Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 65: Uukwaniilwa Tau Topolwa

Ehokololo 65: Uukwaniilwa Tau Topolwa

OWA tseya tuu kutya omolwashike omulumentu nguka ta tuulagula onguwo ye? Jehova oye e mu lombwele e shi ninge. Omulumentu nguka oye omuprofeti gwaKalunga Ahia. Owa tseya ndishi kutya omuprofeti oshike? Oye omuntu ngoka Kalunga ha lombwele shoka tashi ka ningwa komeho.

Ahia naJerobeam

Mpaka Ahia ota popi naJerobeam. Jerobeam omulumentu ngoka a tulwa po kuSalomo okutonatela oshitopolwa shiilonga ye yetungo. Sho Ahia ta tsakaneke Jerobeam mpaka mondjila, Ahia ota longo shoka inaashi monika nale. Ye ota hula mo onguwo ye ompe note yi tuula oontopola 12. Ye ota ti kuJerobeam: ‘Ikuthila po oontopola 10.’ Owa tseya kutya omolwashike Ahia ta pe Jerobeam oontopola 10?

Ahia ota yelitha kutya Jehova uukwaniilwa ote ke wu yuga ko kuSalomo. Ye ota ti kutya Jehova ota ka gandja omazimo 10 kuJerobeam. Otashi ti kutya omazimo gaali ageke taga ka hupa po ngono omwana gwaSalomo Rehabeam ta vulu okupangela.

Sho Salomo tu uvu shoka Ahia a ti kuJerobeam, ye ota geye noonkondo. Ye ota kambadhala okudhipaga Jerobeam. Ihe Jerobeam ota yi ontuku kuEgipiti. Konima yethimbo Salomo okwa si. Ye okwa kala omukwaniilwa uule woomvula 40, ihe ngashingeyi omwana Rehabeam ota ningi omukwaniilwa. MuEgipiti Jerobeam otu uvu kutya Salomo okwa sa, nota galukile ihe kuIsrael.

Rehabeam ke shi omukwaniilwa omwaanawa. Nokuli ye ota ningi oshigwana nayi unene shi vulithe shoka he Salomo e shi ningile. Jerobeam naalumentu yalwe ya simana otaa yi kOmukwaniilwa Rehabeam notaye mu indile a ningile aantu nawa. Ihe Rehabeam ita pulakene. Paushili wo wene, ye nokuli ota ningi omukwanyanya shi vulithe nale. Ano aantu otaa ningi Jerobeam oye omukwaniilwa gwomazimo 10, ihe omazimo gaali Benjamin naJuda otaga ambidhidha Rehabeam oye omukwaniilwa gwawo.

Jerobeam ina hala aalelwa ye ya ye kuJerusalem ya ka galikane motempeli yaJehova. Ano ye ota ningi oontana dhoshingoli mbali nota ningitha aantu yuukwaniilwa womazimo 10 ye dhi galikane. Mbala oshilongo oshu udha iilonga yomuyonena nekuni.

Omu na wo uupyakadhi muukwaniilwa womazimo gaali. Konima yoomvula dhi vulike kuntano sho Rehabeam a ningi omukwaniilwa, omukwaniilwa gwaEgipiti ote ya a kondjithe Jerusalem. Ye ota kutha omaliko ogendji motempeli yaJehova e ta shuna pamwe nago. Ano otempeli oya kala owala uule wokathimbo naanaa ngaashi ya li sho ya tungwa.

Lesha 1 Ondjalulahokololo 28:9; 1 Aakwaniilwa 11:26-43; 12:1-33; 14:21-31.



Omapulo

  • Aalumentu yaali mboka u wete mefano moka oyo oolye, noye lile po shike?
  • Ahia okwa li a ningi shike nonguwo ndjono a li a zala, naashoka otashi ti shike?
  • Salomo okwa li a kambadhala a ningile shike Jerobeam?
  • Omolwashike aantu ya li ya ningi Jerobeam omukwaniilwa gwomazimo omulongo?
  • Omolwashike Jerobeam a li a ningi oontana dhoshingoli mbali, noshike sha li sha ningilwa oshilongo nziya konima yaashono?
  • Oshike sha li sha ningilwa uukwaniilwa womazimo gaali nosho wo otempeli yaJehova muJerusalem?

Omapulo ga gwedhwa po

  • Lesha 1 Aakwaniilwa 11:26-43.

    Jerobeam okwa li omuntu a tya ngiini, noshike Jehova a li e mu uvanekele ngele okwa dhiginine oompango dhaKalunga? (1 Aak. 11:28, 38)

  • Lesha 1 Aakwaniilwa 12:1-33.

    Okutala koshiholelwa oshiwinayi shaRehabeam, oshike aavali naakuluntugongalo taya vulu okwiilonga shi na ko nasha nokulongitha nayi oonkondopangelo? (1 Aak. 12:13; Omuuv. 7:7; 1 Pet. 5:2, 3)

    Okulye aagundjuka nena ye na okukonga ekwatho li shi okwiinekelwa ngele taya ningi omatokolo ga kwata miiti monkalamwenyo? (1 Aak. 12:6, 7; Omayel. 1:8, 9; 2 Tim. 3:16, 17; Heb. 13:7)

    Oshike sha li shi inyengitha Jerobeam opo a dhike po omahala gaali gokugalikanena ontana, noshu ulike ngiini okwaahe na eitaalo okunene okwiitaala Jehova? (1 Aak. 11:37; 12:26-28)

    Olye a li a ningitha aantu yuukwaniilwa womazimo omulongo ya ningile elongelokalunga lyashili oshipotha? (1 Aak. 12:32, 33)