Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 92: Jesus Ta Yumudha Aasi

Ehokololo 92: Jesus Ta Yumudha Aasi

OMUKADHONA ngoka ngoye u wete mpaka oku na oomvula 12. Jesus ota kwata oshikaha she, yina nahe noya thikama mpeyaka popepi. Owa tseya kutya omolwashike yo ye uvite elago ngawo? Natu tale.

Jesus ta yumudha omwanakadhona gwaJairus

He yomukadhona omulumentu a simana gwedhina Jairus. Esiku limwe omwanakadhona ote ehama nota tulwa mombete. Ihe ita talalelwa. Ye ote ehama nokweehamenena owala. Jairus nomukiintu gwe oya nika uuthigwa noonkondo, oshoka otashi monika sha fa ongo omukadhona gwawo ta si. Ye oye omukadhona epona gwawo. Ano Jairus ota ka konga Jesus. Ye oku uva kombinga yiikumithalonga yaJesus.

Sho Jairus ta mono Jesus, opu na ongundu onene yaantu ye mu kundukidha. Ihe Jairus ota thininike mongundu yaantu nota gwile poompadhi dhaJesus. ‘Omumwandje ota alukililwa,’ ye ta ti. ‘Alikana ila u mu aludhe,’ ye te mu galikana. Jesus ota ti kutya ye ote ke ya.

Manga yo taye ende, ongundu yaantu otayi undula yi hedhe popepi naye. Ombadhilila Jesus ota thikama. ‘Olye a gumu ndje?’ ye ta pula. Jesus oku uvite nkene oonkondo tadhi zi muye, ano ye oku shi shi kutya opu na gumwe e mu gumu. Ihe olye? Oye omukiintu ngoka a li a ala noonkondo uule woomvula 12. Ye okwa gumu koonguwo dhaJesus nokwa aluka!

Shika otashi uvitha Jairus nawa, oshoka ye ota vulu okumona nkene oshipu kuJesus okwaaludha gumwe. Ihe otapu ya nduno ontumwa. ‘Ino vulitha we Jesus,’ ye ta ti kuJairus. ‘Omumwoye okwa sa.’ Jesus ote shi uvu nota ti kuJairus: ‘Ino nika uuthigwa, ye ota ka aluka.’

Sho yo taa thiki pegumbo lyaJairus, aantu otaa lili noluhodhi olunene. Ihe Jesus ota ti: ‘Inamu lila. Omunona ina sa. Ye okwa kotha owala.’ Ihe yo otaa yolo notaa sheke Jesus, oshoka yo oye shi shi kutya ye okwa sa.

Opo nduno Jesus ota fala he nayina yomukadhona nayatatu yomaayapostoli ye kondunda hoka kwa lala omunona. Ye ota kutha oshikaha she nota ti: ‘Thikama po!’ Nota ningi omwenyo, ngaashi naanaa ngoye u wete mpaka. Nota thikama po note ende! Osho molwashoka yina nahe ya nyanyukwa ngawo.

Haye omuntu gwotango ngoka Jesus a yumudha kuusi. Gwo-tango ngoka Ombimbeli tayi hokolola oye omumati gwomuselekadhi a kala moshilando shaNain. Konima Jesus ota yumudha wo kuusi Lasarus, omumwayina gwaMaria naMarta. Uuna Jesus ta pangele oye omukwaniilwa gwaKalunga, ye ota ka yumudha aantu oonakusa oyendji kaaye shi okuyalulwa. Mbela tse itatu vulu okukala twa nyanyukwa kwaashino?

Lukas 8:40-56; 7:11-17; Johannes 11:17-44.



Omapulo

  • Olye he yokakadhona hoka ke li mefano moka, nomolwashike he nayina ya li ya nika oluhodhi noonkondo?
  • Jairus okwa li a ningi shike sho a mono Jesus?
  • Oshike sha li sha ningwa po sho Jesus a yi kegumbo lyaJairus, netumwalaka lini Jairus a li a pewa mondjila?
  • Omolwashike aantu mboka ya li megumbo lyaJairus ya li taya yolo Jesus?
  • Konima sho a fala aayapostoli yatatu nahe yokakadhona nosho wo yina mondunda yokakadhona, Jesus okwa li a ningi shike?
  • Olye ishewe a li a yumudhwa kuJesus, noshike shoka tashi ulike?

Omapulo ga gwedhwa po

  • Lesha Lukas 8:40-56.

    Jesus okwa li u ulike ngiini olukeno neyaalelo komukiintu ngoka a li e na oluziyo lwombinzi, noshike aakuluntugongalo yonena tayi ilongo mo? (Luk. 8:43, 44, 47, 48; Lev. 15:25-27; Mat. 9:12, 13; Kol. 3:12-14)

  • Lesha Lukas 7:11-17.

    Omolwashike mboka ya silwa aaholike yawo taya vulu okumona ehekeleko enene meyamukulo lyaJesus okuyamukula omuselekadhi gwokuNain? (Luk. 7:13; 2 Kor. 1:3, 4; Heb. 4:15)

  • Lesha Johannes 11:17-44.

    Jesus oku ulike ngiini kutya oshi li paunshitwe okunikila oluhodhi eso lyomuholike gwoye? (Joh. 11:33-36, 38; 2 Sam. 19:1 [18:33, OB-1986]; 19:2-5 [19:1-4, OB-1986])