Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 106: Emangululo mondholongo

Ehokololo 106: Emangululo mondholongo

TALA komuyengeli ngoka te egulula omweelo gwondholongo. Aalumentu mboka ye ta mangulula mo, oyo aayapostoli yaJesus. Natu tale kutya omolwashike yo ya tulwa mondholongo.

Omuyengeli ta mangulula aayapostoli

Osho owala okathimbo okafupi okuza sho ombepo ondjapuki ya tililwa maalongwa yaJesus. Nosho shika tashi ningwa po: Omutenya gumwe Petrus naJohannes otaa yi kotempeli muJerusalem. Hoka, popepi nomweelo, opu na omulumentu ngoka a kala oshitiningili uule wonkalamwenyo ye ayihe. Aantu ohaye mu fala ongula kehe hoka opo a vule okuhehela iimaliwa kwaamboka taye ya kotempeli. Sho ye a mono Petrus naJohannes, ye ota hehela wo kuyo. Aayapostoli otaa ka ninga po nee ngiini?

Yo otaa thikama ya mwena notaa tala komulumentu. ‘Ngame kandi na iimaliwa,’ Petrus ta ti, ‘ihe otandi ku pe shoka ndi na. Medhina lyaJesus, thikama ngoye u ende!’ Petrus ota kwata nduno oshikaha shomulumentu shokolulyo, nomulumentu ota nuka po mbala nota tameke te ende. Sho aantu taye shi mono, yo oya kumwa noya nyanyukwa noonkondo kombinga yoshikumithalonga shika.

‘Osho koonkondo dhaKalunga, ngoka a yumudha Jesus, tse twa longo oshikumithalonga shika,’ Petrus ta ti. Manga ye naJohannes natango taa popi, aawiliki yomalongelokalunga otaye ya po. Yo oya geya molwashoka Petrus naJohannes taa hokololele oshigwana kutya Jesus okwa yumuka. Ano otaye ya kwata notaye ya umbile mondholongo.

Esiku lya landula aawiliki yomalongelokalunga oye na oshigongi oshinene. Petrus naJohannes nomulumentu ngoka yo ya aludha, otaye etwa mo. ‘Okoonkondo dhalye ne mwa longo oshikumithalonga shika?’ aawiliki yomalongelokalunga taa pula.

Petrus ote ya lombwele kutya okoonkondo dhaKalunga, ngoka a yumudha Jesus. Aasaaseri kaye shi wo shoka ye na okuninga, oshoka yo itaa vulu okwiidhimbika kutya oshikumithalonga shika inashi longwa shili. Ano yo otaa londodha aayapostoli yaa popye we kombinga yaJesus, notaye ya etha ya ye.

Aayapostoli otaa tsikile nokuuvitha kombinga yaJesus nokwaaludha aavu. Onkundana kombinga yiikumithalonga mbika otayi taandele. Ano nokuli oongundu dhaantu yomoondoolopa dhomomudhingoloko gwaJerusalem otadhi eta aavu kaayapostoli ya aludhwe. Otashi tsitha ondumbo aawiliki yomalongelokalunga, ano yo otaa kwata aayapostoli notaye ya umbile mondholongo. Ihe yo itaa kala mo ethimbo ele.

Uusiku omuyengeli gwaKalunga ote egulula omweelo gwondholongo, ngaashi to vulu okumona mpaka. Omuyengeli ota ti: ‘Indeni kotempeli ne mu tsikile nokupopya naantu.’ Sho ongula ya landula aawiliki yomalongelokalunga ya tumu aalumentu kondholongo ya ka tale aayapostoli, yo kaye mo. Konima aalumentu otaye ya mono yi ipyakidhila nokulonga aantu motempeli notaye ye eta koshinyanga shaSanhedrin.

‘Tse otwe mu lombwele sha yela mwaa longe we kombinga yaJesus,’ aawiliki yomalongelokalunga taa ti. ‘Ihe ne omu udhitha Jerusalem nelongo lyeni.’ Opo nduno aayapostoli otaa yamukula: ‘Tse otu na okuvulika kuKalunga shi vulithe kaantu.’ Ano yo otaa tsikile nokuuvitha “onkundana ombwanawa.” Shika oshiholelwa oshiwanawa kutse, hasho mbela?

Iilonga ontopolwa 3 sigo 5.



Omapulo

  • Oshike sha li sha ningilwa Petrus naJohannes omutenya gumwe sho ya li taya yi kotempeli?
  • Petrus okwa li a lombwele shike omulumentu oshilema, noshike Petrus a li e mu pe shi na ongushu onene yi vule yiimaliwa?
  • Omolwashike aawiliki yelongelokalunga ya li ya geya, noshike ya li ya ningile Petrus naJohannes?
  • Petrus okwa li a lombwele shike aawiliki yelongelokalunga, nelondodho lini aayapostoli ya li ya pewa?
  • Omolwashike aawiliki yelongelokalunga ya li ya sa efupa, ihe oshike sha li sha ningwa po sho aayapostoli ya li ya tulwa mondholongo oshikando oshitiyali?
  • Aayapostoli oya yamukulile ngiini sho ya li ye etwa moshinyanga shoSanhedrin?

Omapulo ga gwedhwa po

  • Lesha Iilonga 3:1-10.

    Nonando katu na oonkondo dhokulonga iikumithalonga nena, ongiini oohapu dhaPetrus dha nyolwa mIilonga 3:6 tadhi tu kwathele okuuva ko ongushu yetumwalaka lyUukwaniilwa? (Joh. 17:3; 2 Kor. 5:18-20; Fil. 3:8)

  • Lesha Iilonga 4:1-31.

    Ngele twa taalela omapataneko muukalele, omomukalo guni tu na okuholela aamwatate Aakriste yomethelemimvo lyotango? (Iil. 4:29, 31; Ef. 6:18-20; 1 Tes. 2:2)

  • Lesha Iilonga 5:17-42.

    Ongiini yamwe mboka kaaye shi Oonzapo yonale noyongashingeyi yu ulike ondjaalela shi na ko nasha niilonga yeuvitho? (Iil. 5:34-39)