Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 100: Jesus mOshikunino

Ehokololo 100: Jesus mOshikunino

SHO Jesus a thigi po oshinyanga shopombanda, ye naayapostoli ye otaa yi koshikunino shaGetsemane. Yo oye ya olundji mpaka. Jesus ote ya lombwele ngashingeyi ya kale ya tonata nokugalikana. Opo nduno ota humu ko okakako nota petama noshipala she sha tsa pevi a galikane.

Konima Jesus ota galukile mpoka aayapostoli ye ye li. Ngoye oto dhiladhila mbela kutya yo otaa ningi shike? Yo oya kotha! Iikando itatu Jesus te ya lombwele kutya yo oye na okukala ya tonata, ihe oshikando kehe uuna ye ta galuka, ye ota adha ya kotha. ‘Ne otamu vulu okukotha ngiini pethimbo lya tya ngeyi?’ Jesus ta ti sho ye a galuka oshikando shahugunina. ‘Otundi oya thikana opo ngame ndi gandjwe miikaha yaatondi yandje.’

Pethimbo opo tuu mpoka ekudhilo lyongundu onene yaantu otali vulu okuuvika. Tala! Aalumentu otaye ya nomagongamwele noniiti! Noya humbata oonyeka dhokuminikila. Sho yo taye ya popepi, gumwe ote ende ta zi mongundu yaantu u ukilila sigo opuJesus. Ye ote mu thipi komilungu, ngaashi to vulu okumona mpaka. Omulumentu oye Judas Iskariot! Omolwashike ye ta thipi Jesus komilungu?

Judas ta gwaaleke Jesus

Jesus ota pula: ‘Judas, oto gwaaleke ndje nethipo lyokomilungu?’ Eeno, ethipo lyokomilungu olyo endhindhiliko. Otali ti kaalumentu mboka ye li puJudas kutya oye Jesus, omulumentu ngoka taa kongo. Ano aatondi yaJesus otaye mu kwata. Ihe Petrus ite ke etha opo yo ya kuthe po owala Jesus ngeyaka. Ye ota pweya mo egongamwele ndyoka ye etelela nota dhenge omulumentu ngoka e li popepi naye. Egongamwele otali ponyo omutse gwomulumentu notali tete ko okutsi kwe kwokolulyo. Ihe Jesus ota gumu okutsi kwomulumentu note ku aludha.

Jesus ota ti kuPetrus: ‘Shunitha mo egongamwele lyoye. Oto dhiladhila mbela kutya ngame itandi vulu okupula Tate aayengeli omayuvi ya hupithe ndje?’ Eeno, ye ota vulu! Ihe Jesus ita pula Kalunga a tume aayengeli yasha, oshoka ye oku shi shi kutya ethimbo olya thikana kaatondi ye ye mu kwate. Ye ote etha ye mu kuthe po. Natu tale ngashingeyi shoka tashi ningilwa Jesus.

Mateus 26:36-56; Lukas 22:39-53; Johannes 18:1-12.



Omapulo

  • Openi Jesus naayapostoli ye ya li ya yi konima yokuza mondjugo yopombanda, noshike a li e ya lombwele ya ninge?
  • Jesus okwa li a adha aayapostoli ye taya ningi shike sho a galukile mpoka ya li, niikando ingapi shoka sha li sha ningwa?
  • Olye te ya moshikunino, noshike Judas Iskariot ta ningi, ngaashi tashi ulikwa mefano moka?
  • Omolwashike Judas a li a thipi Jesus komilungu, noshike Petrus a li a ningi?
  • Oshike Jesus a li a lombwele Petrus, ihe omolwashike Jesus a li inaa pula Kalunga a tume aayengeli?

Omapulo ga gwedhwa po

  • Lesha Mateus 26:36-56.

    Omukalo moka Jesus a li a pe aalongwa ye omayele ogu li ngiini oshiholelwa oshiwanawa kaakuluntugongalo Aakriste nena? (Mat. 20:25-28; 26:40, 41; Gal. 5:17; Ef. 4:29, 31, 32)

    Jesus okwa tala ko ngiini okulongitha iikondjitho okukondjitha aantu ooyakwetu? (Mat. 26:52; Luk. 6:27, 28; Joh. 18:36)

  • Lesha Lukas 22:39-53.

    Sho omuyengeli a li a holokele Jesus moshikunino shaGetsemane oku mu nkondopaleka, mbela shoka osha li shu ulike kutya Jesus okwa li ta tengauka meitaalo? Shi yelitha. (Luk. 22:41-43; Jes. 49:8; Mat. 4:10, 11; Heb. 5:7)

  • Lesha Johannes 18:1-12.

    Jesus okwa li a gamene ngiini aalongwa ye kaapataneki ye, noshike tatu vulu okwiilonga moshiholelwa shoka? (Joh. 10:11, 12; 18:1, 6-9; Heb. 13:6; Jak. 2:25)