Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 9

Mbela ehulilo oli li popepi?

Mbela ehulilo oli li popepi?

1. Openi tatu vulu okwiilonga kombinga yonakuyiwa?

MBELA opu na oshikando shimwe wa li to tala otiivi nenge to pulakene oonkundana koradio, e to ipula to ti: ‘Ano uuyuni mbuno owu uka peni?’ Muuyuni omu udha iinima oyindji yinyanyalitha, naantu yamwe oye wete kutya uuyuni owu li popepi nokuhula po. Mbela shono oshoshili? Mbela opu na sha shono tashi tu ulukile kutya oshike tashi ka ningwa monakuyiwa? Eeno. Nonando aantu itaya vulu okutengeneka shoka tashi ka ningwa po, Jehova ota vulu. Okwe tu lombwela mOmbiimbeli kombinga yonakuyiwa yetu noyevi. —  Jesaja 46:10; Jakob 4:14.

2, 3. Aalongwa yaJesus oya li ya hala okutseya shike, na Jesus okwa li e ya yamukula ngiini?

2 Uuna tatu lesha mOmbiimbeli kombinga yehulilo lyuuyuni, itashi ti kutya evi lyo lyene olyo tali ka hulithwa po, ihe aakolokoshi oyo owala taya ka hulithwa po. Jesus okwa longa aantu kutya Uukwaniilwa waKalunga otawu ka pangela evi alihe. (Lukas 4:43) Aalongwa yaJesus oya li ya hala okutseya kutya Uukwaniilwa waKalunga otawu tameke okupangela uunake. Onkee ano, oya pula Jesus ya ti: “Uunake ano tashi ka ningwa, nendhindhiliko olini tali holola, uuna to ya nehulilo lyuuyuni?” (Mateus 24:3) Jesus ka li e ya lombwela kutya uunake. Okwe ya lombwele shoka tashi ka ningwa po manga ehulilo inaali ya. Shoka Jesus e ya lombwele otashi gwanithwa pethimbo lyetu.

3 Montopolwa ndjika otatu ka kundathana shoka tashi ulike kutya ehulilo lyuuyuni oli li popepi. Tango, otwa pumbwa  okwiilonga kombinga yiita mbyoka ya li megulu. Shoka tashi tu kwathele tu uve ko kutya omolwashike iinima iiwinayi tayi ningwa kombanda yevi kunena.

IITA MBYOKA YA LI MEGULU

4, 5. (a) Oshike sha li sha ningwa po megulu, sho Jesus a ningi Omukwaniilwa? (b)  Ngaashi sha popiwa mEhololo 12:12, oshike sha li sha ningwa po, sho Satana u umbilwa kombanda yevi?

4 MOntopolwa 8 otwi ilonga mo kutya Jesus okwa ningi Omukwaniilwa megulu momumvo 1914. (Daniel 7:13, 14) Ombiimbeli otayi tu lombwele mEhololo shoka sha li sha ningwa po. Otayi ti: “Megulu omwa tukuluka olugodhi. Mikael [nenge Jesus] naayengeli ye oya kondjitha oshikoko [Satana] pamwe naayengeli yasho.” * Satana noompwidhuli dhe oya sindika, noyu umbilwa kombanda yevi. Aayengeli oya li ya nyanyukwa. Mbela aantu kombanda yevi oya li taya ka kala monkalo ya tya ngiini? Ombiimbeli otayi ti kutya oya li taya ka kala methimbo edhigu. Mbela omolwashike ya tile ngawo? Omolwaashoka Satana oku udha ondjahi, “sho e shi shi kutya oku na ko ashike okathimbo okafupi kowala.” —  Ehololo 12:7, 9, 12.

5 Satana ota ningi ngaashi ta vulu, opo e etithe omaupyakadhi ogendji kombanda yevi. Okwa geya molwaashono oku shi kutya oku na ko okathimbo okafupi, opo a hanagulwe po kuKalunga. Natu konakoneni shoka tashi ningwa po momasiku gahugunina. —  Tala eyelitho eti-24.

OMASIKU GAHUGUNINA

6, 7. Jesus okwa popi shike kombinga yiita nondjala pethimbo lyetu?

6 Iita. Jesus okwa ti: ‘Iigwana otayi ka thikama okukondjithathana niilongo otayi ka matukilathana.’ (Mateus 24:7) Aantu oyendji oya dhipagelwa miita pethimbo  lyetu, ye vulithe pwaamboka ya dhipagelwa mo omimvo dha ka pita. Olopota yimwe ya za kehangano ndyoka hali konakona iiningwanima yomuuyuni, oyu ulika kutya okuza mo 1914, miita omwa dhipagelwa aantu ye vulithe poomiliyona 100. Omuyalu gwaantu mboka ya sile miita momukokomoko gwomimvo 100, okuza mo 1900 sigo 2000, ogwa li gu vule lutatu omwaalu gwaamboka ya sile miita momukokomoko gwomimvo 1 900 dha ka pita. Dhiladhila koluhodhi nokuuwehame mboka aantu omamiliyona haya kala yu uvite omolwiita.  

7 Ondjala. Jesus okwa ti: “Otaku ke ya oondjala.” (Mateus 24:7) Nonando opu na iikulya oyindji shi vulithe nale, natango aantu oyendji onkene ngaa taya si ondjala. Omolwashike mbela? Omolwaashono kaye na iimaliwa ya gwana yokulanda iikulya, mo momapya ihamu zi sha. Aantu ye vulithe pobiliyona yimwe ohaya hupu miimaliwa iishona lela esiku kehe. Ehangano lyUundjolowele mUuyuni olya ti kutya aanona omamiliyona ohaya si kondjala omumvo kehe.

8, 9. Oshike tashi ulike kutya shoka Jesus a hunganeka kombinga yomakakamo gevi nomikithi osha gwanithwa?

 8 Omakakamo gevi. Jesus okwa li a hunganeke kutya “otaku ke ya omakakamo gevi omatilithi.” (Lukas 21:11) Ohapu ningwa omakakamo gevi ogendji omumvo kehe. Okuza momumvo 1900, aantu ye vulithe pomamiliyona gaali oya sila momakakamo gevi. Nonando opu na iikwamashina mbyoka hayi vulu okumona kutya ekakamo lyevi oli li pokuningwa, aantu oyendji onkene ngaa taya sile mo. 

9 Omikithi. Jesus okwa li a hunganeke kutya otaku ke ya omikithi omidhipagi nenge ‘omalega.’ Otadhi ka taandela nziya notadhi ka dhipaga aantu oyendji. (Lukas 21:11) Nonando oondohotola odhi ilonga nkene dhi na okupanga omikithi odhindji, opu na natango omikithi odhindji kaadhi na epango. Olopota yimwe oya ti kutya omumvo kehe, aantu omamiliyona ohaya si komikithi ngaashi: o-TB, omalaria nokolera. Momukokomoko gwomimvo 40 dha ka pita, oondohotola odha mona omikithi omipe dhi vulithe po 30. Dhimwe dhomudho kadhi na epango.

 IIKALA YAANTU MOMASIKU GAHUGUNINA

10. MuTimoteus omutiyali 3:1-5, omwa popiwa kutya aantu otaya ka kala ya tya ngiini momasiku gahugunina?

10 MuTimoteus omutiyali 3:1-5, Ombiimbeli oya ti kutya ‘momasiku gahugunina, otaku ke ya omathimbo omadhigu.’ (OB-1954) Omuyapostoli Paulus okwa li a popi kutya aantu otaya ka kala ya tya ngiini, momasiku gahugunina. Okwa ti kutya aantu otaya ka kala

  • yi ihole yo yene

  • ye hole eliko

  • ihaaya vulika kaakuluntu

  • ihaaya pandula

  • kaaye na olukeno nohenda

  • ihaaya yawala

  • aapwidhi naadhudhu

  • ye hole iihulo pehala lyokuhola Kalunga

  • hayi iningitha ya fa ye hole Kalunga, ihe ihaya vulika kuye

11. Ngaashi sha popiwa mEpisalomi 92:7, oshike tashi ka ningilwa aakolokoshi?

11 Mbela aantu osho ye li ngawo shili? Eeno, osho ye li ngaaka muuyuni awuhe, ihe Kalunga ote ke ya katukila onkatu masiku. Oku uvaneka ta ti: “Aakaanakalunga nando naa kale muulinawa ya fa  omwiidhi omutalala, aakolokoshi nando naa hupe nawa, ayehe otaa ka dhimwa po thilu.” —  Episalomi 92:7.

ONKUNDANA OMBWANAWA MOMASIKU GAHUGUNINA

12, 13. Jehova okwe tu longa shike?

12 Ombiimbeli oya hunganeka kutya momasiku gahugunina, muuyuni otamu ka kala mu udha iinima iiwinayi nokumona iihuna. Oya ti wo kutya otamu ka kala iinima iiwanawa tayi ningwa.

“Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” —  Mateus 24:14

13 Ontseyo yOmbiimbeli. Omupolofeti Daniel okwa popi shoka tashi ka ningwa momasiku gahugunina a ti: ‘Ontseyo otayi ki indjipala.’ (Daniel 12:4) Jehova ota ka kwathela aantu ye ya tseye Ombiimbeli nawa shi vulithe nale. Jehova okwa kala te shi ningi, unene tuu okuza mo 1914. Pashiholelwa, okwe tu longa kutya omolwashike edhina lye lya simana. Okwe tu longa kombinga yelalakano lye li na ko nasha nevi nosho wo kombinga yekulilo. Okwe tu longa kutya ohatu yi peni ngele twa si nosho wo kombinga yeyumuko. Otwi ilonga kutya Uukwaniilwa waKalunga owo owala tawu ka kandula po omaupyakadhi getu agehe. Otwi ilonga wo kutya oshike tashi vulu oku tu etela enyanyu nankene tatu vulu okunyanyudha Jehova. Mbela ontseyo ayihe ndjoka, otwe yi pungula owala? Aawe. Opu na ishewe ehunganeko lilwe ndyoka tali yamukula epulo ndyoka. —  Tala eyelitho eti-21 neti-25.

14. Onkundana ombwanawa yUukwaniilwa otayi uvithilwa peni, notayi uvithwa koolye?

14 Iilonga yokuuvitha muuyuni awuhe. Jesus okwa li a popi kutya momasiku gahugunina, “elaka etoye lyOshilongo otali ka uvithilwa aantu ayehe.” (Mateus 24:3, 14) Onkundana ombwanawa yOshilongo nenge yUukwaniilwa otayi uvithwa miilongo yi vulithe 230 nomomalaka ge vulithe po 700. Oonzapo dhaJehova dha za ‘momihoko adhihe nomiigwana ayihe,’ ohadhi uvithile aantu  muuyuni awuhe. Ohadhi ya kwathele ya tseye kutya Uukwaniilwa waKalunga oshike naashoka tawu ka ningila aantu. (Ehololo 7:9) Ohadhi shi ningi nokuli oshali. Oonzapo odhi tondike nohadhi hepekwa koyendji, ihe inadhi etha okuuvitha. Natango, otadhi uvithile aantu, ngaashi naanaa Jesus a li a hunganeka. —  Lukas 21:17.

OTO KA NINGA PO SHIKE?

15. (a) Owi itaala ngaa shili kutya otu li momasiku gahugunina, nomolwashike? (b) Oshike tashi ka ningilwa mboka haya vulika kuJehova, naamboka ihaaya vulika kuye?

15 Mbela owi itaala ngaa shili kutya otu li momasiku gahugunina? Omahunganeko ogendji ngoka ga popiwa mOmbiimbeli kombinga yomasiku gahugunina, otaga gwanithwa. Masiku Jehova ota ka hulitha po iilonga yokuuvitha onkundana ombwanawa, opo “ehulilo” lyuuyuni li ye. (Mateus 24:14) Mbela ehulilo oshike? Olyo iita yaArmagedon mbyoka Kalunga ta ka longitha, opo a hanagule po uukolokoshi awuhe. Ota ka longitha Jesus naayengeli ye aanankondo, ya hanagule po kehe ngoka inaa hala okuvulika kuYe nokOmwana. (2 Aatessalonika 1:6-9) Ngele shoka sha ningwa, Satana noompwidhuli dhe, itaya ka vula we okupukitha aantu. Ayehe mboka haya vulika kuKalunga noya hala oku ka pangelwa kUukwaniilwa we, otaya ka mona nkene omauvaneko gaKalunga agehe taga gwanithwa. —  Ehololo 20:1-3; 21:3-5.

16. Sho ehulilo li li popepi, oshike wa pumbwa okuninga po?

16 Uuyuni mbuka tawu pangelwa kuSatana owu li popepi nokuhanagulwa po. Onkee ano, osha simana wi ipule kutya ‘ondi na okuninga po shike?’ Jehova okwa hala wi ilonge oshindji okuza mOmbiimbeli. Kala wi itula mo sho to yi konakona. (Johannes 17:3) Oonzapo dhaJehova ohadhi gongala oshiwike kehe. Pokugongala mpoka aantu ohaya kwathelwa yu uve ko Ombiimbeli. Kambadhala wu kale ho gongala pamwe nadho pandjigilile. (Lesha Aahebeli 10:24,  25.) Ngele owa mono kutya owa pumbwa okuninga omalunduluko, ino kakadhala oku ga ninga. Uuna to shi ningi, oto ka kala wu na uukuume wopothingo naJehova. —  Jakob 4:8.

17. Omolwashike aantu oyendji taya ka kala ya kumwa, uuna ehulilo tali ya?

17 Omuyapostoli Paulus okwa popi kutya aakolokoshi otaya ka hanagulwa po pethimbo mpoka aantu oyendji inaaye shi tegelela. Otashi ka ningwa ngaashi ‘omufuthi te ende uusiku.’ (1 Aatessalonika 5:2) Jesus okwa hunganeka kutya aantu oyendji otaye ki ipwililikila iinima mbyoka tayi ulike kutya otu li momasiku gahugunina. Okwa ti: “Ngaashi sha li pethimbo lyaNoa, osho tuu taku ka kala, uuna Omuna gwOmuntu te ya [nenge momasiku gahugunina]. Ngaashi aantu ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noa a yi monguluwato, yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya.” —  Mateus 24:37-39.

18. Jesus okwe tu londodha a ti ngiini?

18 Jesus okwe tu londodha kutya inatu etha omadhiladhilo getu ‘ga luudhikwe kiituthi, kuunkolwi nokiimpwiyu yopauyuni.’ Okwa ti kutya, ehulilo “otali ya ongomwigo,” sha hala okutya, otali ya ombaadhilila. Okwa ti wo kutya ‘otali akele aantu ayehe kombanda yevi alihe.’ Okwe tu londodha ta ti: “Tonateni, ne mu galikane ethimbo kehe, mu mone oonkondo dhoku mu pititha mumbika ayihe tayi ka ningwa, nokuthikama koshipala shOmuna gwOmuntu.” (Lukas 21:34-36) Omolwashike twa pumbwa okupulakena kelondodho lyaJesus? Omolwaashono masiku uuyuni waSatana otawu ka hanagulwa po. Mboka ya hokiwa kuJehova naJesus oyo owala taya ka hupa pehulilo lyuuyuni. Yo oyo owala taya ka kala sigo aluhe muuyuni uupe. —  Johannes 3:16; 2 Petrus 3:13.

^ okat. 4 Edhina limwe lyaJesus Kristus, oMikael. Opo wu mone uuyelele owundji, tala eyelitho eti-23..

Tseya oshindji

OSHUNGOLANGELO

“Ehulilo” oshike?

Mbela owa ndhindhilika ngaa kutya Ombiimbeli otayi popi kutya “ehulilo” oli li onkundana ombwanawa?