JESUS okwa vululukwa pomuthima muSamaria. Aalongwa ye oya yi koshilando ya ka lande iikulya. Omukiintu ngoka ta popi naJesus, okwe ya okuteka omeya. Ye ota ti kuye: ‘Pe ndje wo omeya ndi nwe.’

Jesua ta popi nomukiintu Omusamaria

Otashi kumitha omukiintu noonkondo. Owa tseya kutya omolwashike? Omolwashoka Jesus Omujuda naye Omusamaria. NAajuda oyendji kaye hole Aasamaria. Nokuli yo ihaa popi nayo! Ihe Jesus oku hole aantu yomaludhi agehe. Ano ye ota ti: ‘Andola ngoye wa li wa tseya ngoka te ku pula omeya, ando ngoye owe mu pula note ku pe omeya omagandjimwenyo.’

‘Tatekulu,’ omukiintu ta ti, ‘omuthima omule, ngoye ku na nokuli eyemele. Openi mpoka to adha omeya omagandjimwenyo?’

‘Ngele ngoye to nu omeya gomomuthima nguka, ngoye oto ka sa natango enota,’ Jesus ta yelitha. ‘Ihe omeya ngoka ngame handi gandja, otaga vulu okukaleka omuntu nomwenyo sigo aluhe.’

‘Tatekulu,’ omukiintu ta ti, ‘pe ndje omeya ngaka! Opo nduno ngame itandi si we nando enota. Noitandi ka pumbwa we okwiila omeya huka.’

Omukiintu ota dhiladhila kutya Jesus ota popi omeya go gene. Ihe ye ota popi kombinga yoshili yaKalunga noyUukwaniilwa we. Oshili ndjika oya fa omeya omagandjimwenyo. Otayi vulu okupa omuntu omwenyo gwaaluhe.

Ngashingeyi Jesus ota ti komukiintu: ‘Inda u ki ithane omulumentu gwoye nou galuke.’

‘Ngame kandi na omulumentu,’ ye ta yamukula.

‘Ngoye owa yamukula mondjila,’ Jesus ta ti. ‘Ihe ngoye owa li u na aalumentu yatano, nomulumentu ngoka u li pamwe naye ngashingeyi, ke shi gwoye.’

Omukiintu okwa kumwa, oshoka iinima ayihe mbika oyoshili. Ongiini Jesus a tseya iinima mbika? Eeno, osho molwashoka Jesus oye Omuuvanekwa Ngoka a tumwa kuKalunga, Kalunga note mu pe eyelithilo ndika. Pethimbo opo tuu mpoka aalongwa yaJesus otaa galuka, noya kumwa sho ye ta popi nomukiintu Omusamaria.

Tse otatu ilongo mo shike muka? Otashi ulike kutya Jesus oha ningile aantu yomomihoko adhihe nawa. Natse wo otu na okukala ngawo. Katu na okudhiladhila kutya aantu yalwe aawinayi molwashoka owala yo yomuhoko gwontumba. Jesus okwa hala aantu ayehe ya tseye oshili ndjoka tayi fala sigo okomwenyo gwaaluhe. Noshi na okukala wo ehalo lyetu okukwathela aantu yi ilonge oshili.

Johannes 4:5-43; 17:3.



Omapulo

  • Omolwashike Jesus a li a fudha po pomuthima muSamaria, nokwa li a popi shike nomukiintu mpoka?
  • Omolwashike omukiintu a li a kumwa, Jesus okwa li e mu lombwele shike, nomolwashike?
  • Mbela omukiintu okwa li a dhiladhila kutya Jesus ota popi omeya goludhi luni, ihe omeya geni a li naanaa a dhiladhila?
  • Omolwashike omukiintu a li a kuminwa shoka Jesus e shi kombinga ye, nongiini a li a mono uuyelele mboka?
  • Iiyilongomwa yini tatu vulu okwiilonga mehokololo lyomukiintu pomuthima?

Omapulo ga gwedhwa po

  • Lesha Johannes 4:5-43.

    Mokulandula oshiholelwa shaJesus, iikala yini tu na okuulikila aantu yomihoko dhilwe nenge yomaputuko galwe? (Joh. 4:9; 1 Kor. 9:22; 1 Tim. 2:3, 4; Tit. 2:11)

    Omauwanawa gopambepo geni omuntu ngoka a ninga omulongwa gwaJesus ha mono? (Joh. 4:14; Jes. 58:11; 2 Kor. 4:16)

    Ongiini tatu vulu okuulika olupandu lwetu lwa fa ndoka lwomukiintu Omusamaria, ngoka a li a halelela okulombwela yalwe shoka u uva? (Joh. 4:7, 28; Mat. 6:33; Luk. 10:40-42)