Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 84: Omuyengeli Ta Talele po Maria

Ehokololo 84: Omuyengeli Ta Talele po Maria

OMUKIINTU nguka omwaanawa oMaria. Ye Omwiisrael ngoka a kala mondoolopa yaNasaret. Kalunga okwa tseya kutya ye omuntu omwaanawa noonkondo. Osho molwashoka ye a tumu omuyengeli gwe Gabriel okupopya naye. Owa tseya kutya Gabriel okwe ya okulombwela Maria shike? Natu tale.

‘Wu uhala po, omusilwahenda ngoye,’ Gabriel ta ti kuye. ‘Jehova oku li pamwe nangoye.’ Maria ina mona nando onale omuntu nguka. Ye okwa kumwa, oshoka ye ke shi wo shoka ye a hala okutya. Ihe Gabriel ota mweneke okutila kwe mbalambala.

Maria

‘Ino kala wa tila, Maria,’ ye ta ti. ‘Jehova oku ku hole noonkondo. Osho molwashoka ye te ke ku ningila sha oshikumithi. Meni lyokathimbo ngoye oto ka mona okanona. Nou na oku ka luka Jesus.’

Gabriel ota tsikile nokuyelitha: ‘Okanona otaka kala okanene, notaka lukwa Omuna gwaKalunga gwOkombandambanda. Jehova ote ke mu ninga omukwaniilwa, ngaashi naanaa David a li. Ihe Jesus ota ka kala omukwaniilwa sigo aluhe, nuukwaniilwa we itau ka hula po nando!’

‘Ongiini tashi vulika?’ Maria ta pula. ‘Ngame inandi hokanwa nokuli. Ngame inandi kala pamwe nomulumentu, ongiini nduno tandi vulu okumona okanona?’

‘Oonkondo dhaKalunga otadhi ku ya,’ Gabriel ta yamukula. ‘Ano okanona otaka ka lukwa Omuna gwaKalunga.’ Opo nduno ota ti kuMaria: ‘Dhimbulukwa oshilyo shuukwanezimo woye Elisabet. Aantu oya ti kutya ye okwa kulupa noonkondo nokumona aanona. Ihe ye meni lyokathimbo ota ka mona okamati. Ngaashi ngoye to vulu okumona, kapu na sha shoka Kalunga itaa vulu okuninga.’

Maria ota ti mbalambala: ‘Ngame omulongelikadhona gwaJehova! Nashi ningilwe ndje ngaashi naanaa wa ti.’ Opo nduno omuyengeli ota yi.

Maria ota yi mbalambala a ka talele po Elisabet. Sho Elisabet tu uvu ewi lyaMaria, okanona mela lyaElisabet otaka nuka kenyanyu. Elisabet oku udhithwa nombepo yaKalunga nota ti kuMaria: ‘Ongoye omulalekwa nuuyamba mokati kaakiintu.’ Maria ota kala puElisabet konyala oomwedhi ndatu nopo nduno ta shuna kegumbo kuNasaret.

Maria oku li pokuhokana nomulumentu gwedhina Josef. Ihe sho Josef tu uvu kutya Maria omusimba, ye ota dhiladhila kutya ye ke na okuhokana naye. Opo nduno omuyengeli gwaKalunga ota ti kuye: ‘Ino kala wa tila okukutha Maria a ninge omukiintu gwoye. Oshoka oye Kalunga ngoka e mu pe okamati.’ Maria naJosef ano otaa hokana notaa tegelele Jesus a valwe.

Lukas 1:26-56; Mateus 1:18-25.



Omapulo

  • Omukiintu ngoka e li mefano moka oye lye?
  • Gabriel okwa li a lombwele shike Maria?
  • Gabriel okwa li a yelithile ngiini Maria kutya ota ka mona okanona nokuli nonando ina kala pamwe nomulumentu?
  • Oshike sha li sha ningwa po sho Maria a li ta talele po omupambele gwe Elisabet?
  • Josef okwa li ta dhiladhila shike sho u uvu kutya Maria ota ka mona okanona, ihe omolwashike a li a lundulula omadhiladhilo ge?

Omapulo ga gwedhwa po

  • Lesha Lukas 1:26-56.

    Lukas 1:35 oku ulike shike shi na ko nasha nokwaagwanenena kehe kwopaAdam meyi lyoluvalo lyaMaria sho omwenyo gwOmwana gwaKalunga gwa li gwa lundululwa okuza mehala moka hamu kala iishitwa yopambepo? (Hag. 2:11-13; Joh. 6:69; Heb. 7:26; 10:5)

    Jesus okwa li a simanekwa ngiini nokuli nomanga a li inaa valwa? (Luk. 1:41-43)

    Oshiholelwa oshiwanawa shini Maria a tulile po Aakriste nena mboka haya pewa omauthembahenda giilonga gi ikalekelwa? (Luk. 1:38, 46-49; 17:10; Omayel. 11:2)

  • Lesha Mateus 1:18-25.

    Nonando Jesus ka li a lukwa edhina Immanuel, ongiini onkandangala ndjoka a dhana e li omuntu ya gwanitha eityo lyayo? (Mat. 1:22, 23; Joh. 14:8-10; Heb. 1:1-3)