Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 110: Timoteus — omukwathi omupe gwaPaulus

Ehokololo 110: Timoteus — omukwathi omupe gwaPaulus

OMULUMENTU omugundjuka ngoka ngoye u wete mpaka e li pamwe nomuyapostoli Paulus, oye Timoteus. Timoteus okwa kala pamwe nuukwanegumbo we muListra. Edhina lyayina oEunike nolyayinakulu oLoide.

Osho oshikando oshititatu Paulus ta talele po Listra. Konyala omvula yimwe sho ya piti po Paulus naBarnabas oyi ile oshikando shotango okutalela po mpaka pethimbo lyolweendo lwetumo. Nonga-shingeyi Paulus okwa galuka pamwe nakuume ke Silas.

Timoteus naPaulus

Owa tseya mbela kutya Paulus ota ti shike kuTimoteus? ‘Ngoye owa hala mbela okuya pamwe nangame naSilas?’ ye ta pula. ‘Tse otatu vulu okulongitha ekwatho lyoye uuna tatu uvithile aantu yokomahala gokokule.’

‘Eeno,’ Timoteus ta yamukula, ‘ngame onda halelela okuya pamwe nane.’ Ano mbala konima yethimbo Timoteus ota thigi po uukwanegumbo we nota yi pamwe naPaulus naSilas. Ihe manga tse inaatu hokolola olweendo lwawo, natu tale tango shoka sha ningilwa Paulus pokati mpono. Odho oomvula 17 okuza sho Jesus e mu ihololele mondjila yokuDamasko.

Dhimbulukwa kutya Paulus okwa yile kuDamasko okutidhagula aalongwa yaJesus, ihe ngashingeyi oye mwene omulongwa! Konima yamwe yomaatondi ye otaa dhiladhila okudhipaga Paulus, oshoka yo kaye hole elongo lye kombinga yaJesus. Ihe aalongwa otaa kwatha Paulus a ye ontuku. Yo otaye mu tula moshimbamba notaye mu kulukithile kombanda yenkolokuma lyoshilando.

Konima Paulus ota yi a ka uvithe muAntiokia. Moka aalanduli yaJesus oyi ithanwa lwotango Aakriste. Opo nduno Paulus naBarnabas okuza muAntiokia otaa tumwa molweendo lwetumo okuya kiilongo yokokule. Shimwe shomiilando mbyoka yo taa talele po osho Listra, moka mwa kala Timoteus.

Sho omvula yimwe konyala ya piti po, Paulus ota galukile muListra pethimbo lyolweendo olutiyali. Owa tseya kutya openi yo taa yi uuna Timoteus ta yi pamwe naPaulus naSilas? Tala kokaalita e to ilongo okutseya gamwe gomomahala.

Yo otaa yi tango popepi puIkonio, opo nduno okoshilando oshitiyali shedhina Antiokia. Konima otaa yi kuTroas, nopo nduno okuFilippi, Tessalonika naBerea. Ou wete Atena mokaalita? Paulus otu uvitha hoka. Konima yaashono yo otayu uvitha omvula netata muKorinto. Lwahugunina yo otaa talele po paufupi muEfeso. Opo nduno otaa sayila okuya kuKesarea, notaa yi kuAntiokia, hoka Paulus a kala.

Ano Timoteus ohe ende ookilometa omathele nomathele okukwathela Paulus okuuvitha “onkundana ombwanawa” nokutota omagongalo ogendji gAakriste. Ngele ngoye wa koko, oto ka kala ngaa mbela omupiya gwaKalunga omudhiginini ngaashi Timoteus?

Iilonga 9:19-30; 11:19-26; ontopolwa 13 sigo 17; 18:1-22.

Okaalita

1. Roma; 2. Malta; 3. Berea; 4. Tessalonika; 5. Korinto; 6. Filippi; 7. Atena; 8. Kreta; 9. Troas; 10. Efeso; 11. Mileto; 12. Kolossa; 13. Antiokia; 14. Ikonia; 15. Listra; 16. Kipro; 17. Antiokia; 18. Kesarea; 19. Joppe; 20. Damasko; 21. Jerusalem; 22. Efuta Enene (Efuta lyoPokati)



Omapulo

  • Omulumentu omugundjuka ngoka e li mefano moka oye lye, nedhina lyayina nolyayinakulu olini?
  • Timoteus okwa li a popi shike sho Paulus a li e mu pula ngele okwa hala okuya pamwe naSilas naPaulus ye ku uvithile aantu yokokule?
  • Openi aalanduli yaJesus ya li yi ithanwa lwotango Aakriste?
  • Konima sho Paulus, Silas naTimoteus ya zi muListra, iilando yimwe yini ya li ya talele po?
  • Timoteus okwa li a kwathele ngiini Paulus, nepulo lini aagundjuka ye na okwiipula nena?

Omapulo ga gwedhwa po

  • Lesha Iilonga 9:19-30.

    Ongiini omuyapostoli Paulus a li u ulike oondunge dhokuyoolola sho a li a taalelwa komapataneko ge na ko nasha nonkundana ombwanawa? (Iil. 9:22-25, 29, 30; Mat. 10:16)

  • Lesha Iilonga 11:19-26.

    Ehokololo lya nyolwa mIilonga 11:19-21, 26 otali ulike ngiini kutya ombepo yaJehova ohayi kwatele komeho nohayi wilike iilonga yeuvitho?

  • Lesha Iilonga 13:13-16, 42-52.

    Iilonga 13:51, 52 otayi ulike ngiini kutya aalongwa kaya li ye etha omapataneko ge ya teye omukumo? (Mat. 10:14; Iil. 18:6; 1 Pet. 4:14)

  • Lesha Iilonga 14:1-6, 19-28.

    Uutumbulilo “oye ya gandja kOmuwa” otau tu kwathele ngiini tu manguluke ko kiimpwiyu kehe inaayi pumbiwa ngele tatu kwathele mboka aape? (Iil. 14:21-23; 20:32; Joh. 6:44)

  • Lesha Iilonga 16:1-5.

    Ongiini ehalo lyaTimoteus okufukalekwa lya tsu omuthindo esimano lyokuninga ‘ayihe omolwevaangeli?’ (Iil. 16:3; 1 Kor. 9:23; 1 Tes. 2:8)

  • Lesha Iilonga 18:1-11, 18-22.

    Iilonga 18:9, 10 otayi ulike shike shi na ko nasha nokukutha ombinga kwaJesus paumwene mokuwilika iilonga yeuvitho, neinekelo lini shoka tashi tu pe? (Mat. 28:20)

Tseya oshindji

LONGA AAMWOYE

Timoteus okwa li a hala okukwathela aantu

Ongiini to vulu okukala nonkalamwenyo yinyanyudha noyituntula, ngaashi Timoteus?