Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 101: Jesus Ta Dhipagwa

Ehokololo 101: Jesus Ta Dhipagwa

TALA koshinima oshitilithi shoka tashi ningwa mpaka! Jesus ota dhipagwa. Yo oye mu alele koshiti. Oomboha otadhi dhengelwa miikaha ye nomoompadhi dhe. Omolwashike gumwe ta kala a hala oku shi ningila Jesus?

Jesus ta si

Osho molwashoka aantu yamwe oye tonde Jesus. Owa tseya mbela kutya oyo oolye? Gumwe gwomuyo oye omuyengeli omwiinayi Satana Ondiaboli. Oye ngoka a ningitha Adam naEva ya kale inaaya vulika kuJehova. Satana noye ngoka a ningitha aatondi yaJesus ya longe iilonga yomuyonena mbino iitilithi.

Nokuli manga Jesus inaa alelwa koshiti huka, aatondi ye oye mu ningi onyanya. Oto dhimbulukwa mbela nkene yo ya yi koshikunino shaGetsemane noye mu kutha po? Aatondi mboka oya li oolye? Eeno, oya li aakwatelikomeho yomalongelokalunga. Natu tale ano shoka tashi ka ningwa po konima.

Sho Jesus a kwatwa kaakwatelikomeho yomalongelokalunga, aayapostoli ye oya fadhuka po. Yo otaa thigi po Jesus oye awike paatondi ye, oshoka yo oya tila. Ihe aayapostoli Petrus naJohannes itaa yi kokule. Yo otaa landula ko ye li konima kokule ya tale shoka tashi ningilwa Jesus.

Aasaaseri otaa fala Jesus komulumentu a kulupa Annas, ngoka a li nale omusaaseri omukuluntu. Ongundu yaantu itayi kala olule mpaka. Konima yo otaa fala Jesus kegumbo lyaKaifas, ngoka oye ngashingeyi omusaaseri omukuluntu. Aakwatelikomeho yomalongelokalunga oyendji oya gongala pegumbo lye.

Mpaka pegumbo lyaKaifas otaa hokololitha Jesus. Aantu otaye etwa mo ya popye iifundja kombinga yaJesus. Aakwatelikomeho yomalongelokalunga ayehe otaa ti: ‘Jesus oku na okudhipagwa.’ Opo nduno otaye mu hiyile omayeye moshipala notaye mu dhenge noongonyo.

Manga tashi ningwa, Petrus oku li pondje kehale. Owo uusiku wuutalala nomolwashoka aantu otaa tema omulilo. Manga yo taa huhulukwa ya kundukidha omulilo, okakadhona okakalele otaka tala kuPetrus notaka ti: ‘Omulumentu nguka okwa li wo pamwe naJesus.’

‘Aawe, ngame kanda li pamwe naye!’ Petrus ta yamukula.

Iikando itatu aantu taa ti kuPetrus kutya ye okwa li pamwe naJesus. Ihe oshikando kehe Petrus ote shi idhimbike. Sho Petrus e shi popi oshikando oshititatu, Jesus ota punguluka nota tala kuye. Petrus oku uvite nayi molwashoka ye a popi iifundja mbika, nota zi po e ta lili.

Ongula yEtitano sho etango tali piti, aasaaseri otaa fala Jesus kehala lyawo enene lyokugongalela, oshinyanga shaSanhedrin. Mpaka yo otaa kundathana shoka yo taye ke mu ningila. Yo otaye mu fala kuPontius Pilatus, omupangeli gwaJudea.

‘Ye omulumentu omwiinayi,’ aasaaseri taa lombwele Pilatus. ‘Ye oku na okusa.’ Konima yokupula Jesus omapulo, Pilatus ota ti: ‘Ngame itandi dhiladhila kutya ye okwa ninga sha sha puka.’ Opo nduno Pilatus ota tumine Jesus kuHerodes Antipas. Herodes oye omupangeli gwaGalilea, ihe ye okwa kala muJerusalem. Herodes naye wo ita vulu okumona epuko muJesus, onkene ote mu shunitha kuPilatus

Pilatus okwa hala a mangulule Jesus. Ihe aatondi yaJesus otaa hogolola kutya onkwatwa yilwe oyo yi mangululwe pehala lye. Omulumentu nguka oye omuyugi Barabbas. Ngashingeyi konyala osho omulongo nambali gwomutenya sho Pilatus ta pititha mo Jesus. Ye ota ti kaantu: ‘Taleni! Omukwaniilwa gweni!’ Ihe aasaaseri aakuluntu otayi igidha: ‘Mu kutha po! Mu dhipaga! Mu dhipaga!’ Ano Pilatus ota mangulula mo Barabbas, notaa kutha po Jesus ye ke mu dhipage.

Kuyele mEtitano omutenya Jesus ota alelwa koshiti. Ngoye ito vulu oku ya mona mefano, ihe kombinga kehe yaJesus oku na omukolokoshi ngoka naye wo a alelwa koshiti. Mbala manga Jesus inaa sa, gumwe gwomaakolokoshi ota ti: ‘Dhimbulukwa ndje ngele wa thiki muukwaniilwa woye.’ Na Jesus ota yamukula: ‘Otandi ku uvanekele kutya ngoye oto ka kala pamwe nangame mOparadisa.’

Kali shi mbela euvaneko ekumithi? Owa tseya mbela kutya oparadisa yini po Jesus ta popi? Oparadisa ndjoka Kalunga a shitile petameko oya li peni? Eeno, okombanda yevi. Nuuna Jesus ta pangele megulu oye omukwaniilwa, ye ota ka yumudha omulumentu nguka a nyanyukilwe Oparadisa ompe kombanda yevi. Tse otatu vulu okukala twa nyanyukwa kwaashino, hasho mbela?

Mateus 26:57-75; 27:1-50; Lukas 22:54-71; 23:1-49; Johannes 18:12-40; 19:1-30.



Omapulo

  • Olye unene tuu a li e etitha eso lyaJesus?
  • Aayapostoli oya li ya ningi shike sho Jesus a falwa kaawiliki yomalongelokalunga?
  • Oshike sha li sha ningwa po megumbo lyaKaifas, omusaaseri omukuluntu
  • Omolwashike Petrus a li a zi po e ta lili?
  • Konima sho Jesus a li a galulilwa kuPilatus, aasaaseri aakuluntu oya li yi igidha taya ti shike?
  • Oshike sha ningililwe Jesus omutenya mEtitano, neuvaneko lini a li a ningile omukolokoshi ngoka a li a alelwa komuti gwomahepeko pamwe naye?
  • Oparadisa ndjoka Jesus a li a popi otayi ka kala peni?

Omapulo ga gwedhwa po

  • Lesha Mateus 26:57-75.

    Omomukalo guni iilyo yompangu yopombanda yOshijuda ya li yu ulike kutya omitima dhayo odha li omiwinayi? (Mat. 26:59, 67, 68)

  • Lesha Mateus 27:1-50.

    Omolwashike tatu vulu okutya kutya Judas ka li e uvite shili nayi kwaashoka a ningi? (Mat. 27:3, 4; Mark. 3:29; 14:21; 2 Kor. 7:10, 11)

  • Lesha Lukas 22:54-71.

    Oshiilongomwa shini tatu vulu okwiilonga mokwiidhimbika kwaPetrus Jesus uusiku wokugwaalekwa nokukwatwa kwe? (Luk. 22:60-62; Mat. 26:31-35; 1 Kor. 10:12)

  • Lesha Lukas 23:1-49.

    Jesus okwa li i inyenge ngiini kokwaahe na uuyuuki hoka a li a ningilwa, noshiilongomwa shini tatu vulu okwiilonga mwaashika? (Luk. 23:33, 34; Rom. 12:17-19; 1 Pet. 2:23)

  • Lesha Johannes 18:12-40.

    Otashi ulike shike sho Petrus, nonando okwa li a sa onkumamuthika uule wokathimbo omolwuumbanda wokutila aantu, uumbanda owa li we mu etha e ta ningi omuyapostoli a dhenga mbanda? (Joh. 18:25-27; 1 Kor. 4:2; 1 Pet. 3:14, 15; 5:8, 9)

  • Lesha Johannes 19:1-30.

    Jesus okwa li e na etaloko li li pandjele lini lyokutala ko omaliko? (Joh. 2:1, 2, 9, 10; 19:23, 24; Mat. 6:31, 32; 8:20)

    Ongiini oohapu dhaJesus e dhi popya sho e li pokusa dha li etseyitho kutya okwa sindana mokudhiginina uunamapangelo waJehova? (Joh. 16:33; 19:30; 2 Pet. 3:14; 1 Joh. 5:4)