Inda koshikalimo

Inda koshikalimo

Oonzapo dhaJehova

Hogolola elaka Oshindonga

Ehokololo 96: Jesus Ta Aludha Aavu

Ehokololo 96: Jesus Ta Aludha Aavu

OMANGA Jesus te ende moshilongo, ye ota aludha aavu. Onkundana yiikumithalonga mbika oyi ihanene momikunda nomiilando ayihe yomomudhingoloko. Ano aantu otaye eta iitiningili naaposi noombolo kuye, nosho wo yalwe oyendji mboka taya alukwa. Jesus nota aludha ayehe.

Oomvula odhindji dhi vulithe pundatu odha piti po okuza sho Johannes a ninginitha Jesus. Jesus nota ti kaayapostoli ye kutya meni lyokathimbo ye ota ka ya kuJerusalem, hoka ye ta ka dhipagwa, nopo nduno ota ka yumuka kuusi. Pethimbo opo tuu mpoka Jesus ota tsikile okwaaludha aavu.

Jesus ta aludha omukiintu a ala

Esiku limwe Jesus ota longo mEsabati. Esabati olyo esiku lyevululuko lyAajuda. Omukiintu ngoka ngoye u wete mpaka, okwa li a ala noonkondo. Ye okwe ende uule woomvula 18 a andalala, noka li ta vulu okuthikama u ukilila. Jesus ota tenteke oshikaha she kuye, nota tameke okweenda u ukilila. Ye okwa aluka!

Shika otashi geyitha aawiliki yomalongelokalunga. ‘Opu na omasiku gahamano ngoka tse tu na okulonga,’ gumwe gwomuyo ti igidha mongundu yaantu. ‘Ngoka ogo omasiku gokuya mu aludhwe, hamEsabati!’

Ihe Jesus ota yamukula: ‘One aalumentu aawinayi. Kehe gumwe gwomune oha mangulula mo okasino ke note ka fala komeya ka ka nwe mEsabati. Omukiintu nguka, ngoka a li a ala uule woomvula 18, oye ke na nduno okwaaludhwa mEsabati?’ Eyamukulo lyaJesus otali sitha ohoni aalumentu mbano aawinayi.

Konima Jesus naayapostoli ye otaa yi molweendo lwokuya kuJerusalem. Sho taye ya owala pondje yoshilando shaJeriko, aakwanaluhepo yaali aaposi otayu uvu kutya Jesus ota piti po. Ano yo otayi igidha: ‘Jesus, tu kwatha!’

Jesus oti ithana aalumentu aaposi ye ye kuye nota pula: ‘Omwa hala ndi mu ningile shike?’ Yo otaa ti: ‘Omuwa, tonatitha omeho getu.’ Jesus ota gumu omeho gawo, nombala yo otaa vulu okumona ko! Owa tseya mbela kutya omolwashike Jesus ta longo iikumithalonga ayihe mbino? Omolwashoka ye oku hole aantu nokwa hala yo ye mu itaale. Ano tse otatu vulu okukala nuushili kutya uuna ye ta pangele oye Omukwaniilwa itapu ka kala we gumwe kombanda yevi ta alukwa.

Mateus 15:30, 31; Lukas 13:10-17; Mateus 20:29-34.



Omapulo

  • Jesus okwa li a ningi shike sho a li te endaenda noshilongo?
  • Oomvula ndatu lwaampono konima sho Jesus a ninginithwa, okwa li a lombwele aayapostoli ye shike?
  • Aantu mboka ye li mefano moka oyo oolye, noshike Jesus a li a ningile omukiintu?
  • Omolwashike eyamukulo lyaJesus li na ko nasha nomanyenyeto gaawiliki yelongelokalunga lya li lye ya sitha ohoni?
  • Sho Jesus naayapostoli ye ya li popepi naJeriko, oshike Jesus a li a ningile aakwanaluhepo yaali aaposi?
  • Omolwashike Jesus a li a longo iikumithalonga?

Omapulo ga gwedhwa po

  • Lesha Mateus 15:30, 31.

    Euliko lyoonkondo dhaJehova lini ekumithi lya hololwa okupitila muJesus, nongiini li na okunwetha mo euvoko lyetu lyaashoka Jehova u uvaneka omolwuuyuni uupe? (Eps. 37:29; Jes. 33:24)

  • Lesha Lukas 13:10-17.

    Ongiini oshili kutya Jesus okwa li a longo yimwe yomiikumithalonga ye ya simana noonkondo mEsabati tayi ulike epepelelo lyoludhi ndoka te ke etela aantu pethimbo lyEpangelo lye lyOomvula Eyuvi? (Luk. 13:10-13; Eps. 46:10 [46:9, OB-1986]; Mat. 12:8; Kol. 2:16, 17; Eh. 21:1-4)

  • Lesha Mateus 20:29-34.

    Ongiini ehokololo ndyoka tali ulike kutya Jesus ka li nando i ipyakidhila noonkondo e ta kala itaa kwathele aantu, noshike tatu vulu okwiilonga mwaashika? (Deut. 15:7; Jak. 2:15, 16; 1 Joh. 3:17)