Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 68: Aamati Yaali Mboka Taa Yumudhwa

Ehokololo 68: Aamati Yaali Mboka Taa Yumudhwa

NATU tye nee ngoye owa sa. Meme gwoye ota ka kala e uvite ngiini mbela ngele to yumuka? Ye ota ka kala a nyanyukwa noonkondo! Ihe mbela omuntu ngoka a sa ota vulu ngaa okuninga ishewe omwenyo? Mbela osha ningwa ngaa nale?

Tala mpaka komulumentu, nomukiintu nokamati. Omulumentu oye omuprofeti Elia. Omukiintu oye omuselekadhi gwokoshilando Sarepta, nomumati okanona ke. Esiku limwe omumati ote ehama. Ote ehama nokweehama sigo ta si. Elia ota ti nduno komukiintu: ‘Eta omumati kungame.’

Elia nomuselekadhi nokamwanamati ka yumuka

Elia ota humbata okanona okasi te ende kiilyatelo note ka langeke kontala. Ta galikana nduno: ‘Akutu Jehova, omumati mu ninga ishewe omunamwenyo.’ Nomumati ota tameke ta fudha! Opo tuu mpoka Elia ote mu fala ishewe pevi nota ti komukiintu: ‘Tala, omumati gwoye oku na omwenyo!’ Osho molwashono yina a nyanyukwa ngawo.

Natango omuprofeti a simana gwaKalunga oElisa. Ye omukwathi gwaElia. Ihe konima Jehova ota longitha wo Elisa okulonga iikumithalonga. Esiku limwe Elisa ota yi koshilando shaSunem hoka ku na omukiintu e li nawa naye. Konima omukiintu nguka ota mono okamati.

Ongula yimwe, sho okanona ka koko, otaka yi kuhe ngoka ta longo mepya. Ombadhilila omumati oti igidha: ‘Omutse gwandje otagu ehama!’ Sho ye a falwa kegumbo, omumati okwa si. Alikana yina okwa sa oluhodhi ngiini! Ye ota ka tala mbalambala Elisa.

Sho Elisa te ya, ye ota yi kondunda hoka okanona okasi ka lala. Ye ota galikana kuJehova nota lala pomudhimba. Mbala olutu lwomumati otalu pupyala nota shemita lwiikando iheyali. Alikana yina okwa nyanyukwa ngiini sho te ya mo nota mono omwana e na omwenyo!

Aantu oyendji ya nyenge okuyalulwa oya si nale. Osha nikitha aakwanegumbo nookuume kawo oluhodhi olunene. Tse katu na oonkondo okuyumudha aasi. Ihe Jehova oku na. Konima otatu ki ilonga nkene ye ta ka yumudha aantu omamiliyona.

1 Aakwaniilwa 17:8-24; 2 Aakwaniilwa 4:8-37.


Omapulo

  • Aantu yatatu mboka ye li mefano moka oyo oolye, noshike tashi ningilwa okamatyona hoka?
  • Elia okwa li a galikana shike shi na ko nasha nokamati, nokonima yaashoka oshike sha li sha ningwa po?
  • Omukwathi gwaElia edhina lye olye?
  • Omolwashike Elisa a li i ithanwa kegumbo lyomukiintu muSunem?
  • Elisa okwa li a ningi shike, noshike sha li sha ningilwa okanona hoka ka li ka sa?
  • Jehova oku na oonkondo dhokuninga shike, ngaashi sha li shu ulikwa okupitila muElia naElisa?

Omapulo ga gwedhwa po

  • Lesha 1 Aakwaniilwa 17:8-24.

    Evuliko neitaalo lyaElia olya li lya makelwa ngiini? (1 Aak. 17:9; 19:1-4, 10)

    Omolwashike eitaalo lyomuselekadhi gwokuSarepta lya li lya tongomana? (1 Aak. 17:12-16; Luk. 4:25, 26)

    Oshinima shoka sha li sha ningilwa omuselekadhi gwokuSarepta oshu ulike ngiini oshili yoohapu dhaJesus dha nyolwa muMateus 10:41, 42? (1 Aak. 17:10-12, 17, 23, 24)

  • Lesha 2 Aakwaniilwa 4:8-37.

    Omukiintu gwokuSunem ote tu longo shike kombinga yokuyakula aayenda? (2 Aak. 4:8; Luk. 6:38; Rom. 12:13; 1 Joh. 3:17)

    Mbela okomikalo dhini tatu vulu okulonga iilonga mbyoka tayi kwathele aapiya yaKalunga nena? (Iil. 20:35; 28:1, 2; Gal. 6:9, 10; Heb. 6:10)