OU WETE shoka omukadhona nookuume ke mbaka taa lesha? Eeno, olyo embo ndika ndyoka ngoye to lesha ngashingeyi—Embo Lyandje lyOmahokololo gOmbimbeli. Notaa lesha ehokololo lya faathana naandyoka ngoye to lesha ngashingeyi—“Nkene Tatu Vulu Okukala nOmwenyo sigo Aluhe.”

Okamati taka lesha

Owa tseya mbela kutya yo otayi ilongo shike? Shotango, osho kutya tse otu na okutseya Jehova nOmwana gwe Jesus ngele otwa hala okukala nomwenyo sigo aluhe. Ombimbeli otayi ti: ‘Komukalo ngoka omuntu ota vulu okukala nomwenyo sigo aluhe: Ilonga kombinga yaKalunga awike kashili, nOmwana ngoka ye a tuma kombanda yevi, Jesus Kristus.’

Ongiini tse tatu vulu okwiilonga kombinga yaJehova Kalunga nOmwana gwe Jesus? Omukalo gumwe ogwo okulesha Embo Lyandje lyOmahokololo gOmbimbeli okuza ketameko sigo okehulilo. Otali hokolola oshindji kombinga yaJehova naJesus, hasho mbela? Notali hokolola oshindji kombinga yiinima mbyoka yo ya ningi nale naambyoka yo taa ka ninga natango. Ihe tse otu na okuninga oshindji shi vulithe okulesha owala embo ndika.

Ombiimbeli

Ou wete embo lilwe polupanda? Olyo Ombimbeli. Gumwe ne ku leshele iitopolwa mOmbimbeli hoka omahokololo membo ndika ga kankamena. Ombimbeli otayi tu pe omayelithilo agehe ngoka tse twa pumbwa opo tu longele Jehova komukalo gu uka nokumona omwenyo gwaaluhe. Ano tse otu na oku shi ninga omukalondjigilile okukonakona Ombimbeli aluhe.

Ihe inashi gwana okwiilonga owala kombinga yaJehova Kalunga naJesus Kristus. Tse otatu vulu okukala tu na ontseyo oyindji noonkondo kombinga yawo nokombinga yomalongo gawo, ihe nonatango itatu mono omwenyo gwaaluhe. Owa tseya mbela kutya oshike sha pumbiwa natango?

Tse otu na wo okukala painima mbyoka twi ilonga. Oto dhimbulukwa mbela Judas Iskariot? Ye okwa li gumwe gwomwaamboka 12 mboka Jesus a hogolola oyo aayapostoli ye. Judas okwa li e na ontseyo oyindji kombinga yaJehova naJesus. Ihe oshike she mu ningilwa? Konima yokathimbo ye okwa ningi omwiiholimwene nokwa gwaaleke Jesus molwiisiliveli 30 oku mu gandja kaatondi ye. Ano Judas ita ka mona omwenyo gwaaluhe.

Oto dhimbulukwa mbela Gehasi, omulumentu ngoka tse twi ilongo mEhokololo 69? Ye okwa halele oonguwo niimaliwa mbyoka kaayi shi ye. Ano ye okwa hokolola iifundja opo a mone iinima mbika. Ihe Jehova okwe mu geyele. Note ke tu geyela wo ngele tse itatu vulika koompango dhe.

Ihe opu na aantu oyendji aawanawa mboka ya li ya longele Jehova aluhe nuudhiginini. Tse otwa hala okukala twe ya fa, hasho mbela? Omugundjuka Samuel oye oshiholelwa oshiwanawa okulandulwa. Dhimbulukwa, ngaashi twe shi mono mEhokololo 55, ye okwa li owala e na oomvula ne nenge ntano sho ye a tameke okulongela Jehova metsalihangano lye. Ano nonando ngoye ou kale omushona shi thike peni, ku shi omushona unene nokulongela Jehova.

Dhoshili, Jesus Kristus oye omuntu ngoka tse atuhe twa hala okulandula. Nokuli sho ye a li okamati, ye okwa li hwiyaka motempeli ta popi nayalwe kombinga yaHe gwomegulu, ngaashi Ehokololo 87 tali ulike. Natu landule oshiholelwa she. Natu hokololele aantu oyendji ngaashi tashi vulika kombinga yaJehova Kalunga ketu omukumithi nOmwana gwe, Jesus Kristus. Ngele tse otatu ningi iinima mbika, tse otatu vulu oku ka kala nomwenyo sigo aluhe moparadisa ompe yaKalunga kombanda yevi.

Johannes 17:3; Epsalmi 145:1-21.



Omapulo

Omapulo ga gwedhwa po

  • Lesha Johannes 17:3.

    Omanyolo otagu ulike ngiini kutya okumona ontseyo yokutseya Jehova Kalunga nosho wo Jesus Kristus otashi ti oshindji kaashi shi owala okwiilonga momutse omauyelele? (Mat. 7:21; Jak. 2:18-20; 1 Joh. 2:17)

  • Lesha Epsalmi 145:1-21.

    Gamwe gomomatompelo ogendji ngoka tu na omolwokuhambelela Jehova ogeni? (Eps. 145:8-11; Eh. 4:11)

    Ongiini Jehova “e na ombili naantu ayehe,” nongiini shoka shi na oku tu hilila natango popepi naye? (Eps. 145:9; Mat. 5:43-45)

    Ngele otu hole Jehova, otashi ke tu inyengitha tu ninge shike? (Eps. 119:171, 172, 175; 145:11, 12, 21)