Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 70: Jona nOhi Onene

Ehokololo 70: Jona nOhi Onene

TALA komulumentu ngoka e li momeya. Ye oku li muudhigu uunene, hasho mbela? Ohi ndjoka otayi ke mu nina po! Owa tseya kutya omulumentu nguka olye? Edhina lye oJona. Natu tale nkene ye e ya muudhigu u thike mpono.

Jona oye omuprofeti gwaJehova. Okathimbo konima yeso lyaElisa Jehova ota lombwele Jona: ‘Inda koshilando oshinene Ninive. Aantu yaahoka oyo aawinayi noonkondo, ngame nonda hala ngoye u ka popye nayo kombinga yaashono.’

Jona nohi onene

Ihe Jona ina hala a ye ko. Ano ye ota londo mosikepa ndjoka itaayi yi kuNinive, ihe okombinga haayo. Jehova ina nyanyukwa sho Jona ta fadhuka po. Ano Ye ote eta oshikungulu oshinene. Oshidhigu ngaaka kutya osikepa yi kale moshiponga shokuningina. Aanasikepa oya tila noonkondo notayi ithana ekwatho kiikalunga yawo.

Lwahugunina Jona ota ti kuyo: ‘Ngame ohandi galikana Jehova, Kalunga ngoka a shiti egulu nevi. Notandi yi ontuku shoka Jehova a lombwele ndje ndi shi ninge.’ Aanasikepa otaa pula: ‘Tse otu na oku ku ninga ngiini opo oshikungulu shi lote?’

‘Umbilii ndje mefuta nefuta otali mwena ishewe,’ Jona ta ti. Aanasikepa inaya hala oku shi ninga, ihe sho oshikungulu tashi pindjala, lwahugunina yo otayu umbile Jona mefuta. Oshikungulu otashi loto mbala nefuta otali mwena ishewe.

Sho Jona ta thiki momeya, ohi onene otayi mu nina po. Ihe ye ina sa. Omitenya ndatu nomausiku gatatu ye e li mela lyohi ndjoka. Jona oku uvite nayi noonkondo sho ye inaa vulika kuJehova noinaa ya kuNinive. Owa tseya kutya ye ota ningi po shike?

Jona ota galikana ekwatho kuJehova. Opo nduno Jehova ota ningitha ohi yi kungile Jona kevi ekukutu. Konima yaashoka Jona ota yi kuNinive. Otashi tu longo nkene sha simana okuninga shoka Jehova ta ti, hasho mbela?

Embombimbeli lyaJona.



Omapulo

  • Jona oye lye, noshike Jehova a li e mu lombwele a ninge?
  • Molwaashoka ka li a hala okuya hoka Jehova a li e mu lombwela a ye, Jona okwa li a ningi po shike?
  • Jona okwa li a lombwele aaendifuta ya ninge shike opo oshikungulu shi lote?
  • Ngaashi to vulu okumona mefano moka, oshike sha li sha ningwa po sho Jona a li a ningine kohi yomeya?
  • Jona okwa kala uule wethimbo li thike peni mela lyohi, noshike a li ta ningi moka?
  • Openi Jona a li a yi konima sho a zi mela lyohi onene, naashika otashi tu longo shike?

Omapulo ga gwedhwa po

  • Lesha Jona 1:1-17.

    Osha yela kutya Jona okwa li e uvitile ngiini oshinakugwanithwa she shokuuvithila Aaninive? (Jona 1:2, 3; Omayel. 3:7; Omuuv. 8:12)

  • Lesha Jona 2:1, 2, 10.

    Ongiini oshimoniwa shaJona tashi tu pe einekelo kutya Jehova ota ka yamukula omagalikano getu? (Eps. 22:25 [22:24, OB-1986]; 34:7 [34:6, OB-1986]; 1 Joh. 5:14)

  • Lesha Jona 3:1-10.

    Eladhipiko lini tatu mono muushili kutya Jehova okwa li a tsikile okulongitha Jona nonando okwa li inaa gwanitha oshinakugwanithwa she? (Eps. 103:14; 1 Pet. 5:10)

    Oshimoniwa shaJona shi na ko nasha nAaninive otashi tu longo shike kombinga yokupangula aantu moshitopolwa shetu? (Jona 3:6-9; Omuuv. 11:6; Iil. 13:48)