Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 87: Omunona Jesus mOtempeli

Ehokololo 87: Omunona Jesus mOtempeli

TALA kokamati hoka taka popi naalumentu mbaka aakuluntu. Oyo aalongihapu motempeli yaKalunga muJerusalem. Nokamati oJesus. Ye okwa koka ngaaka shi li hwepo. Ye ngashingeyi oku na oomvula 12.

Aalongihapu oya kumwa unene sho Jesus e shi oshindji ngawo kombinga yaKalunga niinima mbyoka ya nyolwa mOmbimbeli. Omolwashike Josef naMaria kaaye li wo mpaka? Oye li peni? Natu tale.

Omunona Jesus ta popi naalongihapu

Omvula kehe Josef ohe eta uukwanegumbo we kuJerusalem omolwoshituthi shi ikalekelwa shedhina Opaasa. Olwo olweendo olule okuza kuNasaret to yi kuJerusalem. Kapu na gumwe e na ohauto, nokapu na omashina gokolutenda. Pethimbo mpono kapwa li natango iinima ya tya ngawo. Aantu oyendji ohaye ende kolupadhi, nohashi ya pula konyala omasiku gatatu okuthika kuJerusalem.

Ngashingeyi Josef oku na uukwanegumbo owindji. Ano Jesus oku na aamwayina aamati naakadhona aashona mboka ye na okutonatelwa. Omvula ndjono Josef naMaria oye li molweendo olule pamwe naanona yawo okushuna kegumbo kuNasaret. Yo otaa dhiladhila kutya Jesus oku li maaendi yalwe. Ihe sho ye ende uule wesiku limwe, yo itaa vulu okumona Jesus. Otaye mu kongo mokati kaakwawo nokooyakwawo, ihe ye ke mo muyo! Ano otaa galukile kuJerusalem oku ke mu konga hoka.

Lwahugunina otaya adha Jesus mpaka paalongihapu. Ye ote ya pulakene note ya pula omapulo. Naantu ayehe oya kumwa kombinga yankene Jesus omunandunge. Ihe Maria ota ti: ‘Omumwandje, omolwashike we shi tu ningile? Ngame naho otwi ipula noonkondo kombinga yoye.’

Omolwashike mwa kongele ndje?’ Jesus ta yamukula. ‘Kamu shi shi kutya ngame ondi na okukala megumbo lyaTate?’

Eeno, Jesus okwa hala okukala pomahala mpoka ye ta vulu okwiilonga kombinga yaKalunga. Hasho mbela natse tu na okuuva ngawo? MuNasaret kegumbo Jesus oha yi oshiwike kehe komakugongala oku ka galikana. Molwashoka ye oha gandja eitulomo aluhe, ye okwi ilongo iinima oyindji yomOmbimbeli. Natu kaleni ngaashi Jesus nokulandula oshiholelwa she.

Lukas 2:41-52; Mateus 13:53-56.



Omapulo

  • Jesus mefano moka oku li mo e na oomvula ngapi, nopeni e li?
  • Josef okwa li ha ningi shike pamwe nuukwanegumbo we omvula kehe?
  • Konima yesiku limwe molweendo lwokushuna kegumbo, omolwashike Josef naMaria ya li ya shuna kuJerusalem?
  • Openi Josef naMaria ya li ya adha Jesus, nomolwashike aantu yaahoka ya li ya kumwa?
  • Jesus okwa li a lombwele yina Maria shike?
  • Ongiini tatu vulu okukala twa fa Jesus mokwiilonga kombinga yaKalunga?

Omapulo ga gwedhwa po

  • Lesha Lukas 2:41-52.

    Nokuli nonando Ompango oya li tayi pula aalumentu oyo owala ya kale piituthi yokomumvo, oshiholelwa oshiwanawa shini Josef naMaria ya tulile po aavali nena? (Luk. 2:41; Deut. 16:16; 31:12; Omayel. 22:6)

    Oshiholelwa shini oshiwanawa Jesus a tulile po aagundjuka nena okukala haya vulika kaakuluntu yawo? (Luk. 2:51; Deut. 5:16; Omayel. 23:22; Kol. 3:20)

  • Lesha Mateus 13:53-56.

    Omadhina gaamwayina yane yaJesus yopanyama yeni ga tumbulwa mOmbimbeli, nongiini yaali yomuyo konima yethimbo ya li ya longithwa megongalo lyopaKriste? (Mat. 13:55; Iil. 12:17; 15:6, 13; 21:18; Gal. 1:19; Jak. 1:1; Jud. 1)