Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 114: Ehulilo lyUuwinayi Auhe

Ehokololo 114: Ehulilo lyUuwinayi Auhe

OSHIKE u wete mpaka? Eeno, etanga lyaakwiita ya londa kuukambe uutokele. Ihe tala mpoka yo taa zi. Uukambe otau matuka miikogo tau zi megulu! Mbela omu na ngaa shili uukambe megulu?

Jesus e li Omukwaniilwa megulu

Aawe, kau shi uukambe wo wene. Tse otu shi shi, oshoka uukambe itau vulu okumatuka miikogo, hasho mbela? Ihe Ombimbeli otayi popi kombinga yuukambe womegulu. Owa tseya kutya omolwashike?

Osho molwashoka nale uukambe owa longithwa olwindji pethimbo lyiita. Ano Ombimbeli otayi hokolola kombinga yaantu mboka ya londa kuukambe okuza megulu okuulika kutya Kalunga ota ka hingila aantu yokombanda yevi iita. Owa tseya kutya ehala lyolugodhi nduka ohali ithanwa ngiini? OHarmagedon. Iita mbyoka otayi ka hanagula po uuwinayi auhe kombanda yevi.

Jesus oye Ngoka ta ka kwatela komeho molugodhi lwiita mbika puHarmagedon. Dhimbulukwa kutya Jesus oye ngoka a hogololwa kuJehova okukala omukwaniilwa gwepangelo Lye. Osho molwashoka ye a zala oshishani. Negongamwele otali ulike kutya ye ota ka dhipaga po aatondi yaKalunga ayehe. Mbela tse otu na okukala twa kumwa molwashoka Kalunga ota ka hanagula po aantu ayehe aawinayi?

Tala konima kEhokololo 10. Ou wete shike mpoka? Eeno, Eyelu enene ndyoka tali hanagula po aantu aawinayi. Olye e eta Eyelu ndyoka? OJehova Kalunga. Tala ngashingeyi kEhokololo 15. Oshike tashi ningwa mpoka? Sodom naGomorra otayi hanagulwa po komulilo ngoka Jehova a tumu.

Yanuna kEhokololo 33. Tala shoka tashi ningilwa uukambe nomatembalugodhi gAaegipiti. Olye e ya kungulukithile omeya? OJehova. Ye okwe shi ningi okugamena oshigwana she. Tala kEhokololo 76. Ngoye oto ka mona mpoka kutya Jehova ota hanagulitha po nokuli oshigwana she Aaisrael molwuuwinayi washo.

Ano kashi na oku tu kumitha ngele Jehova ta ka tuma omatanga ge gaakwiita yomegulu okuhulitha po uuwinayi auhe kombanda yevi. Ihe dhiladhila owala shoka tashi ka tya! Yanuna ko e to tala.

Ehololo 16:16; 19:11-16.



Omapulo

  • Omolwashike Ombimbeli tayi popi uukambe womegulu?
  • Iita yaKalunga yokukondjitha aantu aawinayi kombanda yevi ohayi ithanwa ngiini, niita mbyoka elalakano lyayo olyashike?
  • Mefano moka, olye Ngoka ta yi a ka kwatele komeho olugodhi, omolwashike a zala oshishani, negongamwele lye otali ti shike?
  • Okutala kEhokololo eti-10, eti-15 neti-33, omolwashike kaatu na okukala twa kumwa sho Kalunga ta ka hanagula po aantu aawinayi?
  • Ongiini Ehokololo eti-36 neti-76 tali ulike kutya Kalunga ota ka hanagula po aantu aawinayi nokuli nonando otaya ti otaye mu longele?

Omapulo ga gwedhwa po

  • Lesha Ehololo 19:11-16.

    Omanyolo otage shi yelitha ngiini kutya Jesus Kristus oye a londa kokakambe okatokele? (Eh. 1:5; 3:14; 19:11; Jes. 11:4)

    Ongiini ombinzi ndjoka ya shashaminwa konguwo yaJesus yokombanda tayi koleke kutya ota ka sindana thiluthilu? (Eh. 14:18-20; 19:13; Jes. 63:1-6)

    Osha yela kutya oolye taya ka kala ya kwatelwa maakwiita mboka ya landula Jesus e li kokakambe ke okatokele? (Eh. 12:7; 19:14; Mat. 25:31, 32)