Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 104: Jesus ta shuna megulu

Ehokololo 104: Jesus ta shuna megulu

POMASIKU ga landula ko Jesus oti ihololele aalongwa ye iikando oyindji. Oshikando shimwe konyala 500 yomaalongwa ye otaye mu mono. Owa tseya mbela kutya okombinga yashike Jesus ta popi sho te yi ihololele? Uukwaniilwa waKalunga. Jehova okwa tumu Jesus kombanda yevi okuuvitha Uukwaniilwa. Note shi ningi nokuli sho ye a yumuka.

Jesus ta shuna megulu

Oto dhimbulukwa mbela kutya Uukwaniilwa waKalunga oshike? Eeno, Uukwaniilwa owo epangelo lyoshili lyaKalunga li li megulu, na Jesus Oye ngoka a hogololwa kuKalunga a kale omukwaniilwa. Ngaashi tse twi ilonga, Jesus okwa holola kutya ye ota ka kala omukwaniilwa omukumithi guni po mokupalutha aasindjala, mokwaaludha aavu nokuyumudha aasi nokuli!

Ano kombanda yevi otaku ka kala ngiini uuna Jesus ta pangele megulu uule woomvula eyuvi limwe oye omukwaniilwa? Eeno, evi alihe otali ka longwa oparadisa ombwanawa. Itapu ka kala we iita, iilonga yomuyonena, omikithi nenge eso nokuli. Tse otu shi shi kutya osho oshili, oshoka Kalunga okwa shiti evi li kale oparadisa ndjoka aantu taa vulu okunyanyukilwa. Osho molwashoka petameko ye a ningi oshikunino shaEden. Jesus nota ka tonatela opo ehalo lyaKalunga lwahugunina li gwanithwe.

Ngashingeyi ethimbo olya thikana kuJesus a shune megulu. Jesus okwi ihololele aalongwa ye uule womasiku 40. Ano yo oye na uushili kutya ye oku na ishewe omwenyo. Ihe manga ye inaa thiga po aalongwa ye, ye ota ti kuyo: ‘Kaleni muJerusalem sigo tamu ka pewa ombepo ondjapuki.’ Ombepo ondjapuki oyo oonkondo dhaKalunga dhokulongitha, ngaashi ombepo hayi pepe, ndjoka tayi ka kwathela aalanduli ye okulonga ehalo lyaKalunga. Lwahugunina Jesus ota ti: ‘Ne omu na okuuvitha kombinga yandje sigo omiitopolwa yokooha dhevi.’

Konima sho Jesus e shi ti, opwa ningwa oshinima oshikumithi. Ye ota tameke ta yeluthwa po a ye megulu, ngaashi to vulu oku shi mona mpaka. Opo nduno ye ota kanene konima yoshikogo naalongwa kaye wete we Jesus. Jesus ota yi megulu nota tameke okupangela kombanda yaalongwa ye yokevi okuza moka.

Aalongwa taya ligamene kegulu

1 Aakorinto 15:3-8; Ehololo 21:3, 4; Iilonga 1:1-11.



Omapulo

  • Aalongwa yangapi ya li ya mono Jesus oshikando shimwe, noshike a li a popi nayo?
  • Uukwaniilwa waKalunga oshike, nonkalamwenyo kombanda yevi otayi ka kala ya tya ngiini ngele Jesus ta pangele e li Omukwaniilwa uule woomvula eyuvi?
  • Omasiku gangapi Jesus a li i ihololele aalongwa ye, ihe kuye olya li ethimbo lyokuninga shike?
  • Manga owala Jesus a li inaa za po paalongwa ye, okwa li e ya lombwele ya ninge shike?
  • Oshike tashi ningwa mefano moka, nomolwashike Jesus ya li kaaye mu wete we?

Omapulo ga gwedhwa po

  • Lesha 1 Aakorinto 15:3-8.

    Omolwashike omuyapostoli Paulus a li a vulu okupopya e na einekelo shi na ko nasha neyumuko lyaJesus, nokombinga yiinima yini Aakriste nena taya vulu okupopya ye na einekelo? (1 Kor. 15:4, 7, 8; Jes. 2:2, 3; Mat. 24:14; 2 Tim. 3:1-5)

  • Lesha Iilonga 1:1-11.

    Iilonga yeuvitho oya tamunuka mo ngiini, ngaashi sha hunganekwa mIilonga 1:8? (Iil. 6:7; 9:31; 11:19-21; Kol. 1:23)