Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 107: Stefanus Ta Dhipagwa nOmamanya

Ehokololo 107: Stefanus Ta Dhipagwa nOmamanya

OYE Stefanus ngoka ta tsu oongolo mpaka. Ye omulongwa omudhiginini gwaJesus. Ihe tala shoka tashi mu ningilwa ngashingeyi! Aalumentu mbaka otaye mu dhaadhiga nomamanya omanene. Omolwashike yo ye tonde Stefanus unene ngawo opo ye mu ningile oshinima shino oshitilithi? Natu tale.

Stefanus ta dhipagwa

Kalunga okwa kwatha Stefanus okulonga iikumithalonga. Aalumentu mbaka inaye shi hala, ano otaye mu pataneke molwashoka ye ota longo oshigwana oshili. Ihe Kalunga ota pe Stefanus omayele ogendji, Stefanus nota holola kutya aalumentu mbaka ohaa longo aantu iinima yiifundja. Otashi ya geyitha nokuli noonkondo. Ano yo otaye mu kwata notaya kongo aantu ya hokolole iifundja kombinga ye.

Omusaaseri omukuluntu ota pula Stefanus: ‘Iinima mbika oyoshili?’ Stefanus ota yamukula mokuninga oshipopiwa sha tsa sha za mOmbimbeli. Lwokehulilo ye ota hokolola nkene aalumentu aawinayi methimbo lya piti ya li ye tonde aaprofeti yaJehova. Opo nduno ota ti: ‘Ne omwa fa naanaa aalumentu mbeyaka. Ne omwa dhipaga omupiya gwaKalunga Jesus noihamu dhiginine oompango dhaKalunga.’

Shika otashi geyitha aawiliki yomalongelokalunga mbaka noonkondo! Yo otayi ikokota komayego molwondjahi. Opo nduno Stefanus ota ligamene kegulu nota ti: ‘Tala! Ngame ondi wete Jesus a thikama kolulyo lwaKalunga megulu.’ Opo mpoka aalumentu mbaka otaa thitike omakutsi gawo niikaha yawo notaa nukile Stefanus. Yo otaye mu kwata notaye mu kokolola mo moshilando.

Hoka yo otaa hula mo oonguwo dhawo notaye dhi thigi metonatelo lyomulumentu omugundjuka Saulus. Saulus ou mu wete? Opo nduno yamwe yomaalumentu otaa tameke okudhaadhiga Stefanus nomamanya. Stefanus ota tsu oongolo, ngaashi to vulu oku shi mona mpaka, nota galikana kuKalunga: ‘Jehova, ino ya geyelela oshilonga shika oshiwinayi.’ Ye okwa tseya kutya yamwe yomuyo oya pukithwa kaawiliki yomalongelokalunga. Konima yaashika Stefanus ota si.

Uuna gumwe te ku ningile uuwinayi, ngoye oto kambadhala mbela oku mu ehameka wo nenge okupula Kalunga oye e mu ehameke? Shika hasho Stefanus nenge Jesus ya ningi. Yo oya li aanambili nokuli naamboka ya li kaaye na ombili nayo. Natu kambadhale tu landule oshiholelwa shawo.

Iilonga 6:8-15; 7:1-60.



Omapulo

  • Stefanus oye lye, na Kalunga okwa li e mu kwatha a ninge shike?
  • Stefanus okwa li a popi shike shoka sha li sha geyitha noonkondo aawiliki yelongelokalunga?
  • Sho aalumentu ya li ya kokololele Stefanus pondje yoshilando, oye mu ningile shike?
  • Mefano moka, omulumentu omugundjuka ngoka a thikama poondjatha oye lye?
  • Manga Stefanus inaa sa, okwa li a galikana shike kuJehova?
  • Mokuholela Stefanus, oshike tu na okuninga ngele gumwe te tu ningile sha oshiwinayi?

Omapulo ga gwedhwa po

  • Lesha Iilonga 6:8-15.

    Omikalo omipukithi dhini aawiliki yomalongelokalunga ya li ya longitha mokukambadhala okuya moshipala iilonga yokuuvitha yOonzapo dhaJehova? (Iil. 6:9, 11, 13)

  • Lesha Iilonga 7:1-60.

    Oshike sha li sha kwathele Stefanus oku shi pondola mokupopila onkundana ombwanawa koshipala shoSanhedrin, noshike tatu vulu okwiilonga moshiholelwa she? (Iil. 7:51-53; Rom. 15:4; 2 Tim. 3:14-17; 1 Pet. 3:15)

    Iikala yini tu na okukala tu na shi na ko nasha naapataneki yiilonga yetu? (Iil. 7:58-60; Mat. 5:44; Luk. 23:33, 34)