Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Natu holeleni eitaalo lyawo

 ONTOPOLWA 11

Okwa kala a tonata nokwa tegelela

Okwa kala a tonata nokwa tegelela

1, 2. Elia okwa li e na okuninga shike oshidhigu, na Elia naAhab oya li ya yooloka ngiini?

ELIA okwa kala a hala okukala oye awike, opo a galikane He gwomegulu. Ihe oongundu dhaantu ndhoka a li nadho odha adhika opo dha mono omupolofeti nguka gwashili a pula omulilo gu ze megulu, noyendji otashi vulika ya li taye mu iheke opo e ya laleke nuuyamba. Manga Elia inaa ya kondungu yondundu Karmel a ka galikane Jehova Kalunga e li oye awike, okwa li e na oku ka popya nomukwaniilwa Ahab. Shika kasha li oshipu.

2 Ahab naElia oya li ya yoolokathana lela. Ahab ngoka a li a zala ohema yopakwaniilwa, okwa li e na olwiho, noha nwethwa mo kuyalwe nuupu a ninge iinima ya puka. Elia okwa li a zala onguwo yuupolofeti yanathangwa, tashi vulika yoshipa shoshinamwenyo nenge ya tungwa nomafufu goongamelo nenge giikombo. Okwa li e na omukumo, omudhiginini noku na eitaalo. Esiku ndyoka lya li pokuhula olya holola oshindji kombinga yomaukwatya gawo.

3, 4. (a) Omolwashike Ahab naagalikani yalwe yaBaal ya li ya sa ohoni esiku ndyoka? (b) Omapulo geni tatu ka kundathana?

3 Ahab naagalikani yalwe yaBaal oya li ya sa ohoni esiku ndyoka. Elongelokalunga lyoshipagani ndyoka Ahab nomukulukadhi gwe, omukwaniilwakiintu Isebel, ya li haya ambidhidha muukwaniilwa womazimo omulongo gaIsraeli, olya li lya hanagulwa po. Baal okwa li a monika mo kutya ogwiifundja. Oshikalunga shoka kaashi na omwenyo osha li sha nyengwa okutemena omulilo aapolofeti yasho sho taya dhana notayi ishatagula noomwele sigo taya zi oombinzi. Baal okwa li a nyengwa okugamena aantu 450 mboka ya li yi ilongela okudhipagwa. Ihe oshikalunga shoka osha li sha nyengwa moshinima shilwe ishewe. Uule woomvula dhi vulithe pundatu, aapolofeti yaBaal oya li yi indile kalunga kawo a hulithe po oshikukuta shoka sha li tashi hepeke oshilongo, ihe Baal okwa li a nyengwa. Masiku Jehova ote ku ulika kutya oye Kalunga kashili mokuhulitha po oshikukuta shoka. —  1 Aak. 16:30–17:1; 18:1-40.

4 Ihe uunake Jehova te ke shi ninga? Elia ota ka ninga po shike manga a tegelela Jehova e shi ninge? Noshike tatu vulu okwiilonga  komulumentu nguka e na eitaalo? Natu shi taleni sho tatu konakona ehokololo ndika. —  Lesha 1 Aakwaniilwa 18:41-46.

Elia okwa kala ha galikana

5. Elia okwa li a lombwele Ahab a ninge shike, na Ahab okwa li ngaa i ilonga mo sha miiningwanima yesiku ndyoka?

5 Elia okwa li a yi kuAhab e ta ti: “Ngashingeyi inda, u ka lye. Ondu uvite oshihomo shomvula tayi ya.” Mbela omukwaniilwa nguka omukolokoshi okwa li ngaa i ilonga sha miiningwanima yesiku ndyoka? Ehokololo inali shi popya kondandalunde, ihe mulyo itatu adha mo oohapu tadhi popi kutya okwa li i iyele ombedhi nenge a pula ekwatho komupolofeti e mu galikanene kuJehova a dhiminwe po. Ahab okwa yi owala “a ka lye” nokunwa. (1 Aak. 18:41, 42) Ongiini kombinga yaElia?

6, 7. Elia okwa li a galikana kombinga yashike, nomolwashike?

6 “Elia okwa londo kondungu yondundu Karmel, nkoka i inyongamene pevi a tula omutse gwe pokati komagulu.” Manga Ahab ta tula poshindimba, Elia okwa li a mono ompito yokugalikana kuHe gwomegulu. Ndhindhilika kutya Elia okwa li e shi ningi momukalo gweifupipiko, i inyongamena pevi omutse gu li pokati komagulu noshipala sha guma poongolo. Elia okwa li ta galikana kombinga yashike? Ombiimbeli otayi tu lombwele muJakob 5:18 kutya okwa li ta  galikana oshikukuta shi hule po. Egalikano ndyoka otashi vulika a li e li ningile kondungu yondundu Karmel.

Egalikano lyaElia olyu ulike kutya okwa halelela ehalo lyaKalunga li gwanithwe

7 Petameko, Jehova okwa tile: ‘Otandi ka lokitha omvula.’ (1 Aak. 18:1) Ano Elia okwa li a galikana, opo ehalo lyaJehova li gwanithwe, ngaashi naanaa Jesus a ka longa aalanduli ye ya galikane konima yoomvula eyovi limwe lwaampo. —  Mat. 6:9, 10.

8. Oshiholelwa shaElia otashi tu longo shike kombinga yegalikano?

8 Oshiholelwa shaElia otashi tu longo oshindji kombinga yegalikano. Elia okwa li unene ti ipula nokugwanithwa kwehalo lyaKalunga. Uuna tatu galikana, oshi li nawa tu dhimbulukwe kutya: “Ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.” (1 Joh. 5:14) Opo tu tseye kutya otu na okugalikana kombinga yashike, otu na okutseya ehalo lyaKalunga nosha yela kutya otu na okukonakona Ombiimbeli kehe esiku. Elia okwa li wo a hala okumona oshikukuta sha hula po, molwaashoka aantu yomoshilongo shawo oya li taya mono iihuna. Omwenyo gwe ogwa li gwa pandula noonkondo sho a mono Jehova a longa oshikumithalonga esiku ndyoka. Natse otwa hala omagalikano getu gu ulike kutya otwa pandula tashi zi komutima notu na ko nasha nonkalonawa yayalwe. —  Lesha 2 Aakorinto 1:11; Aafilippi 4:6.

Okwa li e na omukumo nokwa tonata

9. Elia okwa li a lombwele omuyakuli gwe a ninge shike, nomaukwatya gaali geni tatu ka konakona?

9 Elia okwa li e na uushili kutya Jehova ota ka hulitha po oshikukuta, ihe ka li e shi kutya uunake te ke shi ninga. Onkee ano, omupolofeti okwa li a ningi po shike manga a tegelela? Ndhindhilika shoka ehokololo tali ti: “Okwa ti komumati gwe: ‘Inda, u ka tale lwokefuta.’ Omumati okwa yi nokwa galuka ta ti: ‘Kandi wete ko sha.’ Shika osha ningwa luheyali.” (1 Aak. 18:43) Oshiholelwa shaElia otashi tu longo iiyilongomwa iyali. Shotango, omupolofeti okwa li e na einekelo kutya Jehova ota ka ninga po sha. Okwa li a tegelela nokwa halelela okumona nkene Jehova te ke shi ninga.

Elia okwa li e na einekelo momauvaneko gaJehova nokwa li a halelela okumona uumbangi kutya Jehova masiku ota ka lokitha omvula

10, 11. (a) Omomukalo guni Elia u ulike einekelo momauvaneko gaJehova? (b) Omolwashike tatu vulu okukala tu na einekelo lya fa lyaElia?

10 Molwaashoka Elia okwa li e na einekelo momauvaneko gaJehova, okwa li a halelela okumona uumbangi kutya Jehova masiku ota ka lokitha omvula. Okwa li a tumu omuyakuli gwe kehala lya londa a ka tale ngele opu na sha tashi ulike kutya omvula oyi li pokuloka. Sho omuyakuli a galuka okwe mu etele etumwalaka itaali nyanyudha tali  ti: “Kandi wete ko sha.” Omungengegulu negulu olya li lya yela, kaali na iikogo. Mbela owa ndhindhilika sha shoka tashi kumitha? Dhimbulukwa kutya Elia opo owala a adhika a lombwele omukwaniilwa Ahab a ti: “Ondu uvite oshihomo shomvula tayi ya.” Omolwashike omupolofeti a tile ngawo ngele kaku na iikogo yomvula?

11 Elia okwa li e shi shoka Jehova u uvaneka. E li omupolofeti gwaJehova nomukalelipo gwe, okwa li e na uushili kutya Kalunga ota ka gwanitha oohapu Dhe. Elia okwa li e na einekelo lya kola e ta kala nokuli a fa e uvite nale oshihomo shomvula. Shika otashi vulika shi tu dhimbulukithe shoka Ombiimbeli ya popya kombinga yaMoses, ya ti: “Okwa li e na omukumo ongaangoka a mono Kalunga, nando iha monika.” Mbela Kalunga oku li ngaa omuntu gwolela kungoye? Kalunga okwe tu pa etompelo ewanawa tu kale tu na eitaalo muye nomomauvaneko ge. —  Heb. 11:1, 27.

12. Elia okwa li u ulike ngiini kutya okwa tonata, nongiini a li i inyenge ketumwalaka kutya oku na okakogo kamwe?

12 Oshitiyali, ndhindhilika kutya Elia okwa li a tonata. Okwa li a tumu omuyakuli gwe a shune ko, ine mu tuma owala lumwe, ihe olwiikando iheyali. Otashi vulika omuyakuli a li a vulwa kokushuna ko lwiikando, ihe Elia okwa kala a hala okumona endhindhiliko noka li a si uunye. Hugunina, konima yoshikando oshitiheyali, omuyakuli okwe ya netumwalaka tali ti: “Ondi wete ko okakogo ke vule oshikaha shomuntu taka yeluluka mefuta.” Kala ando wa fa wu wete omuyakuli ngoka tu udhike noshikaha she te shi yeleke nokakogo hoka okashona taka zi mEfuta Enene. Otashi vulika a li e ka dhina. Ihe kuElia oka li ka simana. Elia ngashingeyi okwa lombwele omuyakuli gwe e endelele, ta ti: “Inda komukwaniilwa Ahab, u mu lombwele, a kutile etembakwiita lye, a ye kegumbo, manga omvula inaayi mu kwata moshipala.” —  1 Aak. 18:44.

13, 14. (a) Ongiini tatu vulu okukala twa tonata ngaashi Elia? (b) Oshike tashi tu ningitha tu ninge po sha meendelelo?

13 Nomwaashika, Elia okwe tu tulile po ishewe oshiholelwa oshiwanawa. Natse otu li methimbo moka Kalunga masiku ta ka gwanitha elalakano lye. Elia okwa kala a tegelela oshikukuta shi hulithwe po; aapiya yaKalunga kunena nayo oya tegelela uuyuni mbuka wa kolokosha wu hule po. (1 Joh. 2:17) Otu na okukala twa tonata ngaashi Elia sigo Kalunga te ke wu hulitha po. Omwana gwaKalunga, Jesus, okwa londodha aalanduli ye a ti: “Ano tonateni, oshoka inamu tseya, esiku olini Omuwa gweni te ya.” (Mat. 24:42) Mbela Jesus okwa li a hala okutya aalanduli ye itaya ka kala ye shi kutya oye li methimbo lyehulilo? Aawe, molwaashoka okwa li a popi e shi ya muule kombinga yankene uuyuni tawu ka kala wu li pomasiku gahugunina. Atuheni otatu vulu okumona nkene endhindhiliko ‘lyehulilo lyuuyuni’ tali gwanithwa. —  Lesha Mateus 24:3-7.

Okakogo kamwe hoka ka tumbu momunkulofuta oka li ka gwana okwiitaalitha Elia kutya Jehova oku li pokulokitha omvula. Endhindhiliko lyehulilo lyuuyuni olye tu pa omatompelo ga gwana tu katuke neendelelo

14 Ombinga kehe yendhindhiliko ndika otayi tu pe uunzapo wu  shi okwiinekelwa. Mbela uunzapo mbuka owa gwana oku tu inyengitha tu longele Jehova notwaa na ezimbuko? Okakogo hoka kamwe ka tumbu momunkulo gwefuta oka li ka gwana okwiitaalitha Elia kutya Jehova oku li pokulokitha omvula. Mbela omupolofeti nguka omudhiginini okwa li a yematekwa?

Jehova ohe eta epepelelo nosho wo omayambeko

15, 16. Iiningwanima yini ya li ya ningwa neendelelo, na Elia okwa li i inekela kutya Ahab ota ka ninga po shike?

15 Ehokololo otali ti: “Mokathimbo manga egulu lya li lya zigakana iikogo, ombepo oya tameke okupepa, nomvula onene oya tameke okupuuka. Ahab okwa londo metembakwiita lye e ta yi kuJesreel.” (1 Aak. 18:45) Iiningwanima ya ka landula ko oya li ya ningwa mepathimo lyeho. Manga omuyakuli gwaElia a li ta gandja etumwalaka lyomupolofeti kuAhab, okakogo hoka okashona oka ningi iikogo oyindji e tayi luudhike egulu. Ombepo onene oya tameke okupepa. Omvula ndjoka ya kala inaayi loka uule woomvula ndatu netata, oya loko muIsraeli. Evi ndyoka lya li lya kukuta ngashingeyi olya kumwa omeya. Okalonga kaKishon oku udha sho omvula ya tameke okuloka, e tayi yogo po oombinzi dhaapolofeti yaBaal mboka ya dhipagwa. Aaisraeli aatangalali oya li wo ya pewa ompito ya yoge mo elongelokalunga lyaBaal moshilongo.

‘Omvula onene oya tameke okupuuka’

16 Osha yela kutya Elia naye osho a li a tegelela ya ninge. Otashi vulika a li ti ipula kutya Ahab ote ki inyenga ngiini kiiningwanima iinene mbyoka ya li tayi ningwa. Mbela Ahab ote ki itedhulula e te etha po elongelokalunga lyaBaal lya nyata? Iiningwanima yesiku ndyoka oya li ya gwana oku mu ningitha a ninge omalunduluko ga tya ngaaka. Itatu vulu oku shi tseya kutya Ahab okwa li ta dhiladhila shike sho iinima ayihe mbika tayi ningwa. Ehokololo otali ti owala kutya omukwaniilwa “okwa londo metembakwiita lye e ta yi kuJesreel.” Mbela okwi ilonga mo ngaa sha? Mbela okwa tokola okulundulula onkalamwenyo ye? Iinima mbyoka ya ka ningwa komeho otayi ulike kutya ka li a ningi po sha. Ihe Ahab naElia oya li natango taya ka mona iiningwanima yilwe mesiku ndyoka.

17, 18. (a) Oshike sha li sha ningilwa Elia sho u uka kuJesreel? (b) Omolwashike tashi kumitha sho Elia a tondoka okuza kuKarmel sigo okuJesreel? (Tala wo enyolo lyopevi.)

17 Omupolofeti gwaJehova naye okwa tameke okuya nondjila  ndjoka Ahab a yi nayo. Olweendo olwa li talu ka kala oludhigu sho te ende mondjila ndjika onde, oshoka okwa li kwa luudha nomvula oya li tayi loko. Ihe opwa li pwa ningwa sha natango inaashi monika nale.

18 Ombiimbeli otayi ti: “Oonkondo dhOMUWA odhe ya muElia; okwa manga oombwetelo dhe nokwa matuka ondjila ayihe kuJesreel a tetekela Ahab.” (1 Aak. 18:46) Osha yela kutya “oonkondo dhOMUWA” odhe mu kwathele a ninge sha kaashi li paunshitwe. Oshilando Jesreel osha li kokule nookilometa 30 ye Elia ka li we omugundjuka. * Kala ando wa fa wu wete omupolofeti ta manga oonguwo dhe oonde, te dhi mangele moombwetelo, opo e ende a manguluka, ta matuka momvula e ta adha etemba lyomukwaniilwa e te li pitilile nokuli.

19. (a) Oonkondo nuundjangandjele mboka Elia a li a pewa kuKalunga otashi vulika wu tu dhimbulukithe omahunganeko geni? (b) Sho Elia ta tondoka u uka kuJesreel, okwa li e shi shike?

19 Kasha li tuu oshinima oshiwanawa kuElia! Oshi na okukala sha li she mu uvitha nawa sho e na oonkondo, uundjangandjele nosho wo omatha, tashi vulika nokuli ge vulithe ngoka a li e na sho a li omugundjuka. Shika otashi vulika shi tu dhimbulukithe omahunganeko ngoka tage tu uvanekele kutya mOparadisa ndjoka tayi ka kala kombanda yevi, aapiya aadhiginini yaJehova otaya ka kala ye na uukolele noonkondo dhi ihwa po. (Lesha Jesaja 35:6; Luk. 23:43) Sho Elia ta tondoka mondjila ndjoka momvula, osha yela kutya okwa li e shi shi kutya okwa pandika kuHe, Kalunga awike kashili, Jehova.

20. Otatu vulu okukonga ngiini omayambeko gaJehova?

20 Jehova okwa halelela oku tu yambeka. Natu konge omayambeko ge; omayambeko ge omawanawa noonkondo, onkee ano, natu ninge ashihe shoka tatu vulu tu ga mone. Ngaashi Elia, natu kale twa tonata nokutala kuumbangi wa yela mboka tawu ulike kutya Jehova oku li pokukatukila onkatu uuyuni mbuka wa kolokosha nowu li pokuhula po. Natse otu na omatompelo ga gwana okukala twi inekela thiluthilu momauvaneko gaJehova, ‘Kalunga ngoka omunashili.’ —  Deut. 32:4.

^ okat. 18 Jehova okwa lombwele Elia nziya konima yaashika a dheule Elisa, ngoka a ka tseyika kutya okwa “tulile omeya peke lyaElia.” (2 Aak. 3:11) Elisa okwa ningi omuyakuli gwaElia, nosha yela kutya okwa li ha kwathele omulumentu nguka omukokele.