Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 105: Oya Tegelela muJerusalem

Ehokololo 105: Oya Tegelela muJerusalem

AANTU mbaka oyo aalanduli yaJesus. Yo oya vulika kuye noya kala muJerusalem. Manga yo ya tegelela ayehe pamwe, ekudhilo olyu udha egumbo alihe. Otali inyenge lya fa okambiya hoka taka pepe. Nopo nduno elaka lyomulilo otali holoka kombanda yomutse gwomulongwa kehe. Ngoye oto vulu mbela okumona omulilo kombanda yomutse gwakehe gumwe? Ayihe mbino otayi ti shike?

Aalongwa yomethelemumvo lyotango taya tililwa ombepo ondjapuki

Osho oshikumithalonga! Jesus oku li megulu puHe, nota tilile aalanduli ye ombepo ondjapuki yaKalunga. Owa tseya mbela kutya ombepo ndjika otayi ya longitha shike? Yo ayehe otaa tameke okupopya momalaka gi ili nogi ili.

Aantu oyendji muJerusalem otayu uvu ewi ndyoka tali inyenge lya fa okambiya, notaye ya ya tale shoka tashi ningwa po. Yamwe yomaantu mboka oya zi miigwana yilwe noye ya koshituthi shAaisrael shaPentekoste. Alikana onkumwe oyi thike peni aayenda mbano taa mono! Yo otayu uvu nkene aalongwa taa popi momalaka gawo yene kombinga yiinima iikumithi mbyoka Kalunga a ningi.

‘Aantu mbaka ayehe oyokuGalilea,’ aayenda taa ti. ‘Ongiini ano tashi vulika yo ya popye momalaka gi ili nogi ili gokiilongo hoka tse twa zi?’

Ngashingeyi Petrus ota thikama e ya yelithile. Ye ota fala ewi lye pombanda nota hokololele aantu nkene Jesus a dhipagwa nonokutya Jehova okwe mu yumudha. ‘Ngashingeyi Jesus oku li megulu kolulyo lwaKalunga,’ Petrus ta ti. ‘Noye a tilile ombepo ondjapuki yu uvanekwa. Osho molwashoka ne tamu mono notamu uvu iikumithalonga mbika.’

Ano sho Petrus ta popi iinima mbino, oyendji yomaantu oyu uvite nayi kombinga yaashono sha ningilwa Jesus. ‘Otu na okuninga ngiini?’ yo taa pula. Petrus ota ti kuyo: ‘Ne omu na okulundulula onkalamwenyo yeni nomu ninginithwe.’ Ano esiku olyo tuu ndyoka aantu konyala 3 000 oyi ininginitha noya ningi aalanduli yaJesus.

Iilonga 2:1-47.



Omapulo

  • Ngaashi tashi ulikwa mefano moka, oshike sha li sha ningilwa aalanduli yaJesus mboka ya li ya tegelela muJerusalem?
  • Aatalelipo muJerusalem oya li ya kumwa koshike?
  • Petrus okwa li a yelithile aantu shike?
  • Aantu oya li ye uvite ngiini konima yokupulakena kuPetrus, noshike a li e ya lombwele ya ninge?
  • Aantu yangapi ya li ya ninginithwa mesiku ndyoka lyaPentekoste, 33 E.N.?

Omapulo ga gwedhwa po

  • Lesha Iilonga 2:1-47.

    Oohapu dhaPetrus tadhi adhika mIilonga 2:23, 36 otadhi ulike ngiini kutya oshigwana ashihe shAajuda oshi na ondjo yi na ko nasha nedhipago lyaJesus? (1 Tes. 2:14, 15)

    Petrus okwa tula po ngiini oshiholelwa oshiwanawa shokutompathana okuza mOmanyolo? (Iil. 2:16, 17, 29, 31, 36, 39; Kol. 4:6)

    Petrus okwa li a longitha ngiini “iipatululo yuukwaniilwa wokegulu,” mbyoka Jesus a li u uvaneke oku mu pa? (Iil. 2:14, 22-24, 37, 38; Mat. 16:19, KB)