Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 66: Isebel—Omukwaniilwakiintu Omwiinayi

Ehokololo 66: Isebel—Omukwaniilwakiintu Omwiinayi

KONIMA yeso lyOmukwaniilwa Jerobeam, aakwaniilwa ayehe yuukwaniilwa waIsrael womazimo 10 gokuumbangalantu oya kala aawinayi. Omukwaniilwa Ahab oye omukwaniilwa omwiinayi a shiga ko kwaayehe. Owa tseya kutya omolwashike? Etompelo limwe enene olyo omukiintu gwe, Omukwaniilwakiintu omuwiinayi Isebel.

Isebel ke shi Omwiisrael. Ye omwanakadhona gwomukwaniilwa gwaSidon. Ye oha galikana oshikalunga Baal, nota ningitha Ahab nAaisrael oyendji ya galikane wo Baal. Isebel oku tonde Jehova noha dhipagitha oyendji yomaaprofeti ye. Yamwe oye na okuholama momalumbogo opo yaa dhipagwe. Ngele Isebel a hala sha, oha dhipaga omuntu nokuli opo e shi mone.

Esiku limwe Omukwaniilwa Ahab ota ningi omwenyo omwiinayi noonkondo. Ano Isebel ote mu pula: ‘Omolwashike wa ninga omwenyo omwiinayi ngawo nena?’

‘Omolwoshinima shoka Nabot a lombwele ndje,’ Ahab ta yamukula. ‘Ngame onda li nda hala okulanda po oshilonda she shomiviinu. Ihe ye okwa tindi.’

‘Ngoye ku na okunika uuthigwa,’ Isebel ta ti. ‘Ngame otandi ke shi ku monena.’

Isebel ota nyolele aalumentu ya simana yomoshilando ombilive moka omulumentu nguka Nabot a kala. ‘Moneni aakolokoshi yontumba ya tye kutya Nabot okwa tuka Kalunga nomukwaniilwa,’ ye ta ti kuyo. ‘Kutheni mo nduno Nabot moshilando nomu mu dhipage nomamanya.’

Sho Isebel tu uvu kutya Nabot okwa sa, ye ota lombwele Ahab: ‘Inda u ki ikuthile po oshilonda she shomiviinu.’ Ito dhiladhila wo mbela kutya Isebel oku na okugeyelwa molwashoka ye okwa longo oshinima oshitilithi ngawo?

Omukwaniilwa Isebel

Omolwashoka Jehova konima ta tumu omulumentu Jehu oku mu geyela. Sho Isebel tu uvu kutya Jehu ote ya, ye oti igwayeke kombanda yomeho ge nota kambadhala okwiiyopaleka. Ihe uuna Jehu te ya nota monene Isebel mekende, ye oti igidha aalumentu yomuuwa: ‘Mu umbileni pevi!’ Aalumentu otaa vulika kuye, ngaashi to vulu oku shi mona mefano. Yo otaye mu umbile pevi, nota si. Olyo ehulilo lyOmukwaniilwakiintu omuwiinayi Isebel.

1 Aakwaniilwa 16:29-33; 18:1-4; 21:1-16; 2 Aakwaniilwa 9:30-37.



Omapulo

  • Isebel oye lye?
  • Omolwashike Omukwaniilwa Ahab a li a ninga omwenyo omwiinayi esiku limwe?
  • Isebel okwa li a ningi shike opo a monene omusamane gwe Ahab oshilonda shomiviinu shaNabot?
  • Jehova okwa li a tumu lye a ka geyele Isebel?
  • Ngaashi to vulu okumona mefano moka, oshike sha li sha ningwa po sho Jehu a li a thiki kuuwa waIsebel?

Omapulo ga gwedhwa po

  • Lesha 1 Aakwaniilwa 16:29-33 nosho wo 18:3, 4.

    Oonkalo odha li oombwinayi ngiini muIsrael pethimbo lyOmukwaniilwa Ahab? (1 Aak. 16:33)

  • Lesha 1 Aakwaniilwa 21:1-16.

    Nabot okwa li u ulike ngiini uulaadhi nuudhiginini kuJehova? (1 Aak. 21:1-3; Lev. 25:23-28)

    Moshiholelwa shaAhab, oshike tatu vulu okwiilonga kombinga yokusinda okuyemata? (1 Aak. 21:4; Rom. 5:3-5)

  • Lesha 2 Aakwaniilwa 9:30-37.

    Oshike tatu vulu okwiilonga muulaadhi waJehu mokulonga ehalo lyaJehova? (2 Aak. 9:4-10; 2 Kor. 9:1, 2; 2 Tim. 4:2)