Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 99: Moshinyanga shOpombanda

Ehokololo 99: Moshinyanga shOpombanda

NGASHINGEYI owo uusiku wEtine, konima yomasiku gaali. Jesus naayapostoli ye 12 oye ya koshinyanga shopombanda shika oshinene okulya uulalelo wOpaasa. Omulumentu ngoka ngoye u wete ta piti mo, oye Judas Iskariot. Ye ota yi a ka lombwele aasaaseri nkene yo taa vulu okukwata Jesus.

<a href=““>Uulalelo wOmuwa</a>

Esiku owala lya tetekele, Judas okwa yi kuyo nokwa pula: ‘Otamu ka pa ndje shike ngele ngame nde mu kwatha okukwata Jesus?’ Yo oya ti: ‘Iisiliveli omilongo ndatu.’ Ngashingeyi Judas ota yi a ka tsakaneke aalumentu mbaka opo ye a vule oku ya fala kuJesus. Kashi shi oshitilithi mbela?

Uulalelo wOpaasa owa pwa. Ihe Jesus ota tameke ngashingeyi nuulalelo wulwe wi ikalekelwa. Ye ota gandja oshikwiila kaayapostoli ye nota ti: ‘Shi lyeni, oshoka otashi ti olutu lwandje ndoka tamu ke lu gandjelwa.’ Opo nduno ota gandja oshitenga shomaviinu kuyo nota ti: ‘Ga nweni, oshoka otaga ti ombinzi yandje, ndjoka tamu ke yi tilwahililwa.’ Ombimbeli otayi shi luku ‘uulalelo wOmuwa.’

Aaisrael oya li Opaasa oku ya dhimbulukitha nkene omuyengeli gwaKalunga a pitilile po omagumbo gawo muEgipiti nokwa dhipaga aatango momagumbo gAaegipiti. Ihe ngashingeyi Jesus okwa hala aalanduli ye ye mu dhimbulukwe, nosho wo nkene ye e ya gandjele omwenyo gwe. Nosho molwashoka ye te ya lombwele ya lye uulalelo mbuno wi ikalekelwa omvula kehe.

Konima sho ya li Uulalelo wOmuwa, Jesus ota lombwele aayapostoli ye ya kale omapenda noya kale neitaalo lya kola. Opo nduno yo otayi imbile Kalunga eimbilo notaa yi. Ngashingeyi okwa toka noonkondo, tashi vulika konima yomokati kuusiku. Natu tale kutya openi yo taa yi.

Mateus 26:14-30; Lukas 22:1-39; Johannes ontopolwa 13 sigo 17; 1 Aakorinto 11:20.



Omapulo

  • Ngaashi shu ulikwa mefano moka, omolwashike Jesus naayapostoli ye 12 ya li ye li moshinyanga oshinene shopombanda?
  • Omulumentu ngono ta zi mo oye lye, noshike ta ka ninga?
  • Uulalelo wi ikalekela uni Jesus a li a tameke konima sho uulalelo wOpaasa wa pu?
  • Opaasa oya li ya dhimbulukitha Aaisrael oshiningwanima shini, noshike uulalelo mboka wi ikalekelwa wa li wa dhimbulukitha aalanduli yaJesus?
  • Konima yUulalelo wOmuwa, Jesus okwa li a lombwele shike aalanduli ye, noshike ya li ya ningi?

Omapulo ga gwedhwa po

  • Lesha Mateus 26:14-30.

    Mateus 26:15 otu ulike ngiini kutya Judas okwa li a gwaaleke Jesus owina?

    Okutika kwombinzi yaJesus oku na omalalakano gopaali geni? (Mat. 26:27, 28; Jer. 31:31-33; Ef. 1:7; Heb. 9:19, 20)

  • Lesha Lukas 22:1-39.

    Omondunge yini Satana a li a yi muJudas? (Luk. 22:3; Joh. 13:2; Iil. 1:24, 25)

  • Lesha Johannes 13:1-20.

    Mokutala kehokololo lyomuJohannes 13:2, mbela Judas ota vulu okupewa ondjo mwaashoka a li a ningi, noshiilongomwa shini aapiya yaKalunga taya vulu okwiilonga mwaashoka? (Gen. 4:7; 2 Kor. 2:11; Gal. 6:1; Jak. 1:13, 14)

    Oshiilongomwa shini shi na oshilonga Jesus a li a gandja? (Joh. 13:15; Mat. 23:11; 1 Pet. 2:21)

  • Lesha Johannes 17:1-26.

    Omondunge yini Jesus a li a galikana omolwaalanduli ye ya “ninge gumwe”? (Joh. 17:11, 21-23; Rom. 13:8; 14:19; Kol. 3:14)