Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Natu holeleni eitaalo lyawo

Ehulitho

Ehulitho

“Holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.” — AAHEBELI 6:12.

1, 2. Omolwashike sha simana noonkondo okukoleka eitaalo lyetu ngashingeyi? Shi thaneka.

EITAALO oshitya oshiwanawa shoka tashi popi kombinga yuukwatya uuwanawa noonkondo. Ihe uuna tatu uvu oshitya eitaalo otu na wo okudhiladhila koshitya oshikwawo. Oshitya shoka osho “eendelelo.” Molwaashoka ngele katu na eitaalo otwa pumbwa oku li konga meendelelo. Nongele otu li na otwa pumbwa oku li dhiginina noku li koleka meendelelo. Omolwashike mbela?

2 Natu tye nduno oto taakana ombuga onene. Owa sa enota noonkondo. Ngele owa mono omeya, owu na oku ga shiga ketango kaaga pwine po. Opo nduno owa pumbwa okuudha ombago yoye ga kale ga gwana oku ku thikitha. Uuyuni kunena owa fa ombuga yopambepo. Ngaashi omeya ga pumba mombuga, eitaalo lyashili kunena olya pumba mo muuyuni nohali pwine po mbala unene tuu ngele inali shigwa nenge li gwedhelwe. Otwa pumbwa eitaalo noonkondo, oshoka ngaashi naanaa omuntu itaa vulu okukala nomwenyo ngele iha nu omeya, natse itatu vulu okukala nomwenyo pambepo ngele katu na eitaalo. —  Rom. 1:17.

3. Jehova okwe tu pa shike shi tu kwathele tu koleke eitaalo lyetu, niinima iyali yini twa pumbwa okudhimbulukwa oku yi ninga?

3 Jehova oku shi kutya otwa pumbwa eitaalo meendelelo noku shi wo kutya oshidhigu kunena okukoleka eitaalo noku li dhiginina. Nomolwaashono e tu pa iiholelwa mbyoka tatu vulu okuholela. Jehova okwa li a nwetha mo omuyapostoli Paulus a nyole ngeyi: “Holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.” (Heb. 6:12) Nomolwaashono ehangano lyaJehova lya kala hali tu ladhipike tu landule iiholelwa yaalumentu naakiintu aadhiginini ngaashi mboka ya popiwa membo ndika. Ngashingeyi otu na okuninga po shike? Otu na okudhimbulukwa iinima iyali: (1) Otwa pumbwa okukala tatu koleke eitaalo lyetu; (2) otwa pumbwa okukaleka etegameno lyetu lya tsa momadhiladhilo getu.

4. Satana okwa holola ngiini kutya omutondi gwaamboka yi itaala, ihe omolwashike kaatu na okutila?

4 Kala to koleke eitaalo lyoye. Satana oye omutondi omunene gwaamboka ye na eitaalo. Omupangeli gwuuyuni mbuka okwa ninga uuyuni mbuka wu kale wa fa ombuga moka shi li oshidhigu okudhiginina eitaalo. Oku na oonkondo e tu vule. Mbela otu na okukala twa tila kutya itatu vulu okukokeka eitaalo nenge oku li koleka? Nando nando! Jehova oye Kuume kopothingo kaayehe mboka ye na eitaalo lyashili. Ote tu shilipaleke kutya kekwatho lye, otatu vulu okukondjitha Omuhindadhi note ke tu ya nokuli ontuku. (Jak. 4:7) Otatu vulu oku mu kondjitha ngele ohatu koleke nokutunga eitaalo lyetu esiku kehe. Ngiini?

5. Aalumentu naakiintu aadhiginini mboka ya popiwa mOmbiimbeli oya kokeke ngiini eitaalo lyawo? Shi yelitha.

 5 Ngaashi twe shi mono, aalumentu naakiintu mboka ya popiwa mOmbiimbeli inaya valwa neitaalo. Onkalamwenyo yawo otayi holola kutya eitaalo nenge okukala omwiinekelwa oshiyimati shombepo ondjapuki. (Gal. 5:22, 23) Oya li haya pula Jehova ekwatho megalikano nokwa li ha koleke eitaalo lyawo. Natu ya holeleni, noinatu dhimbwa kutya Jehova oha gandja ombepo ye ondjapuki, itee yi ngungunine, kwaamboka taye yi pula nohaya katuka metsokumwe nomagalikano gawo. (Luk. 11:13) Mbela opu na sha ishewe tatu vulu okuninga?

6. Ongiini tatu vulu okumona mo uuwanawa mokukonakona omahokololo gOmbiimbeli?

6 Membo ndika otwa kundathana owala iiholelwa iishona yaamboka ya li ye na eitaalo lya dhenga mbanda. Opu na natango iiholelwa yilwe oyindji. (Lesha Aahebeli 11:32.) Iiholelwa ayihe mbyoka otayi vulu oku tu longa oshindji ngele otwe yi konakona paumwene. Ngele omahokololo gOmbiimbeli kombinga yaapiya aadhiginini otwe ga lesha owala twe endelela, itaga ka koleka eitaalo lyetu. Opo tu mone mo uuwanawa momahokololo ngoka gOmbiimbeli, otwa pumbwa oku ga ya muule tatu tala kuuyelele wulwe mboka wa kwatelwa mo. Ngele otwa dhimbulukwa kutya aalumentu naakiintu mbaka inaaya gwanenena oya li owala ‘aantu ye tu fa,’ iiholelwa yawo otayi ka kala yolela kutse. (Jak. 5:17) Ngele otu na olukeno, otashi vulika tu ka kale tu uvite nkene ya li yu uvite sho ya taalelwa komashongo nokomaupyakadhi ga fa ngoka tu na.

7-9. (a) Ando aalumentu naakiintu aadhiginini yopethimbo lyOmbiimbeli oya pewelwe ompito ya longele Jehova momukalo moka hatu mu longele kunena, ando oya kala yu uvite ngiini? (b) Omolwashike tu na okukoleka eitaalo lyetu okupitila miilonga?

7 Omatokolo getu niilonga yetu otayi vulu okukoleka eitaalo lyetu, oshoka ‘eitaalo lyaa na iilonga, olya sa.’ (Jak. 2:26) Dhiladhila owala kunkene aalumentu naakiintu mboka twa kundathana taya ka kala yu uvite ngele ando oya pelwe iilonga mbyoka Jehova e tu pa kunena.

8 Pashiholelwa, ongiini ngele ando Abraham okwa lombwelelwe a galikane Jehova pamwe nongundu yaalongelikalunga ooyakwawo pOshinyanga shUukwaniilwa nenge piigongi iinene mpoka omauvaneko ngoka a li a “talele kokule” taga kundathanwa nokufatululwa muule, pehala lyokulombwelwa a ningile omayambo ge koalitali yomamanya inaaga hongwa nawa ya tungilwa mombuga? (Lesha Aahebeli 11:13.) Nongiini ngele ando Elia okwa lombwelelwe kutya iilonga ye oyokuuvithila aantu nombili etumwalaka tali hekeleke notali gandja etegameno, pehala lyokudhipaga aapolofeti yaBaal aakolokoshi omanga ta kambadhala okulongela Jehova kohi yepangelo lyomukwaniilwa omushunimonima nomukolokoshi? Osha yela kutya aalumentu naakiintu mbaka aadhiginini ando ompito yokulongela Jehova momukalo moka hatu mu longele kunena ando inaye yi pewa lwaali.

9 Onkee ano, natu tsikileni okukoleka eitaalo  lyetu okupitila miilonga. Kungawo, otatu landula iiholelwa yaalumentu naakiintu aadhiginini mboka ya popiwa mOohapu dhaKalunga dha nwethwa mo. Ngaashi sha popiwa mEfalomo, otatu ka panga uukuume wopothingo nayo. Ihe uukuume mboka masiku otawu ka kala wolelalela.

10. Oshike tatu ka nyanyukilwa mOparadisa?

10 Kaleka etegameno lyoye lya tsa momadhiladhilo. Aalumentu naakiintu aadhiginini oya kala haya nkondopalekwa aluhe ketegameno ndyoka Kalunga he ya pe. Mbela nangoye ohali ku nkondopaleke? Pashiholelwa, dhiladhila kenyanyu ndyoka to ka kala wu na sho to ka mona aapiya yaKalunga aadhiginini mboka ‘taya ka yumuka kuusi.’ (Lesha Iilonga 24:15.) Omapulo geni wa hala oku ke ya pula?

11, 12. Muuyuni uupe omapulo geni tashi vulika wu ka pule (a) Abel? (b) Noowa? (c) Abraham? (d) Rut? (e) Abigajil? (f) Ester?

11 Ngele owa tsakanene naAbel, mbela ino hala oku ke mu pula kutya aavali ye oya li ye li ngiini? Nenge wu mu pule kutya: “Mbela opu na ngaa esiku wa popile naakerubi mboka ya li haya keelele poshikunino shaEden? Mbela oya li ye ku yamukula?” Ongiini kombinga yaNoowa? Oto vulu oku mu pula to ti: “Mbela owa li ho kala wa tila Aalefule? Iinamwenyo ayihe mbyoka ya li monguluwato omvula ndjoka owa li we yi sile ngiini oshimpwiyu?” Ngele owa ka mona Abraham oto vulu oku mu pula ngeyi: “Mbela omwa li mu shaathane naSem? Olye e ku longa kombinga yaJehova? Mbela osha li oshidhigu okuza mo muUr?”

12 Natu taleni ishewe komapulo gamwe ngoka tashi vulika wu ka pule aakiintu aadhiginini mboka taya ka yumudhwa. “Rut, oshike sha li she ku itaalitha wu ninge omulongeli gwaJehova?” “Abigajil, mbela owa li wa tila okulombwela Nabal nkene wa kwathele David?” “Ester, konima yaashono sha popiwa mOmbiimbeli, onkalamwenyo yeni naMordekai oya ka kala ngiini?”

13. (a) Omapulo geni tashi vulika aayumudhwa ye ke ku pule? (b) Owu uvite ngiini kombinga yetegameno lyoku ka mona aalumentu naakiintu aadhiginini yonale?

13 Aalumentu naakiintu aadhiginini mboka nayo otashi vulika ya ka kale ye na omapulo ogendji oku ku pula. Ito ka kala tuu wa nyanyukwa oku ya lombwela kombinga yomasiku omadhigu gahugunina nokombinga yankene Jehova a li a yambeke oshigwana she momathimbo omadhigu! Kapu na omalimbililo kutya otaya ka kala ya nyanyukwa okuuva nkene Jehova a li a gwanitha po omauvaneko ge agehe. Muuyuni uupe itashi ka kala we oshidhigu okudhiladhila kombinga yaapiya yaKalunga aadhiginini mboka ya popiwa mOmbiimbeli, molwaashoka otaya ka kala pamwe natse mOparadisa. Onkee ano, ninga ngaashi to vulu ngashingeyi aantu mboka wu kale we ya tala ko yolela. Tsikila okuholela eitaalo lyawo. Nyanyukilwa okulongela Jehova pamwe nayo ye li ookuume koye aaholike sigo aluhe.