Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 72: Kalunga Ta Kwatha Omukwaniilwa Hiskia

Ehokololo 72: Kalunga Ta Kwatha Omukwaniilwa Hiskia

OWA tseya kutya omolwashike omulumentu nguka ta galikana kuJehova? Omolwashike ye a tenteka oombilive ndhino komeho goaltari yaJehova? Omulumentu oye Hiskia. Ye omukwaniilwa gwomazimo gaali gaIsrael gokuumbugantu. Noku li muudhigu uunene. Omolwashike?

Omukwaniilwa Hiskia ta galikana

Oshoka omatanga gaakwiita gaAssur oga hanagula po nale omazimo 10 gokuumbangalantu. Jehova oye a pitika shi ningwe molwashoka aantu mboka oya li aawinayi ngaaka. Nongashingeyi omatanga gaakwiita gaAssur otage ya okukondjitha uukwaniilwa womazimo gaali.

Omukwaniilwa gwaAssur opo a tumu oombilive dha tya ngawo kOmukwaniilwa Hiskia. Odho oombilive ndhoka Hiskia a tula mpaka koshipala shaKalunga. Oombilive otadhi sheke Jehova, notadhi lombwele Hiskia i igandje. Osho molwashono Hiskia ta galikana: ‘Akutu Jehova, tu hupitha komukwaniilwa gwaAssur. Opo nduno iigwana ayihe tayi ka tseya kutya ongoye awike Kalunga.’ Jehova ota ka pulakena ngaa mbela kuHiskia?

Hiskia oye omukwaniilwa omwaanawa. Ye ina fa aakwaniilwa aawinayi yuukwaniilwa waIsrael womazimo 10, nenge ngaashi he omwiinayi, Omukwaniilwa Ahas. Hiskia okwa longo naanaa ngaashi tashi vulika okuvulika koompango dhaJehova adhihe. Sho Hiskia a mana okugalikana, ano omuprofeti Jesaja ota tumine kuye etumwalaka lyaJehova ndika: ‘Omukwaniilwa gwaAssur ite ke ya mo muJerusalem. Nokuli hagumwe gwomaakwiita ye ta ka hedha popepi nasho. Yo itaa ka umba nando osho oshikuti shimwe moshilando.’

Tala kefano pepandja ndika. Owa tseya kutya aakwiita ayehe mbano ya sa oyo oolye? Oyo Aayassur. Jehova okwa tumu omuyengeli gwe, nomuusiku wumwe omuyengeli okwa dhipaga aakwiita Aayassur 185 000. Ano omukwaniilwa gwaAssur oti igandja kolugodhi nota shuna kegumbo.

Omudhimba dhaakwiita Aayassur

Uukwaniilwa womazimo gaali owa hupithwa, naantu oya kala uule wethimbo nombili. Ihe konima sho Hiskia a si, omwana Manasse ota ningi omukwaniilwa. Manasse nomwana Amon konima ye ayehe yaali oyo aakwaniilwa aawinayi noonkondo. Ano oshilongo otashi udhithwa ishewe niilonga yomuyonena nekuni. Sho Omukwaniilwa Amon a dhipagwa kaapiya ye, omwana Josia ota ningi omukwaniilwa guukwaniilwa womazimo gaali.

2 Aakwaniilwa 18:1-36; 19:1-37; 21:1-25.



Omapulo

  • Omulumentu ngoka e li mefano moka oye lye, nomolwashike e li muupyakadhi uunene?
  • Oombilive ndhoka Hiskia a tula koshipala shaKalunga odhashike, noshike Hiskia a li ta galikana kombinga yasho?
  • Hiskia omukwanilwa a tya ngiini, netumwalaka lini Jehova a li e mu tumine okupitila momuprofeti Jesaja?
  • Omuyengeli gwaJehova okwa li a ningile shike Aayassur, ngaashi shu ulikwa mefano moka?
  • Nonando uukwaniilwa womazimo gaali owa li wa kala u na ombili uule wokathimbo, oshike sha li sha ningwa po konima yokusa kwaHiskia?

Omapulo ga gwedhwa po

  • Lesha 2 Aakwaniilwa 18:1-36.

    Omupopikalelipo gwaAssur Rabsake okwa li a lalakanene ngiini okunkundipaleka eitaalo lyAaisrael? (2 Aak. 18:19, 21; Eks. 5:2; Eps. 64:4 [64:3, OB-1986])

    Ngele Oonzapo dhaJehova tadhi ungaunga naapataneki yadho, ohadhi vulika ngiini koshiholelwa shaHiskia? (2 Aak. 18:36; Eps. 39:2 [39:1, OB-1986]; Omayel. 26:4; 2 Tim. 2:24)

  • Lesha 2 Aakwaniilwa 19:1-37.

    Oshigwana shaJehova nena ohashi holele ngiini Hiskia momathimbo guudhigu? (2 Aak. 19:1, 2; Omayel. 3:5, 6; Heb. 10:24, 25; Jak. 5:14, 15)

    Okusindwa kwopatatu kuni omukwaniilwa Sanherib a li a sindwa nako, nota thaneke lye pahunganeko? (2 Aak. 19:32, 35, 37; Eh. 20:2, 3)

  • Lesha 2 Aakwaniilwa 21:1-6, 16.

    Omolwashike taku vulu okutiwa kutya Manasse okwa li gumwe gwomaakwaniilwa aakolokoshi unene noonkondo mboka ya li ya pangele muJerusalem? (2 Ondjal. 33:4-6, 9)