Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Ombiimbeli otayi tu longo shike?

 ONTOPOLWA 7

Aasi otaya ka yumuka

Aasi otaya ka yumuka

1-3. Atuheni otwa taalelwa koshike, naJehova ote ke tu mangulula ngiini?

NATU tye ando owa tokolelwa ondholongo yonkalamwenyo ayihe, molwoshinima shoka inoo ninga. Onkalamwenyo yoye otayi monika ya fa yaa na we ekwatho lyasha, noku na sho to vulu okuninga po. Ohaluka, opwe ya omuntu ngoka a hala oku ku mangulula. Oto ka kala wu uvite ngiini?

2 Atuheni otwa taalelwa keso. Kashi na nduno mbudhi kutya otu ninge shike, itatu vulu oku li henuka. Jehova oye awike e na oonkondo dhoku tu mangulula. Oku uvaneka kutya “omutondi gwahugunina e na okusindwa, oye eso.” — 1 Aakorinto 15:26.

3 Mbela ito ka kala tuu wa pepelelwa, sho itoo ki ipula we neso? Jehova ita ka kutha po owala eso, ihe ota ka yumudha wo oonakusa. Mbela shono itashi ke ku nyanyudha tuu? Oku uvaneka kutya “mboka ya sa nale” otaya ka kala ishewe nomwenyo. (Jesaja 26:19) Shika osho tashi popiwa mOmbiimbeli shi li eyumuko.

UUNA WA SILWA

4. (a) Ngele omukwanezimo nenge kuume ketu a hulitha, oshike tashi vulu oku tu hekeleka? (b) Oolye ya li ookuume kaJesus kopothingo?

4 Uuna omukwanezimo nenge kuume ketu a hulitha, ohatu kala twa nika oluhodhi noonkondo. Ohatu kala twa teka omukumo, ihe katu na shoka tatu vulu okuninga po, tu mu galulile momwenyo. Ombiimbeli otayi tu pe ehekeleko lyashili. (Lesha 2 Aakorinto 1:3, 4.) Natu  taleni oshiholelwa shimwe shoka tashi ulike kutya Jehova naJesus oya hala okuyumudha aaholike yetu. Sho Jesus a li kombanda yevi, okwa li aluhe ha talele po Lasarus naamwayina ye, Marta naMaria. Ayehe oya li ookuume kaJesus kopothingo. Ombiimbeli otayi ti: “Jesus okwa li e hole Marta, Maria naLasarus.” — Johannes 11:3-5.

5, 6. (a) Jesus okwa li i inyenge ngiini, sho a mono aakwanezimo nookuume kaLasarus ya nika oluhodhi? (b) Omolwashike tashi hekeleke okutseya nkene Jesus ha kala u uvitile eso?

5 Sho Lasarus a si, Jesus okwa yi a ka hekeleke Marta naMaria. Marta sho u uvu kutya Jesus ote ya kuyo, okwa yi e ke mu tsakaneke. Okwa li a nyanyukwa sho a mono Jesus, ihe okwa ti kuye: “Omuwa, ando owa li po, ando omumwameme ina sa.” Marta okwa li u uvite kutya Jesus ita vulu okukwathela Lasarus. Konima yaashono, Jesus okwa mono Maria ta lili. Sho a mono nkene ya nika oluhodhi okwa hendwa komwenyo, e ta lili. (Johannes 11:21, 33, 35) Okwa li a nika oluhodhi ngaashi naanaa hatu kala tu uvite, uuna twa silwa.

6 Ohashi tu hekeleke okukala tu shi kutya Jesus naye oha kala u uvite ngaashi naanaa hatu kala tu uvite, uuna twa silwa. Okwa fa He, Jehova, ngoka naye ha kala u uvite ngawo. (Johannes 14:9) Jehova oku na oonkondo dhokuhulitha po eso sigo aluhe, note ke shi ninga masiku.

“LASARUS, ZA MO!”

7, 8. Omolwashike Marta a li inaa hala emanya li kuthwe po pombila yaLasarus, ihe Jesus okwa li a ningi po shike?

7 Sho Jesus a thiki pombila yaLasarus, posheelo opwa li pwe edhilwa nemanya enene. Jesus okwa lombwele aantu ta ti: “Kuthii po emanya!” Marta ka li a hala aantu  ye shi ninge, oshoka Lasarus okwa adhika a ninga omasiku gane a sa. (Johannes 11:39) Ka li e shi kutya Jesus okwa hala okuninga po sha, a kwathele omumwayina.

Dhiladhila owala kenyanyu ndyoka aakwanezimo nookuume kaLasarus ya li ye na, sho a yumudhwa! — Johannes 11:38-44

8 Jesus okwa ti kuLasarus: “Za mo!” Marta naMaria oya li ya kuminwa shoka ya mono. “Lasarus, ngoka a li a sa, okwa zi mo. Oompadhi dhe nomaako ge oya li ya mangwa nomalapi.” (Johannes 11:43, 44) Lasarus okwa li a yumudhwa! Okwa li ishewe e li pamwe naakwanezimo ye nookuume ke. Oya li taya popi naye, yo taye mu minike noku mu papatela. Shino osha li oshikumithalonga sho Jesus a yumudha Lasarus!

“MUKADHONA, OTANDI KU LOMBWELE, PENDUKA PO!”

9, 10. (a) Olye a pe Jesus oonkondo dhokuyumudha aantu? (b) Omolwashike o2345mahokololo gaamboka ya yumudhwa ge na oshilonga kutse?

9 Mbela Jesus okwa li ha yumudha aantu koonkondo dhe mwene? Aawe. Manga inaa yumudha Lasarus, okwa li a galikana kuJehova. Jehova okwe mu pe oonkondo dhoku shi ninga. (Lesha Johannes 11:41, 42.) Lasarus haye awike a li a yumudhwa. Ombiimbeli otayi popi kombinga yokakadhona komimvo 12 hoka ka li epona, noka li taka ehamenene. He ya ko Jairus, okwa li a lulilwa, nokwi indile Jesus e ka aludhe. Manga ta popi naJesus, opwe ya aalumentu yamwe noya ti: “Okamwoye okakadhona ka mana oondjenda. Oto monithile we shike Muhongi iihuna?” Jesus okwa ti kuJairus: “Ino tila, itaala owala.” Okuza mpono, oya yi pamwe kegumbo lyaJairus. Sho ye li pokuthika, Jesus okwa li e wete noku uvite aantu sho taya lili. Okwe ya lombwele a ti: “Inamu lila, omukadhona ina sa, ihe okwa kotha.” Otashi vulika aavali yokanona ya li tayi ipula kutya Jesus okwa  hala okutya ngiini. Jesus okwa lombwele aantu ya ye pondje, nokwa yi pamwe naavali mondunda moka mwa lala okanona. Okwa kwata okanona koshikaha, e ta ti: “Mukadhona, otandi ku lombwele, penduka po!” Aavali yokanona oya li ya nyanyukwa sho ka thikama e taka tameke okweenda. Jesus okwa li a yumudha okanona kawo. (Markus 5:22-24, 35-42; Lukas 8:49-56) Okuza kesiku ndyoka, oya kala haya dhimbulukwa shoka Jehova e ya ningila okupitila muJesus, uuna taya tala okamwanakadhona kawo. *

10 Aantu mboka ya li ya yumudhwa kuJesus, oya ka sa ishewe. Omahokololo ngoka hatu lesha kombinga yawo oge na oshilonga, oshoka otage tu pe etegameno. Jehova okwa hala oku ka yumudha aantu, note ke shi ninga.

OSHIKE TATU ILONGO MOMAHOKOLOLO GAAMBOKA YA YUMUDHWA?

Omuyapostoli Petrus okwa li a yumudha omukiintu Omukriste Dorkas. — Iilonga 9:36-42

Elia okwa li a yumudha okamwanamati komuselekadhi. — 1 Aakwaniilwa 17:17-24

11. Omuuvithi 9:5 otayi tu longo shike kombinga yonkalo moka mwa li Lasarus?

11 Ombiimbeli otayi tu lombwele kutya ‘aasi inaa tseya sha nando.’ Lasarus sho a si, omo a li monkalo ndjoka. (Omuuvithi 9:5) Ngaashi naanaa Jesus a popi, Lasarus okwa li a fa a kotha. (Johannes 11:11) Sho Lasarus a li mombila, ka li a “tseya sha nando.”

12. Otu shi shi ngiini kutya Lasarus okwa li a yumudhwa shili?

12 Aantu oyendji oya li ya mono, sho Jesus ta yumudha Lasarus. Aatondi yaJesus nayo oya li ye mu mono, sho a longo oshikumithalonga shoka. Lasarus okwa li  e na omwenyo, naashoka oshu ulike kutya okwa li a yumudhwa shili. (Johannes 11:47) Aantu oyendji oya li wo ye ya okutalela po Lasarus. Shoka oshe ya ningitha yi itaale kutya Jesus okwa tumwa shili kuKalunga, ihe aatondi yaJesus kaya li ye shi panda. Onkee ano, oya ningi ompangela ya dhipage Jesus naLasarus. — Johannes 11:53; 12:9-11.

13. Omolwashike tatu vulu okukala nuushili kutya Jehova ota ka yumudha oonakusa?

13 Jesus okwa ti kutya “oonakusa ayehe mboka ye li moombila” otaa ka yumuka. (Johannes 5:28) Shino otashi ti kutya ayehe mboka Jehova ta ka dhimbulukwa, ote ke ya yumudha. Opo Jehova a yumudhe omuntu, oku na okudhimbulukwa okanima kehe kombinga ye. Mbela ota vulu ngaa oku shi ninga shili? Eeno. Ngele tatu tala kegulu, oku na oonyothi omabiliyona ogendji. Ombiimbeli otayi ti kutya Jehova oonyothi adhihe oku dhi shi komadhina. (Lesha Jesaja 40:26.) Ngele ota vulu okudhimbulukwa edhina lyonyothi kehe, mbela otashi ka kala ngaa oshidhigu kuye okudhimbulukwa aantu mboka ta ka yumudha? Jehova oye Omushiti gwiinima ayihe. Onkee ano, otu shi shi nawa kutya ota vulu okuyumudha aantu.

14, 15. Oohapu dhaJob otadhi tu ulukile kutya Jehova okwa halelela okuninga shike?

14 Omupiya omudhiginini Job, okwa li itaala meyumuko. Okwa li a pula kutya “omuntu ngele okwa si, ota kala ishewe e na omwenyo?” Okwa li a lombwele Jehova a ti: “Oto ka ithana ndje notandi ku itaale; oto ka yuulukwa omushitwa gwoye.” Job okwa li e shi shi kutya Jehova okwa halelela oku ka yumudha oonakusa. — Job 14:13-15.

 15 Oho kala wu uvitile ngiini etegameno lyeyumuko? Otashi vulika wi ipule kutya ‘mbela aakwanezimo yandje nookuume kandje mboka ya sa, otaya ka yumuka ngaa?’ Otashi tu hekeleke shili okukala tu shi kutya Jehova okwa halelela okuyumudha oonakusa. Natu taleni shoka Ombiimbeli tayi ti kombinga yaamboka taya ka yumudhwa naampoka taya ka kala.

OTAYA KA ‘UVA EWI LYE, NOTAA KA ZA MO’

16. Mboka taya ka yumudhilwa kombanda yevi, otaya ka nyanyukilwa onkalamwenyo ya tya ngiini?

16 Mboka ya yumuka nale, oya li pamwe naanegumbo nookuume kawo kombanda yevi. Shika otashi ka ningwa wo nomonakuyiwa, ihe otashi ka kala oshiwanawa unene shi vulithe po. Omolwashike mbela? Mboka taya ka yumudhwa, otaya ka kala ye na ompito yokukala nomwenyo sigo aluhe kombanda yevi, itaaya si we. Otaya ka kala nokuli muuyuni uupe mboka inaawu fa mbuka tu li. Itamu ka kala iita, omiyonena naantu itaye ke ehama we.

17. Oolye taya ka yumudhwa?

17 Oolye taya ka yumudhwa? Jesus okwa ti: ‘Ayehe mboka ye li moombila, otaa ka uva ewi lye. Yo notaa ka za mo moombila dhawo.’ (Johannes 5:28, 29) Ehololo 20:13 otayi ti: “Efuta olya gandja aasi mboka ya sile mulyo. Eso noshaasi oya gandja wo aasi mboka ya li mo.” Shika otashi ulike kutya aantu omabiliyona otaya ka kala nomwenyo. Omuyapostoli Paulus okwa popi wo kutya aantu ayehe ‘aayuuki naalunde,’ otaya ka yumudhwa. (Lesha Iilonga 24:15, OB-1954.) Mbela shino osha hala okutya ngiini?

MOparadisa, oonakusa otaya ka yumudhwa ya ka kale pamwe naaholike yawo

18. ‘Aayuuki’ mboka taya ka yumudhwa oyeni?

18 ‘Aayuuki’ oya kwatela mo aapiya yaJehova aadhiginini  mboka ya li ko manga Jesus inee ya kombanda yevi. Aantu ngaashi Noa, Abraham, Sara, Moses, Rut naEster otaya ka yumudhwa ya ka kale nomwenyo kombanda yevi. Oto vulu okulesha kombinga ya yamwe yomuyo mAahebeli ontopolwa 11. Ongiini kombinga yaapiya yaJehova aadhiginini mboka taya si pethimbo lyetu? Nayo wo ‘aayuuki,’ onkee ano, otaya ka yumuka.

19. ‘Aalunde’ oyo olye? Jehova ote ke ya pa ompito yashike?

 19 ‘Aalunde’ oya kwatela mo aantu omabiliyona mboka ya sa inaaya mona ompito yokutseya Jehova. Nonando oya sa, Jehova ine ya dhimbwa. Ote ke ya yumudha, opo ya mone ompito yokulongwa, yo ye mu tseye noku mu longela.

20. Mbela kehe gumwe ngoka a sa ota ka yumuka?

20 Mbela shino osha hala okutya kehe gumwe ngoka a sa ota ka yumuka? Hasho nando. Jesus okwa ti kutya aantu yamwe itaya ka yumuka. (Lukas 12:5) Olye ta ka tokola ngele omuntu gwontumba ota ka yumuka nenge hasho? Jehova oye Omupanguli omunene, ihe ota ka langeka po Jesus “a ninge omupanguli gwaanamwenyo naasi.” (Iilonga 10:42) Omukolokoshi kehe inaa hala okulundulula, uuna a si ita ka yumudhwa. — Tala eyelitho eti-19.

MBOKA TAYA KA YUMUDHWA YA KA KALE MEGULU

21, 22. (a) Mboka taya ka yumudhwa ya ka kale megulu, otaya ka kala ye na omalutu ga tya ngiini? (b) Olye omuntu gwotango a yumudhwa a ka kale nomwenyo megulu?

21 Ombiimbeli otayi tu lombwele wo kutya aantu yamwe otaya ka kala megulu. Mboka taya ka yumudhwa ya ka kale megulu, itaya ka kala ye na omalutu gopanyama. Otaya ka yumudhwa ye li iishitwa yopambepo.

22 Jesus oye omuntu gwotango a yumudhwa a ka kale megulu. (Johannes 3:13) Konima yomasiku gatatu sho Jesus a dhipagwa, Jehova okwe mu yumudha. (Episalomi 16:10; Iilonga 13:34, 35) Jesus ka li a yumudhwa nolutu lwopanyama. Omuyapostoli Petrus okwa popi kutya Jesus “okwa dhipagwa palutu nokwa tulwa omwenyo pambepo.” (1 Petrus 3:18) Jesus okwa li a yumudhwa e li omushitwa gwopambepo omunankondo.  (1 Aakorinto 15:3-6) Ombiimbeli oya ti kutya haye awike a li ta ka yumudhwa nolutu lwopambepo.

23, 24. Oolye ye li “oshigunda oshishona,” noye li yangapi?

23 Manga Jesus inaa sa, okwa li a lombwele aalongwa ye aadhiginini a ti: “Otandi ke mu longekidhila ehala.” (Johannes 14:2) Shino otashi ti kutya yamwe yomaalongwa ye otaya ka yumudhwa ya ka kale megulu. Mbela oye li yangapi? Jesus okwa ti kutya oye li omwaalu omushona, ano “oshigunda oshishona.” (Lukas 12:32) Omuyapostoli Johannes okwa popi omwaalu gwawo sho a mono Jesus a thikama kondundu yaSion megulu. Okwa ti: “Pamwe nOnzigona okwa li aantu 144 000.” — Ehololo 14:1.

24 Aantu mboka 144 000, otaya ka yumudhwa uunake? Ombiimbeli oye tu lombwela kutya shika otashi ka ningwa ngele Kristus a tameke okupangela megulu. (1 Aakorinto 15:23) Ngashingeyi Jesus ota pangele nale, noyendji yomaantu 144 000, oya yumudhwa nale ya ka kale megulu. Mboka ye li natango kombanda yevi naamboka taya si pethimbo lyetu, ohaya yumudhwa yu ukilila megulu pethimbo mpoka. Aantu oyendji mboka taya ka yumudhwa monakuyiwa, otaya ka kala mOparadisa kombanda yevi.

25. Oshike tatu ki ilonga montopolwa tayi landula?

25 Masiku Jehova ota ka mangulula aantu muupika weso, neso otali ka hanagulwa po sigo aluhe. (Lesha Jesaja 25:8.) Mbela mboka taya yi megulu otaya ka ninga mo shike? Ombiimbeli oya popya kutya otaya ka pangela pamwe naJesus mUukwaniilwa waKalunga. Otatu ki ilonga oshindji kombinga yUukwaniilwa mboka montopolwa tayi landula.

^ okat. 9 MOmbiimbeli omu na wo omahokololo galwe gaantu mboka ya yumudhwa, kutya nduno aagundjuka nenge aakokele, aalumentu nenge aakiintu, Aaisraeli naamboka kaaye shi Aaisraeli. Oto vulu okuga lesha mAakwaniilwa yotango 17:17-24; mAakwaniilwa aatiyali 4:32-37; 13:20, 21; muLukas 7:11-17; 8:40-56 nomIilonga 9:36-42; 20:7-12.