AKUTU! Otashi monika sha fa ongo Daniel e li muudhigu. Ihe oonime itadhi mu ningi sha! Owa tseya kutya omolwashike? Olye a tula Daniel poonime adhihe ndhino? Natu tale.

Omukwaniilwa gwaBabilon ngashingeyi oye omulumentu gwedhina Darius. Ye oku hole Daniel noonkondo, oshoka Daniel omwaanawa ngaaka nomunandunge. Darius okwa lenge Daniel oye a kale elenga ekuluntu muukwaniilwa we. Shika otashi sithitha Daniel efupa kaalumentu yalwe yomuukwaniilwa, notaa ningi ngaashi tashi landula.

Darius

Otaa yi kuDarius notaa ti: ‘Omukwaniilwa, tse otwa hala opo u tote po ompango kutya hagumwe e na okugalikana uule womasiku 30 kukalunga kehe nenge komulumentu kehe kakele kangoye, omukwaniilwa. Ngele gumwe ta kala inaa vulika, ye oku na okuumbilwa mekololo lyoonime.’ Darius ke shi kutya omolwashike aalumentu mbaka taa pula pu totwe ompango ndjika. Ihe ye ota dhiladhila kutya olyo edhiladhilo ewanawa, nota nyola ano ompango ndjika. Opo nduno ompango itayi vulu okulundululwa.

Sho Daniel tu uvu kombinga yompango, ye ota yi kegumbo nota galikana, ngaashi naanaa he shi ningi shito. Aalumentu aawinayi oye shi shi kutya Daniel ite ke etha po okugalikana kuJehova. Yo oya nyanyukwa, oshoka otashi monika sha fa ongo ondunge yawo oku ya pepelelitha po kuDaniel tayi longo.

Sho Omukwaniilwa Darius ta mono molwashike aalumentu mbano ya hala ompango ndjika, ye otu uvu nayi noonkondo. Ihe ye ita vulu okulundulula ompango, ano ye oku na okugandja elombwelo kutya Daniel nu umbilwe mekololo lyoonime. Ihe omukwaniilwa ota ti kuDaniel: ‘Ondi inekela kutya Kalunga koye, ngoka ngoye ho longele, ote ke ku hupitha.’

Darius ota nika uuthigwa ngaaka kutya ye uusiku mboka kaa vule okukotha. Ongula ya landula ye ota matukile kekololo lyoonime. Ngoye oto vulu oku mu mona mpeyaka. Ye oti igidha: ‘Daniel, omupiya gwaKalunga omunamwenyo! Kalunga ngoka ho longele a vulu tuu oku ku hupitha koonime?’

Daniel mekololo lyoonime

‘Kalunga okwa tumu omuyengeli gwe,’ Daniel ta yamukula, ‘nokwa mutikitha omakana goonime opo dhaa ningile ndje uuwinayi.’

Omukwaniilwa okwa nyanyukwa noonkondo. Ye ota ti kutya Daniel na ka talwe mo mekololo. Opo nduno otu umbilitha aalumentu aawinayi koonime mboka taa kambadhala ya pepelelwe po kuDaniel. Nokuli manga inaaya thika pevi, oonime otadhi ya kwata notadhi teyagula omasipa gawo agehe.

Opo nduno Omukwaniilwa Darius ota nyolele aantu ayehe yomuukwaniilwa we: ‘Ngame otandi ti kehe gumwe na simaneke Kalunga kaDaniel. Ye ota longo iikumithalonga iinene. Ye okwa hupitha Daniel kaa like po koonime.’

Daniel 6:1-28, faathanitha OB-1986.



Omapulo

  • Darius (Darejaves) oye lye, nokwa li a tala ko ngiini Daniel?
  • Aalumentu yamwe ye na ondumbo oya li ya ningitha Darius a ninge shike?
  • Daniel okwa li a ningi shike sho u uvu ompango ompe?
  • Omolwashike Darius a li a nika uuthigwa noonkondo e ta kala itaa vulu okukotha, noshike a li a ningi ongula yesiku lya landula ko?
  • Daniel okwa li a yamukula ngiini Darius?
  • Oshike sha li sha ningwa po naalumentu ye li nayi mboka ya li ya kambadhala okudhipaga Daniel, noshike Darius a li a nyolele aantu ayehe yomuukwaniilwa we?

Omapulo ga gwedhwa po

  • Lesha Daniel 6:1-28, faathanitha OB-1986.

    Ompangela yomeholamo tayi pataneke Daniel otayi tu dhimbulukitha ngiini shoka aapataneki ya ningi opo ya kambadhale okuthininika Oonzapo dhaJehova methimbo lyonena? (Dan. 6:7; Eps. 94:20, KB; Jes. 10:1, OB-1986; Rom. 8:31)

    Ongiini aapiya yaKalunga taya vulu okuholela Daniel nena mokukala haya vulika ‘kaapangeli mboka haye ya pangele’? (Dan. 6:5, 10; Rom. 13:1; Iil. 5:29)

    Ongiini tatu vulu okuholela oshiholelwa shaDaniel shokulongela Jehova “aluhe”? (Dan. 6:16, 20; Fil. 3:16, OB-1986; Eh. 7:15)