Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Natu holeleni eitaalo lyawo

 ONTOPOLWA 17

Tala, “ongame omuntu gwOmuwa”!

Tala, “ongame omuntu gwOmuwa”!

1, 2. (a) Omuyendanandjila okwa li a popitha Maria ngiini? (b) Etokolo lini Maria a li e na okuninga, nolya li tali ka lundulula ngiini onkalamwenyo ye?

MARIA okwa li a kumwa sho a mono omuyenda te ya megumbo lyaandjawo. Ka li e ya okutalela po he nenge yina, ihe okwa li omuyenda gwe. Okwa li e na uushili kutya ina za muNasareti. Aayendanandjila ohaya dhimbululwa nuupu muulando uushona ngaashi kawo. Omutalelipo nguka okwa li i iwetikile kutya ke shi gwamo. Okwa li a popitha Maria momukalo kee gu shi nale, a ti: “Ombili nayi kale nangoye! Omuwa na kale pamwe nangoye!” —  Lesha Lukas 1:26-28.

2 Ombiimbeli osho tayi tu lombwele ngawo kombinga yaMaria, omwanakadhona gwaEli, gwokoshilongo Nasareti muGalilea. Ombiimbeli oya tameke okupopya kombinga yaMaria pethimbo sho a li e na okuninga etokolo lya simana. Okwa li a yalekwa komuhongi gwiipilangi, Josef, ngoka a li kee shi omuyamba, ihe okwa li e na eitaalo lya kola. Otashi vulika a li ta dhiladhila kutya ota ka kala nonkalamwenyo yanathangwa, ta kwathele omusamane gwe Josef nokutekula aanona yawo pamwe. Ihe okwa adhika po komuyenda ombadhilila ngoka a li e mu etela oshinakugwanithwa e shi pewa kuKalunga, shoka sha li tashi ka lundulula onkalamwenyo ye.

3, 4. Opo tu tseye nawa Maria, otwa pumbwa okuyanda shike notu na okugandja eitulomo kushike?

3 Aantu oyendji ohaya kala ya kumwa sho Ombiimbeli inaayi popya oshindji kombinga yaMaria. Inayi popya oshindji kombinga yeputuko lye nuukwatya we noinayi popya sha kombinga yeholokopo lye. Ihe shoka ya popya kombinga yaMaria otashi holola oshindji.

4 Opo tu tseye nawa Maria, otwa pumbwa okweekelahi shoka twa kala tu shi nale kombinga yankene omalongelokalunga gi ili nogi ili haga longo aalanduli yago kombinga ye. Natu yande omukalo moka aantu oyendji haya kambadhala oku mu thaneka. Natu yandeni wo omalongo ga kitakana gomalongelokalunga ngoka ga luka omukiintu nguka omwiifupipiki omadhinasimaneko ngaashi “Yina yaKalunga” nosho wo “Omukwaniilwakiintu gwEgulu.” Pehala lyaashono, natu gandjeni eitulomo kwaashoka Ombiimbeli tayi ti lela. Otayi tu lombwele oshili kombinga yeitaalo lye lya kola nonkene tatu vulu oku mu holela.

 Ta talelwa po komuyengeli

 

Maria ka li i inenepeka noka li e wete a hokiwa nale kuKalunga

5. (a) Omukalo moka Maria a li i inyenge kepopitho lyaGabriel otagu tu longo shike? (b) Oshiilongomwa sha simana shini tatu ilongo kuMaria?

5 Omuyenda gwaMaria ka li omuntu gwopanyama. Okwa li omuyengeli Gabriel. Sho e mu popitha kutya “Omuwa na kale pamwe nangoye ye ne ku yambeke,” Maria “okwa haluthwa” noonkondo koohapu ndhoka nokwa li a kuminwa epopitho ndyoka inu uva nale. (Luk. 1:29) Olya li tali ti shike mbela? Maria ka li a tegelela a yambekwe kaantu momukalo gwi ikalekelwa. Omuyengeli okwa li ta popi kombinga yokuyambekwa kuJehova Kalunga. Nonando okwa li a hala Kalunga e mu yambeke ka li i inenepeka noka li e wete nale a hokiwa kuye. Oshiholelwa shaMaria otashi tu longo kutya otu na okukambadhala tu hokiwe kuKalunga, ihe katu na okwiinenepeka nokukala tu uvite e tu hokwa nale. Kalunga oku tonde aanuuntsa, ihe oku hole noha kwathele aaifupipiki. —  Jak. 4:6.

6. Uuthembahenda wi ikalekelwa washike omuyengeli a li a pe Maria?

6 Maria okwa li a pumbwa eifupipiko lya tya ngaaka, molwaashoka omuyengeli okwa li e mu pe uuthembahenda wi ikalekelwa. Okwa li e mu lombwele kutya ota ka mona okanona hoka taka ka kala ka simanenena kaantu ayehe. Gabriel okwa ti: “Omuwa Kalunga ote mu ningi omukwaniilwa ongaashi he David. Oye ta ningi omukwaniilwa gwoluvalo lwaJakob sigo aluhe; nuukwaniilwa we kau na mpoka tau ka hula po.” (Luk. 1:32, 33) Maria okwa li e shi euvaneko ndyoka Kalunga a li u uvanekele David omimvo dhi vulithe peyovi dha pita kutya gumwe gwomoluvalo lwe ota ka pangela sigo aluhe. (2 Sam. 7:12, 13) Omwana ota ka ninga Mesiasa ngoka a kala a tegelelwa koshigwana shaKalunga uule womathelemimvo ga pita.

Omuyengeli Gabriel okwa li a pe Maria uuthembahenda wi ikalekelwa

7. (a) Epulo lyaMaria olya holola shike kombinga ye? (b) Aagundjuka kunena otaya vulu okwiilonga shike kuMaria?

7 Omuyengeli okwa li ishewe e mu lombwele kutya omwana ote ki “ithanwa Omuna gwaKalunga gwokombandambanda.” Omukiintu gwopanyama ota vulu ngiini mbela okuvala Omwana gwaKalunga? Nosha li tashi ke enda ngiini Maria a vule okumona okanona? Okwa li a yalekwa kuJosef, ihe inaya hokana natango. Oshinima shika Maria okwe shi pula a manguluka a ti: “Otashi ka vulika ngiini, oshoka ngame omukadhona natango?” (Luk. 1:34) Ndhindhilika kutya Maria okwa li a popi kee na ohoni kutya ye omukadhona. Pehala lyokusa ohoni, okwa li a nyanyukwa sho e li natango omukadhona. Kunena, aagundjuka oyendji oye hole okudhanena uukadhona wawo nohaya sheke mboka ye li aakadhona natango. Uuyuni owa lunduluka shili. Ihe Jehova ina lunduluka. (Mal. 3:6) Ngaashi pethimbo lyaMaria,  nokunena okwa simaneka mboka haya dhiginine omithikampango dhopamikalo. —  Lesha Aahebeli 13:4.

8. Maria ngoka inaa gwanenena okwa li ta ka vula ngiini okumona okanona ka gwanenena?

8 Nonando Maria okwa li omupiya gwaKalunga omudhiginini, ka li a gwanenena. Okwa li ta vulu ngiini okuvala Omwana gwaKalunga a gwanenena? Gabriel okwe shi yelitha ngeyi: ‘Ombepo ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.’ (Luk. 1:35) Oshitya uuyapuki otashi ti okukala wa “yela,” wa “yogoka” nowaa na “okapethili kasha.” Aantu ohaya taambekidha okwaagwanenena kwawo nuulunde koyana. Ihe moshinima shaMaria, Jehova okwa li ta ka longa oshikumithalonga. Okwa li ta ka lundululila omwenyo gwOmwana moshivalelo shaMaria okuza megulu nokulongitha ombepo ye ondjapuki yi “siikile” Maria opo okanona kaaka thigulule uulunde we. Mbela Maria okwa li i itaale oohapu dhomuyengeli? Okwa yamukula ngiini?

Maria ta yamukula Gabriel

9. (a) Omolwashike mboka ihaaya itaale sha kaaye na okulimbililwa ehokololo lyaMaria? (b) Gabriel okwa li a koleke ngiini eitaalo lyaMaria?

9 Yamwe mboka ihaayi itaale sha naalongwantu yomoongeleka dhUukwakriste ohaya kala tayi ipula kutya otashi vulika ngiini omukadhona a mone okanona. Nonando oya longwa, ihaya uvu ko oshili yi igalala ndjoka ya popiwa kuGabriel, sho a ti: “Kaku na shoka tashi nyenge Kalunga.” (Luk. 1:37) Maria okwa li i itaale oohapu dhaGabriel, oshoka okwa li omugundjuka e na eitaalo lya kola. Ihe shika itashi ti kutya okwa li hi itaale kehe shimwe. Ngaashi omuntu kehe omunandunge ta ka ninga, Maria okwa li a pumbwa okumona uumbangi opo i itaale oshinima shoka. Gabriel okwa li e mu pe uumbangi mboka. Okwa li e mu lombwele kombinga yomukwanezimo lye omukokele, Elisabet, ngoka a tseyika nawa kutya iha mono aanona. Kalunga okwa li e mu ningi omusimba pashikumithalonga.

10. Omolwashike kaatu na okudhiladhila kutya oshinakugwanithwa shaMaria kasha li tashi tilitha nenge oshidhigu?

10 Ngashingeyi Maria okwa li ta ka ninga po shike? Oshinakugwanithwa she okwe shi pewa noku na uumbangi kutya Kalunga ota ka ninga ashihe shoka sha popiwa kuGabriel. Katu na okudhiladhila kutya oshinakugwanithwa shika kasha li tashi tilitha nenge oshidhigu. Shotango, okwa li a yalekwa kuJosef. Mbela okwa li ngaa te ke mu hokana ngele oku uvu kutya omusimba? Oshikwawo, oshinakugwanithwa otashi vulika sha li tashi monika sha fa oshidhigu. Okwa li ta ka humbata omwenyo gwOmwana gwaKalunga omuholike, oshishitwa sha simanenena kiishitwa ayihe yaKalunga. Okwa li te ke mu sila oshimpwiyu manga e li okahanona noku mu gamena muuyuni wa kolokosha. Shika osha li shili oshinakugwanithwa oshidhigu.

11, 12. (a) Omathimbo gamwe aapiya aadhiginini ohayi inyenge ngiini ngele Kalunga te ya pe iinakugwanithwa mbyoka ye wete iidhigu? (b) Maria oku ulike kutya ye omuntu a tya ngiini sho a yamukula Gabriel?

 11 Ombiimbeli otayi ti kutya naapiya yaKalunga aadhiginini omathimbo gamwe ngele Kalunga te ya pe iinakugwanithwa mbyoka ye wete ya fa iidhigu, ohaya kakadhala oku yi taamba ko. Moses okwa li ti ipopile kutya ke shi omupopi omwaanawa sho a pulwa a kale omukalelipo gwaKalunga. (Eks. 4:10) Jeremia okwa ti kutya ye “omunona” natango ita vulu okutaamba ko oshilonga shoka Kalunga te mu pe. (Jer. 1:6) Jona okwa li a fadhuka po oshilonga she. (Jona 1:3) Ye Maria okwa li ta ka ninga po shike?

12 Aantu oyendji kunena oye shi kutya okwa li a taamba ko oshinakugwanithwa she neifupipiko nonevuliko. Okwa lombwele Gabriel a ti: Tala, “ongame omuntu gwOmuwa. Nandi ningwe ngaashi wa ti.” (Luk. 1:38) Omuntu gwOmuwa nenge omupiya okwa li omudhinwantu, nonkalamwenyo ye ayihe oya li miikaha yaMwene gwe. Maria okwa li i inekela thiluthilu Mwene gwe, Jehova. Okwa li e shi kutya oku li megameno, molwaashoka Mwene gwe omwiinekelwa kwaamboka ye mu inekela note ke mu yambeka sho ta longo oshilonga she. —  Eps. 18:25.

Maria okwa li e shi kutya oku li megameno lyaJehova, Kalunga ke omudhiginini

13. Oshiholelwa shaMaria otashi tu kwathele ngiini tu ninge shoka Kalunga te tu pula tu ninge nonando otu wete sha fa oshidhigu nenge sha fa itaashi vulu okuningwa?

13 Omathimbo gamwe Kalunga ohe tu pula tu ninge shoka tu wetu sha fa oshidhigu nenge sha fa itaashi vulu okuningwa nokuli. Ihe Oohapu dhe otadhi tu pe omatompelo ga kola tu kale twe mu inekela thiluthilu nokwiitula megameno lye ngaashi Maria. (Omayel. 3:5, 6) Mbela otatu ka kala ngaa twe mu inekela? Ngele tatu shi ningi, ote ke tu yambeka note ke tu kwathela tu kale tu na eitaalo lya kola muye.

Elisabet ta talelwa po

14, 15. (a) Jehova okwa li a yambeke Maria ngiini sho a ka talela po Elisabet naSakaria? (b) Oohapu dhaMaria ndhoka dhi li muLukas 1:46-55 otadhi holola shike kombinga ye?

14 Shoka Gabriel a popi kombinga yaElisabet osha li sha tsu Maria omukumo. Okwa li e shi shi kutya Elisabet ota ka uva ko omaiyuvo ge, oshoka naye okwa li monkalo ya fa ye. Maria okwe endelele a ye kuJudea oshilongo shoondundu, tashi vulika hapu endwa omasiku gatatu nenge gane. Sho a thiki megumbo lyaElisabet naSakaria, ngoka a li omusaaseri, Jehova okwa li a pe Maria uunzapo mboka tawu koleke eitaalo lye. Sho Elisabet u uvu epopitho lyaMaria, okanona hoka ke li mela lye, oka nyulukuta kenyanyu. Okwa li u udhithwa  ombepo ondjapuki nokwa ti Maria ‘oyina yOmuwa gwe.’ Kalunga okwa li a hololela Elisabet kutya okanona kaMaria otaka ka ninga Omuwa gwe, ano Mesiasa. Okwa li a nwethwa mo a pandule Maria omolwokuvulika kwe nuudhiginini a ti: “Omunelago oongoka wi itaala.” (Luk. 1:39-45) Kehe shoka Jehova u uvanekela Maria okwa li te ke shi gwanitha po.

Uukuume pokati kaMaria naElisabet owa li we ya etele uuwanawa

15 Maria naye okwa li a popi oohapu ndhoka tadhi adhika mOohapu dhaKalunga. (Lesha Lukas 1:46-55.) Moohapu adhihe ndhoka Maria a popya mOmbiimbeli, ndhika odho oonde dhi vule ndhoka a popya palwe notadhi holola oshindji kombinga ye. Oohapu dhe otadhi ulike nkene a pandula Jehova nokwa li te mu tanga sho e mu pa uuthembahenda wokuninga yina yaMesiasa. Odha li tadhi ulike kutya  eitaalo lye olya kola shi thike peni sho a popi kutya Jehova oku tonde aanuuntsa noha kwathele aaifupipiki noohepele mboka taye mu longele. Otadhi ulike wo kutya ontseyo ye oyi thike peni. Yamwe oya tengeneka kutya okwa li a totha lwiikando yi vule po 20 okuza mOmanyolo gOshihebeli. *

16, 17. (a) Maria nomwanamati oya li ye na ombepo yini ndjoka tu na okuholela? (b) Ehokololo lyaMaria ta talele po Elisabet otali tu dhimbulukitha uuwanawa wuni?

16 Osha yela kutya Maria okwa li ha dhiladhila muule kombinga yOohapu dhaKalunga. Ihe nonando ongaaka, okwa kala omwiifupipiki, nokutotha mOmanyolo pehala lyokupopya oohapu dhe mwene. Okamwanamati hoka ka li moshivalelo she nako oke ku ulika ombepo ya fa ye, sho ka ti: “Elongo ndika tandi li longo, ka li shi lyandje mwene, ihe olya za kuKalunga, ngoka a tuma ndje.” (Joh. 7:16) Otu na okwiipula ngeyi: ‘Mbela onda simaneka ngaa Oohapu dhaKalunga? Nenge ondi hole owala okupopya omadhiladhilo nomalongo gandje mwene?’ Otu shi kutya Maria okwa li e na ombepo ombwanawa.

17 Maria okwa menekele puElisabet oomwedhi ndatu lwaampono, nosha yela kutya oya li taya tsaathana omukumo. (Luk. 1:56) Ehokololo ndika ewanawa lyaMaria ta talele po Elisabet otali tu longo kutya oshiwanawa okukala tu na ookuume. Ngele otwa panga uukuume naamboka ye hole shili Kalunga ketu, Jehova, otatu ka koka pambepo nokuhedha popepi naye. (Omayel. 13:20) Ethimbo lyaMaria lyokushuna kegumbo osho lya thiki. Mbela Josef ota ka tya ngiini ngele oku uvu kutya Maria oku li monkalo yini?

Maria naJosef

18. Maria okwa lombwele Josef shike, na Josef okwa li i inyenge ngiini?

18 Maria ina tegelela aantu ya mone kutya oku li metegelelo opo e li lombwele Josef. Manga inaa popya naye otashi vulika a li ti ipula kutya omulumentu nguka omuyuuki nomutilikalunga ote ke mu tila ngiini. Ihe nonando ongaaka, okwe mu lombwele shoka she mu ningilwa. Josef otashi vulika a li u uvite uudhigu noonkondo. Okwa li a hala oku mu itaala, ihe okwa li e wete kutya okwe mu kengelela. Ombiimbeli inayi popya kutya Josef okwa li ta dhiladhila shike. Ihe otayi ti kutya okwa tokola e mu henge po, oshoka pethimbo ndiyaka aantu ya yalekathana oya li haya talika ko ya fa ya hokana. Ihe nonando ongaaka, ka li a hala oku mu sitha ohoni montaneho, onkee okwa dhiladhila oku mu etha po ongumitila. (Mat. 1:18, 19) Oshi na okukala sha li sha yemateka Maria okumona omulumentu nguka omudhiginini u uvite nayi. Ihe Maria ina pa Josef ombedhi sho inee mu itaala.

19. Jehova okwa kwathele ngiini Josef a ninge shoka shi li mondjila?

 19 Jehova okwa li a kwathele Josef nombili a ninge shoka shi li mondjila. Omuyengeli gwaKalunga okwa li e mu lombwele mondjodhi kutya etegelelo lyaMaria olyopashikumithalonga. Shika oshi na okukala sha li she mu talaleke. Ngashingeyi Josef okwa vulika kuJehova ngaashi Maria a li a ningi okuza petameko. Okwa kutha Maria a ninge omukulukadhi gwe, nokwi ilongekidha okutaamba ko oshinakugwanithwa shi ikalekelwa shokusila oshimpwiyu Omwana gwaJehova. —  Mat. 1:20-24.

20, 21. Aaihokani naamboka taya dhiladhila ondjokana otaya vulu okwiilonga shike kuMaria naJosef?

20 Aaihokani naamboka taya dhiladhila ondjokana otaya vulu okwiilonga oshindji kuMaria naJosef mboka ya li ko oomvula 2 000 dha pita. Sho Josef a mono omukulukadhi gwe omugundjuka ta gwanitha po oshinakugwanithwa she e li omuvali, otashi vulika a li a nyanyukwa sho a vulika kelombwelo lyomuyengeli gwaJehova. Otashi vulika Josef a li a mono kutya osha simana okwiinekela muJehova uuna to ningi omatokolo ga simana. (Eps. 37:5; Omayel. 18:13) Osha yela kutya okwa tsikile okukala omunahenda nokuninga omatokolo gopandunge e li omutse gwegumbo.

21 Oshike tatu ilongo kuMaria sho a li a hala okuhokanwa kuJosef nonando petameko Josef okwa li inaa hala okwiitaala shoka a li te mu lombwele? Nonando petameko osha li oshidhigu kuJosef okwiitaala ehokololo lyaMaria, Maria okwa li a tegelele Josef a tokole shoka ta ka ninga po, oshoka oye a li ta ka kala omutse gwegumbo. Shika osha li oshiilongomwa oshiwanawa kuye noshi li wo oshiwanawa kaakiintu Aakriste kunena. Hugunina, oshinima shika osha li sha longo Josef naMaria kutya osha simana okukundathana ya manguluka nokupopya oshili. —  Lesha Omayeletumbulo 15:22.

22. Josef naMaria oya li ya kankamekela ondjokana yawo kushike, noya li ye na etegameno lyashike?

22 Aaihokani mbaka aagundjuka oya li ya tameke ondjokana yawo nomakankameno ga kola. Ayehe oya li ye hole Jehova Kalunga komeho gaayihe noya li haya kala ya hala oku mu nyanyudha ye li aavali aanahole mboka haya gwanitha po iinakugwanithwa yawo. Oya li taya ka mona omalaleko nuuyamba ogendji, ihe oya li wo taya ka taalelwa komashongo omanene. Oya li ye na okuputudha Jesus ngoka a li ta ka kala omuntu omunenenene muuyuni.

^ okat. 15 Osha yela kutya Maria okwa li wo a totha oohapu dhomukiintu omudhiginini Hanna ngoka naye a li a yambekwa kuJehova a mone okanona. —  Tala oshimpungu “Omagalikano gaali omawanawa,” mOntopolwa 6.