Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 81: Einekelo mekwatho lyaKalunga

Ehokololo 81: Einekelo mekwatho lyaKalunga

AANTU omayuvi ogendji oya kutha olweendo olule okuza muBabilon okuya kuJerusalem. Ihe sho yo taa thiki hono, Jerusalem osho ondumba onene yiikulukuma. Kamu na omuntu. Aaisrael oye na okutungulula ayihe okuza ketameko.

Shimwe shomiinima mbyoka yo taa tungu tango, osho oaltari. Oyo ehala mpoka yo taa vulu okweetela Jehova omayambo giinamwenyo nenge omagano. Konima yoomwedhi dhimwe Aaisrael otaa tameke okutunga otempeli. Ihe aatondi yomiilongo yopopepi mpoka inaa hala Aaisrael ye yi tunge. Yo otaa kambadhala ano oku ya mbandameka opo yo ye ethe oku yi tunga. Lwahugunina aatondi mbaka otaa ningitha omukwaniilwa gwaPersia a ninge po ompango ndjoka tayi indike iilonga yetungo.

Oomvula otadhi piti po. Ngashingeyi odho oomvula 17 okuza sho Aaisrael ya galukile muBabilon. Jehova ota tumu aaprofeti ye Haggai naSakaria okulombwela oshigwana shi tameke ishewe okutunga. Oshigwana oshi inekela mekwatho lyaKalunga, osho notashi vulika kaaprofeti. Sho otashi tameke ishewe okutunga, nokuli nando ompango oyi tye kutya kashi na oku shi ninga.

Omukwanepangelo Omupersia gwedhina Tattenai ote ya ano okupula Aaisrael uuthemba uni po yo ye na okutunga otempeli. Aaisrael otaa ti kuye kutya sho yo ya li muBabilon, Omukwaniilwa Kores okwa ti kuyo: ‘Indeni ngashingeyi kuJerusalem nomu tunge otempeli yaJehova, Kalunga keni.’

Tattenai ota tumine ombilive kuBabilon nota pula ngele Kores, ngoka a si, oye e shi ti shili. Mbalambala ota mono ombilive ya za komukwaniilwa omupe gwaPersia. Otayi ti kutya Kores okwe shi popya shili. Ano omukwaniilwa ota nyola: ‘Etheni Aaisrael ya tunge otempeli yaKalunga kawo. Notandi mu lombwele mu ya kwathe.’ Otempeli oya pu konyala meni lyoomvula ne, Aaisrael noya nyanyukwa noonkondo.

Oomvula odhindji natango otadhi piti po. Ngashingeyi konyala odho oomvula 48 okuza sho otempeli ya pu. Aantu muJerusalem oyo aathigona, noshilando notempeli yaKalunga itayi monika ombwanawa unene. MuBabilon Omwiisrael Esra otu uvu kutya otempeli yaKalunga oyi na okwoopalekululwa. Owa tseya kutya oshike ye ta ningi po?

Esra ota yi kuArtahsasta, omukwaniilwa gwaPersia, nomukwaniilwa nguka omwaanawa ota gandja omagano ogendji kuEsra a ye nago kuJerusalem. Esra ota pula Aaisrael yomuBabilon ye mu kwathe okuhumbata omagano ngaka ye ga fale kuJerusalem. Aantu 6 000 lwaampono otaa ti kutya yo otaa ka ya. Yo oye na ondumba yoshisiliveli noshingoli niinima yilwe yondilo mbyoka yo ye na okuhumbata.

Esra okwa nika uuthigwa, oshoka mondjila omu na aalumentu aawinayi. Aalumentu mbaka sikulimwe otaye ke ya kutha oshisiliveli noshingoli notaye ya dhipaga. Ano Esra oti ithana aantu ya gongale, ngaashi to vulu oku shi mona mefano. Opo nduno otaa galikana kuJehova e ya gamene molweendo lwawo olule okushuna kuJerusalem.

Esra naantu taya galikana

Jehova ote ya gamene. Nokonima yolweendo lwoomwedhi ne yo otaa thiki nawa muJerusalem. Otashi holola kutya Jehova ota vulu okugamena mboka yi inekela mekwatho lye, hasho mbela?

Esra ontopolwa 2 sigo 8.



Omapulo

  • Aantu yangapi ya li ya yi molweendo olule okuza muBabilon okuya kuJerusalem, ihe oshike ya li ya adha ko sho ya thiki hoka?
  • Oshike Aaisrael ya li ya tameke okutunga konima sho ya thiki hoka, ihe oshike aatondi yawo ya li ya ningi?
  • Haggai naSakaria oyo oolye, noshike ya li ya lombwele oshigwana?
  • Omolwashike Tattenai a li a tumu ombilive kuBabilon, neyamukulo lini a li a pewa?
  • Esra okwa li a ningi shike sho u uvu kutya otempeli yaKalunga oyi na okwoopalekululwa?
  • Okombinga yashike Esra ta galikana mefano moka, egalikano lye olya li lya yamukulwa ngiini, noshike mbela shika tashi tu longo?

Omapulo ga gwedhwa po

  • Lesha Esra 3:1-13.

    Ngele tu li moshitopolwa moka kaamu na egongalo lyoshigwana shaKalunga, oshike tu na okutsikila okuninga? (Esra 3:3, 6; Iil. 17:16, 17; Heb. 13:15)

  • Lesha Esra 4:1-7.

    Oshiholelwa shini Serubabel a li a tulile po oshigwana shaJehova shi na ko nasha nokwaaimbwanga mumwe kwomaitaalo? (Eks. 34:12; 1 Kor. 15:33; 2 Kor. 6:14-17)

  • Lesha Esra 5:1-5, 17 nosho wo 6:1-22.

    Omolwashike aapataneki ya li itaaya vulu okumweneka iilonga yokutunga otempeli? (Esra 5:5; Jes. 54:17)

    Iilonga yaalumentu aakuluntu yAajuda otayi ladhipike ngiini aakuluntugongalo Aakriste ya konge ewiliko lyaJehova uuna taya patanekwa? (Esra 6:14; Eps. 32:8; Rom. 8:31; Jak. 1:5)

  • Lesha Esra 8:21-23, 28-36.

    Manga inaatu katuka oonkatu dhontumba, oshiholelwa shini shaEsra tashi ka kala oshiwanawa kutse okulandula? (Esra 8:23; Eps. 127:1; Omayel. 10:22; Jak. 4:13-15)