Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 97: Jesus Te Ya Oye Omukwaniilwa

Ehokololo 97: Jesus Te Ya Oye Omukwaniilwa

KONIMA yokathimbo sho Jesus a aludha aakwanaluhepo yaali aaposi, ye ote ya pomukunda gu li popepi naJerusalem. Ye ota ti kuyaali yomaalongwa ye: ‘Indeni komukunda notamu ka mona ontana yokasino. Ka mangululeni mo nomu ke ete huka.’

Sho yo ye eta okasino kuye, Jesus ota londo kuko. Opo nduno ota yi kuJerusalem okakako okafupi okuza mpoka. Sho ye te ya popepi noshilando, otaku zi ongundu onene yaantu taye mu tsakaneke. Oyendji otaa hula mo oonguwo dhawo notaye dhi yala mondjila. Yalwe otaa tete iitayi yomilunga. Yo otaye yi yala wo mondjila notaa igidha: ‘Kalunga na laleke nuuyamba omukwaniilwa ngoka te ya medhina lyaJehova!’

Aantu taya hambelele Jesus

Nalenale muIsrael aakwaniilwa aape oya londo kontana yokasino okuya muJerusalem okwiiholola yo yene kaantu. Osho shoka Jesus ta ningi. Naantu mbaka otaa ulike kutya yo oya hala Jesus oye a kale omukwaniilwa gwawo. Ihe haantu ayehe ye mu hala. Otatu vulu oku shi mona mwaashoka sha ningilwa Jesus sho a yi kotempeli.

Potempeli Jesus okwa aludha aantu mboka aaposi niitiningili. Sho aanona aashona taye shi mono, yo otaa hambelele Jesus. Ihe shika otashi geyitha aasaaseri, oyo notaa ti kuJesus: ‘Ou uvite ko ngaa shoka aanona taa ti?’

‘Eeno, ondu uvite ko,’ Jesus ta yamukula. ‘Inamu lesha nani mOmbimbeli mpoka tayi ti: “Omomakana gaanona aashona Kalunga ota ka longekidhila mo ehambelelo?” ’ Ano aanona otaa tsikile nokuhambelela omukwaniilwa gwaKalunga

Tse otwa hala okukala ngaashi aanona mboka, hasho mbela? Aantu yalwe otaa ka kambadhala oku tu indika twaa popye kombinga yUukwaniilwa waKalunga. Ihe tse otatu ka tsikila okuhokololela yalwe iinima iikumithi mbyoka Jesus ta ka longela aantu.

Sho Jesus a li kombanda yevi, kalya li ethimbo lye okutameka ta pangele oye omukwaniilwa. Uunake ano ethimbo ndino tali ka thikana? Aalongwa yaJesus oya hala oku shi tseya. Tse oshikando tashi landula otatu ka lesha kombinga yasho.

Mateus 21:1-17; Johannes 12:12-16.



Omapulo

  • Sho Jesus e ya momukunda omushona gu li popepi naJerusalem, oshike a li a lombwele aalongwa ye ya ninge?
  • Mefano moka, oshike sha li sha ningwa po sho Jesus a hedha popepi noshilando shaJerusalem?
  • Aanona aashona oya li ya ningi shike sho ya mono Jesus a aludha aaposi niitiningili?
  • Jesus okwa li a lombwele shike aasaaseri mboka ya li ya geya?
  • Ongiini tatu vulu okukala ngaashi aanona mboka ya li taya hambelele Jesus?
  • Aalongwa oya li ya hala okutseya shike?

Omapulo ga gwedhwa po

  • Lesha Mateus 21:1-17.

    Ongiini okuya kwaJesus muJerusalem e li Omukwaniilwa taku kondjithathana nokusindana kwoondjayi dhiita pethimbo lyaRoma? (Mat. 21:4, 5; Sak. 9:9; Fil. 2:5-8; Kol. 2:15, OB-1986)

    Oshiilongomwa shini aagundjuka taya vulu okwiilonga kuumati Uuisrael mboka wa tothwa mo mEpsalmi 118 sho Jesus a li a yi motempeli? (Mat. 21:9, 15; Eps. 118:25, 26; 2 Tim. 3:15; 2 Pet. 3:18)

  • Lesha Johannes 12:12-16.

    Okulongitha iitayi yomilunga kwaantu mboka ya li taya hambelele Jesus okwa li taku thaneke shike? (Joh. 12:13; Fil. 2:10; Eh. 7:9, 10)