Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 113: Paulus muRoma

Ehokololo 113: Paulus muRoma

OU WETE Paulus ngoka e li momalyenge? Opu na wo omukwiita Omuroma ngoka te mu tonatele. Paulus oye onkwatwa muRoma. Ye okwa tegelela Omukeesali gwaRoma a tokole shoka ye ta ningilwa. Manga ye onkwatwa, aantu otaa pitikwa ye mu talele po.

Konima yomasiku gatatu sho Paulus e ya muRoma, ye ota hiya aawiliki yontumba Aajuda ye mu talele po. Ano oyendji yomAajuda yomuRoma otaye ya. Paulus ote ya uvithile kombinga yaJesus nUukwaniilwa waKalunga. Yamwe oyi itaale noya ningi Aakriste, ihe yalwe inayi itaala.

Paulus mondholongo

Paulus otu uvithile wo aakwiita yi ili noyi ili mboka ye na oku mu tonatela. Uule woomvula mbali ndhoka ye e li mpaka oye onkwatwa, Paulus ota tsikile nokuuvithila ayehe mboka ye ta tsakaneke. Ano nokuli uukwanegumbo wOmukeesali otau uvu kombinga yonkundana ombwanawa yUukwaniilwa, yamwe yomuyo notaa ningi Aakriste.

Ihe olye omutalelipo ngoka a kuutumba poshitaafula nota nyola? Oto vulu okutengeneka mbela? Eeno, oye Timoteus. Timoteus naye wo okwa li mondholongo molwashoka ye u uvitha kombinga yUukwaniilwa, ihe ye okwa mangululwa mo ishewe. Nokwe ya a kwathe Paulus. Owa tseya mbela kutya Timoteus ota nyola shike? Natu tale.

Oto dhimbulukwa mbela oshilando shaFilippi noshaEfeso mEhokololo 110? Paulus okwa kwathele okutota omagongalo gAakriste miilando mbyoka. Manga Paulus e li mondholongo, ye ota nyolele Aakriste mboka oombilive. Oombilive omo dhi li mOmbimbeli, nohadhi ithanwa Aaefeso nAafilippi. Paulus ota hokololele Timoteus mpaka shoka e na okunyolela ookuume ke Aakriste yomuFilippi.

Aafilippi oya li ye li nawa kuPaulus. Yo oye mu tumine omagano mpaka mondholongo, ano Paulus ote ya pandula molwago. Epafroditus oye ngoka e eta omagano. Ihe ye okwa li te ehama noonkondo nokonyala a se. Ngashingeyi ye oku li ishewe nawa nokwi ilongekidha okushuna kegumbo. Ye ota ka faalela ombilive ndjika ya zi kuPaulus naTimoteus uuna ye ta shuna kuFilippi.

Manga ye e li mondholongo, Paulus ota nyola natango oombilive mbali ndhoka dhi li mOmbimbeli. Yimwe oyAakriste yomoshilando shaKolossa. Owa tseya mbela kutya ohayi ithanwa ngiini? Aakolossa. Onkwawo oyo ombilive yopaumwene yakuume ke kopothingo gwedhina Filemon ngoka a kala wo muKolossa. Ombilive ndjika oyi na ko nasha nomupiya gwaFilemon Onesimus.

Onesimus okwa yi Filemon ontuku nokwa yi kuRoma. Ano Onesimus oku uvu kutya Paulus oku li mondholongo muka. Ye okwe ya e mu talele po, Paulus noku uvithile Onesimus. Mbala Onesimus okwa ningi wo Omukriste. Ngashingeyi Onesimus oku uvite nayi sho ye a yi ontuku. Owa tseya mbela kutya Paulus ota nyola shike mombilive ndjika yaFilemon?

Paulus ota pula Filemon a dhimine po Onesimus. ‘Otandi mu tumine kungoye,’ Paulus ta nyola. ‘Ihe ngashingeyi ye ke shi owala omupiya gwoye. Ye omumwanyoko wo Omukriste omwaanawa.’ Sho Onesimus ta shuna kuKolossa, ye ota faalele oombilive ndhika mbali, yimwe oyAakolossa nonkwawo oyaFilemon. Tse otatu vulu okudhiladhila owala nkene Filemon a nyanyukwa sho ye tu uvu kutya omupiya gwe okwa ninga Omukriste.

Sho Paulus ta nyolele kAafilippi nokuFilemon, ye oku na onkundana ombwanawa noonkondo. ‘Otandi tumu Timoteus kune,’ Paulus ta ti kAafilippi. ‘Ihe otandi mu talele po wo mbala.’ NokuFilemon ye ota nyola: ‘Longekidhila ndje ehala lyokukala hoka pune.’

Sho Paulus ta mangululwa mo, ye ota talele po aamwayina Aakriste aalumentu naakiintu momahala ogendji. Ihe konima Paulus okwa ningi ishewe onkwatwa muRoma. Oshikando shika ye oku shi shi kutya ye ota ka dhipagwa. Ano ye ota nyolele Timoteus note mu pula e ye mbala. ‘Ngame onda li omudhiginini muKalunga,’ Paulus ta nyola, ‘Kalunga nota ka pa ndje ondjambi.’ Oomvula oonshona konima yeso lyaPaulus, Jerusalem otashi hanagulwa po, oshikando shika okAaroma.

Ihe Ombimbeli oyi na natango oshindji. Jehova Kalunga ota nyolitha omuyapostoli Johannes omambo gOmbimbeli gahugunina, mwa kwatelwa Ehololo. Embo ndika otali hokolola kombinga yonakuyiwa. Natu tale ngashingeyi kutya onakuyiwa oya kwatela mo shike.

Iilonga 28:16-31; Aafilippi 1:13; 2:19-30; 4:18-23; Aaheberi 13:23; Filemon 1-25; Aakolossa 4:7-9; 2 Timoteus 4:7-9.



Omapulo

  • Paulus okwa li u uvithile oolye sho a li mondholongo muRoma?
  • Omutalelipo ngoka e li poshitaafula mefano moka oye lye, nota ningile shike Paulus?
  • Epafroditus oye lye, noshike a li e ya nasho sho a galuka kuFilippi?
  • Omolwashike Paulus a li a nyolele ontumwafo kukuume ke kopothingo Filemon?
  • Oshike Paulus a li a ningi sho a mangululwa, noshike sha li she mu ningilwa konima yethimbo?
  • Olye Jehova a li a longitha okunyola omambo gahugunina gOmbimbeli, noshike embo lyEhololo tali hokolola?

Omapulo ga gwedhwa po

  • Lesha Iilonga 28:16-31 nAafilippi 1:13

    Paulus okwa li a longitha ngiini ethimbo lye manga a li mondholongo muRoma, noshizemo shini eitaalo lye lya kola lya li li na kegongalo lyopaKriste? (Iil. 28:23, 30; Fil. 1:14)

  • Lesha Aafilippi 2:19-30

    Oohapu dholupandu dhini Paulus a li a popi shi na ko nasha naTimoteus naEpafroditus, nongiini tatu vulu okulandula oshiholelwa shaPaulus? (Fil. 2:20, 22, 25, 29, 30; 1 Kor. 16:18; 1 Tes. 5:12, 13)

  • Lesha Filemon 1-25.

    Okekankameno lini Paulus a li a ladhipike Filemon a ninge shoka shu uka, nongiini shoka shi li oshiholelwa kaakuluntugongalo nena? (Filem. 9; 2 Kor. 8:8; Gal. 5:13)

    Ongiini oohapu dhaPaulus tadhi adhika muFilemon 13, 14 tadhi ulike kutya okwa li a simaneka omaiyuvo gayalwe megongalo? (1 Kor. 8:7, 13; 10:31-33)

  • Lesha 2 Timoteus 4:7-9

    Ngaashi omuyapostoli Paulus, ongiini tatu vulu okukala neinekelo kutya Jehova ote ke tu pa ondjambi ngele tatu kala aadhiginini sigo ehulilo? (Mat. 24:13; Heb. 6:10)