 Owu na okutseya Jehova naJesus, manga inoo ninginithwa.  Owa tameka nale oku ya tseya, sho to konakona Ombiimbeli. (Lesha Johannes 17:3.) Inashi gwana owala okukala wu na ontseyo. Ombiimbeli otayi ti kutya owu na “okutseya” ehalo lyaJehova. (Aakolossa 1:9) Okukala ho gongala pamwe nOonzapo dhaJehova otaku ku kwathele wu kale wu na ekwatathano lyopothingo naJehova. Osha simana lela wu kale aluhe ho kala pokugongala. —  Aahebeli 10:24, 25.

Manga inoo ninginithwa, owu na okukonakona Ombiimbeli

6. Mbela otu na okutseya okanima kehe ke li mOmbiimbeli, opo tu ninginithwe?

6 Jehova ina tegelela wu kale wu shi okanima kehe ke li mOmbiimbeli, opo wu ninginithwe nawa. Ka li a tegelela omulumentu gwokuEtiopia a kale e shi kehe shimwe, opo a ninginithwe. (Iilonga 8:30, 31) Ombiimbeli oya ti kutya otatu ka tsikila okwiilonga kombinga yaJehova sigo aluhe. (Omuuvithi 3:11) Onkee ano, owu na okutseya omalongo gopetameko gOmbiimbeli noku ga tula miilonga, opo wu ninginithwe. —  Aahebeli 5:12.

7. Ekonakonombiimbeli olye ku kwathela ngiini?

7 Ombiimbeli otayi ti: “Kape na ngoka ta hokiwa kuKalunga, ngele ke na eitaalo.” (Aahebeli 11:6) Owa pumbwa okukala wu na eitaalo manga inoo ninginithwa. Ombiimbeli otayi ti kutya aantu yamwe yomuKorinto oyu uvu oohapu dhaKalunga ndhoka dha li tadhi uvithwa kaalanduli yaJesus. Konima “oyi itaale e taya ninginithwa.” (Iilonga 18:8, NW) Sha faathana, ekonakonombiimbeli otali ku kwathele wu kale wu na eitaalo momauvaneko gaKalunga. Otali ku kwathele wo wu kale wi itaala kutya eyambo lyaJesus otali vulu oku ku hupitha muulunde neso. —  Josua 23:14; Iilonga 4:12; 2 Timoteus 3:16, 17.

 LOMBWELA YALWE SHOKA WI ILONGA MOMBIIMBELI

8. Oshike tashi ke ku ningitha wu lombwele yalwe shoka wi ilonga?

8 Sho to ilongo oshindji mOmbiimbeli naasho to mono nkene tayi ku kwathele, eitaalo lyoye otali kolo. Oto ka kala wa hala okulombwela yalwe kombinga yaashoka to ilongo. (Jeremia 20:9; 2 Aakorinto 4:13) Mbela oolye wu na okulombwela?

Eitaalo lyoye nali ku inyengithe wu lombwele yalwe shoka wi itaala

9, 10. (a) Oolye tashi vulika wu tameke okulombwela shoka wi ilonga? (b) Oshike wu na okuninga, ngele owa hala okuuvitha pamwe negongalo?

9 Otashi vulika wu lombwele yaandjeni, ookuume koye, aashiinda nenge aaniilonga ooyakweni kombinga yaashoka wi ilonga. Uuna to shi ningi, shi ninga nombili nonohole. Konima yethimbo, oto ka kala wa gwana okuuvithila aantu pamwe negongalo. Ngele owu uvite kutya owa gwana okuuvitha, oto vulu okulombwela ngoka ha konakona Ombiimbeli nangoye. Mu lombwela kutya owa hala okutameka okuuvitha pamwe negongalo. Ngele naye oku wete kutya owa gwana, nonkalamwenyo yoye oyi li metsokumwe naashoka shi li mOmbiimbeli, otamu vulu okuya kaakuluntugongalo.

10 Aakuluntugongalo otaya ka kundathana nangoye ya tale ngele owu uvite ko nowi itaala omalongo gOmbiimbeli gopetameko. Otaya ka tala ngele oho vulika ngaa aluhe kwaashoka Ombiimbeli tayi ti. Otaya ka tala wo ngele owa hala shili okuninga Onzapo yaJehova. Dhimbulukwa kutya aakuluntugongalo ohaya tonatele iilyo ayihe yegongalo, nangoye wa kwatelwa mo. Ino kala we ya tila. (Iilonga 20:28; 1 Petrus 5:2, 3) Konima ngele aakuluntugongalo ya popi nangoye, otaye ke ku tseyithila ngele oto vulu okuuvitha pamwe negongalo.

11. Omolwashike wu na okuninga omalunduluko manga inoo tameka okuuvitha?

 11 Aakuluntugongalo otashi vulika ye ku yelithile kutya opu na natango omalunduluko gamwe ngoka wu na okuninga, manga inoo tameka okuuvitha. Omolwashike wu na oku ga ninga? Omolwaashoka uuna tatu uvithile yalwe kombinga yaKalunga, otu li aakalelipo ye. Otu na okukala hatu ihumbata momukalo ngoka tagu mu simanekitha. —  1 Aakorinto 6:9, 10; Aagalati 5:19-21.

ITEDHULULA E TO GALUKILE KUKALUNGA

12. Omolwashike tu na okwiitedhulula?

12 Opu na natango oshinima shimwe wu na okuninga manga inoo ninginithwa. Omuyapostoli Petrus okwa ti: “Itedhululeni, ne mu galukile kuKalunga, opo a dhime po oondjo dheni.” (Iilonga 3:19) Okwiitedhulula oshike? Okukala wu uvitile nayi oshinima sha puka shoka wa ninga. Pashiholelwa, ngele owa li ho hondele, owu na okwiitedhulula. Nonando owa kambadhala okuninga shoka shi li mondjila, owa pumbwa okwiitedhulula. Atuheni aalunde notwa pumbwa okupula Kalunga e tu dhimine po. —  Aaroma 3:23; 5:1.

13. Mbela ‘okugalukila kuKalunga’ okwa kwatela mo shike?

13 Mbela osha gwana owala okukala wu uvitile nayi oshinima sha puka shoka wa ninga? Aawe. Petrus okwa ti kutya natu “galukile kuKalunga.” Sha hala okutya, owu na okweetha po kehe shimwe sha puka shoka wa li ho ningi e to tameke okulonga shoka shi li mondjila. Natu shi thaneke. Natu tye ando oto yi kehala lyontumba oshikando shotango. Sho ngaa we ende ko okanano, owa dhimbulula kutya owa ya nondjila ya puka. Oto ka ninga po shike mbela? Oto ka tanauka wu ye nondjila ndjoka yu uka hoka wa hala. Sha faathana,  sho to konakona Ombiimbeli, oto ka mona kutya owa pumbwa okuninga omalunduluko gontumba. Kala aluhe wu na ehalo ‘lyokugalukila kuKalunga,’ mokuninga omalunduluko nokulonga shoka shi li mondjila.

IYAPULILA KALUNGA

Owu uvanekela ngaa Jehova kutya oto ke mu longela?

14. Omuntu ohi iyapulile ngiini Jehova?

14 Oshinima shilwe sha simana shoka wu na okuninga manga inoo ninginithwa, okwiiyapulila Jehova. Omuntu ohu uvanekele Jehova megalikano kutya oye awike a hala okulongela. Ohe mu lombwele wo kutya okwa hala okulonga ehalo lye, oko ku kale oshinima sha simanenena monkalamwenyo ye. —  Deuteronomium 6:15.

15, 16. Oshike hashi inyengitha omuntu i iyapulile Jehova?

15 Uuna to uvanekele Jehova kutya oye awike wa hala okulongela, owa fa to uvanekele omuntu ngoka wu hole kutya oto ka kala naye onkalamwenyo yoye ayihe. Dhiladhila owala nkene hashi kala uuna aantu taye endelathana. Sho omulumentu te ende ta tseya nawa omukiintu, ohole ye yoku mu hola ohayi koko. Oha kala nokuli a hala oku mu hokana. Nonando etokolo ndyoka olya kwata miiti, omulumentu oha kala a hala oku shi ninga, omolwohole.

16 Sho to tseya Jehova, oto ka kala wu mu hole nowa hala okuninga ngaashi to vulu wu mu longele. Shika otashi ke ku inyengitha wu mu uvanekele megalikano kutya owa hala oku mu longela. Ombiimbeli otayi ti kutya ngoka a hala okulandula Jesus, “ni idhimbwe ye mwene.” (Markus 8:34) Mbela shoka osha hala okutya ngiini? Owu na aluhe okupititha komeho okuvulika kuJehova. Shoka Jehova a hala wu ninge osho shi na oshilonga  shi vulithe omahalo nomalalakano goye. —  Lesha 1 Petrus 4:2.

INO KALA WA TILA OKUYONA

17. Omolwashike aantu yamwe haya kala ya tila okwiiyapulila Jehova?

17 Aantu yamwe ohaya kala ya tila okwiiyapulila Jehova. Ohaya kala ya tila kutya pamwe itaya ka gwanitha po euvaneko lyawo lyoku mu longela. Inaya hala oku mu yemateka. Otashi vulika yi ipopile kutya ngele inayi iyapulila Jehova, ite ke ya geela uuna ya ninga epuko.

18. Oshike tashi ku kwathele wu sinde uumbanda wokukala wa tila okuyemateka Jehova?

18 Ngele owu hole Jehova, oto ka vula okusinda uumbanda wokukala wa tila oku mu yemateka. Oto ka ninga ngaashi to vulu wu gwanithe po euvaneko lyoye, molwaashoka wu mu hole. (Omuuvithi 5:4; Aakolossa 1:10) Ito ka dhiladhila kutya oshidhigu okulonga ehalo lyaJehova. Omuyapostoli Johannes okwa ti: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” —  1 Johannes 5:3.

19. Omolwashike kuu na okukala wa tila okwiiyapulila Jehova?

19 Ino pumbwa okukala wa gwanenena, opo wi iyapulile Jehova. Ina tegelela tu ninge shoka itaatu vulu okuninga. (Episalomi 103:14) Ote ke ku kwathela wu longe shoka shi li mondjila. (Jesaja 41:10) Inekela Jehova nomutima gwoye aguhe, “nena oondjila dhoye ote dhi yelekanitha.” —  Omayeletumbulo 3:5, 6.

SHU ULIKA MONTANEHO

20. Onkatu yini to ka vula okukatuka ngele owi iyapulile Jehova?

20 Mbela owu uvite kutya owa gwana okwiiyapulila Jehova? Ngele owe shi ningi oto ka vula okukatuka onkatu ya landula ko yokuninginithwa.

21, 22. Ongiini to vulu ‘okuhempulula nokana’ koye eitaalo lyoye?

 21 Tseyithila omuunganeki gwolutu lwaakuluntugongalo megongalo lyeni kutya owi iyapulila Jehova nowa hala okuninginithwa. Ota ka lombwela aakuluntugongalo yontumba ya tale ngele owu uvite ko omalongo gopetameko. Ngele oya mono  kutya owa gwana okuninginithwa, otaye ku lombwele kutya oto vulu oku ka ninginithwa. Poshigongi mpoka to ka ninginithwa otapu ka gandjwa oshipopiwa shoka tashi fatulula kutya eninginitho oshike. Omupopi ota ka pula mboka taya ka ninginithwa omapulo gaali. Sho to yamukula omapulo ngoka, oto “hempulula nokana” koye eitaalo lyoye. —  Aaroma 10:10.

 22 Ngele shoka sha ningwa, oto ka ninginithwa. Oto ka tulwa thiluthilu kohi yomeya. Sho to ninginithwa oto ulukile aantu kutya owi iyapulila Jehova nowa ninga Onzapo ye.

ENINGINITHO OTALI THANEKE SHIKE?

23. Okuninginithwa “medhina lyaHe nolyOmwana nolyOmbepo Ondjapuki” otaku ti shike?

23 Jesus okwa ti kutya aalongwa ye oye na okuninginithwa “medhina lyaHe nolyOmwana nolyOmbepo Ondjapuki.” (Lesha Mateus 28:19.) Shoka osha hala okutya shike? Otashi ti kutya otu na okutaamba ko Jehova e li Omupangeli gwetu noshinakugwanithwa shoka Jesus e na mokugwanitha elalakano lyaJehova. Otu na wo okuuva ko nkene Kalunga ha longitha ombepo ye ondjapuki a gwanithe po ehalo lye. —  Eksodus 15:3; Mateus 28:18; Aagalati 5:22, 23; 2 Petrus 1:21

Uuna to ninginithwa, oho ulukile aantu kutya owa hala okulonga ehalo lyaKalunga

24, 25. (a) Eninginitho otali thaneke shike? (b) Oshike tatu ka kundathana montopolwa yahugunina??

24 Eninginitho otali thaneke oshinima sha simanenena. Uuna to ninginithwa kohi yomeya otashi ti kutya owe etha po thiluthilu onkalamwenyo yoye yonale. Sho to zi kohi yomeya otashi ti kutya ngashingeyi owa tameka onkalamwenyo ompe yokulonga ehalo lyaKalunga. Otashi ulike kutya oto ka longela Jehova sigo aluhe. Dhimbulukwa kutya owi iyapulila Jehova, ihe haantu, ehangano nenge iilonga yontumba.

25 Eninginitho otali ke ku kwathela wu hedhe popepi lela naKalunga. (Episalomi 25:14) Ito ka hupithwa owala, molwaashoka wa ninginithwa. Omuyapostoli Paulus okwa ti: “Kaleni tamu longo nokutila nokukakama molwehupitho lyeni.” (Aafilippi 2:12) Eninginitho etameko owala lyokulongela Jehova. Mbela ongiini to vulu okuhedha popepi naJehova? Ontopolwa yahugunina yembo ndika otayi ka yamukula epulo ndika.