Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 64: Salomo Ta Tungu Otempeli

Ehokololo 64: Salomo Ta Tungu Otempeli

MANGA David inaa sa, ye okwa gandja omusindaulikilo gwetungo lyotempeli yaJehova kuSalomo, ngoka ye a pewa kuKalunga. Momumvo omutine gwelelo lye Salomo ota tameke okutunga otempeli, notashi pula oomvula heyali netata oku yi mana. Aalumentu omayuvi omilongo otaa longo potempeli, netungo otali kotha okandumba kiimaliwa oyindji. Osho molwashono tapu longithwa oshingoli noshisiliveli oshindji molwayo.

Otempeli oyi na omala gaali omanene, ngaashi naa-naa etsalihangano lya li. Ihe omala ngaka omanene ngawo lwiikando iyali ge vulithe ngoka gometsalihangano. Salomo ota tulitha mo oshiketha shehangano meni mo mwene lyela lyotempeli, niinima yimwe mbyoka ya pungulwa meni lyetsalihangano, otayi tulwa mela lilwe.

Sho otempeli tayi pu, otapu ningwa oshituthi oshinene. Salomo ota tsu oongolo komeho gotempeli nota galikana, ngaashi ngoye to vulu okumona mefano. ‘Nokuli egulu alihe itali ku gwanene,’ Salomo ta ti kuJehova, ‘ano otempeli ndjika oyi ku gwanene ngiini? Ihe Kalunga kandje, pulakena alikana koshigwana shoye uuna tashi galikana sha taalela kehala ndika.’

Omukwaniilwa Salomo ta galikana

Sho Salomo ta hulitha egalikano lye, omulilo otagu zi megulu. Otagu fike po omayambo giinamwenyo ngoka ge etwa. Nuuyelele tau adhima wa zi kuJehova tau udha otempeli. Otashi holola kutya Jehova ota pulakene nonokutya otempeli negalikano lyaSalomo okwe yi hokwa. Ngashingeyi otempeli oyo ehala hoka aantu haa yi oku ka galikana pehala lyetsalihangano.

Salomo ota pangele ethimbo ele noondunge, naantu oyu uvite elago. Ihe Salomo ota hokana naakiintu oyendji yokiilongo yilwe mboka ihaaya galikana Jehova. Oto vulu mbela okumona nkene gumwe gwomuyo ta galikana oshikalunga? Lwahugunina aakiintu yaSalomo otaye mu ningitha wo a galikane iikalunga. Owa tseya mbela shoka tashi ningwa po uuna Salomo te shi ningi? Ye ita ningile we aantu nawa. Ye ota ningi omugeentu, naantu kaye uvite we elago.

Omukwaniilwa Salomo ta galikana oshikalunga

Shika otashi geyithitha Salomo kuJehova, ye ota ti kuye: ‘Ngame otandi ke ku yuga uukwaniilwa notandi wu pe omulumentu gulwe. Itandi ke shi ninga pethimbo lyonkalamwenyo yoye, ihe opethimbo lyelelo lyo-mumwoye. Ihe itandi ka kutha po aantu ayehe yuukwaniilwa womumwo-ye.’ Natu tale nkene tashi ningwa.

1 Ondjalulahokololo 28:9-21; 29:1-9; 1 Aakwaniilwa 5:15-32 (5:1-18, OB-1986); 2 Ondjalulahokololo 6:12-42; 7:1-5; 1 Aakwaniilwa 11:9-13.



Omapulo

  • Osha li sha pula uule wethimbo li thike peni opo Salomo a mane okutunga otempeli yaJehova, nomolwashike sha li sha kotha iimaliwa oyindji noonkondo?
  • Otempeli oya li yi na omala gangapi omanene, noshike sha li sha tulwa mela lyomeni?
  • Salomo okwa popi shike megalikano lye sho a li a mana otempeli?
  • Jehova oku ulike ngiini kutya okwa li a hokwa egalikano lyaSalomo?
  • Aakiintu yaSalomo oya li ye mu ningitha shike, noshike sha li sha ningilwa Salomo?
  • Omolwashike Jehova a li a geyele Salomo, noshike Jehova a li e mu lombwele?

Omapulo ga gwedhwa po

  • Lesha 1 Ondjalulahokololo 28:9, 10.

    Mokutala koohapu dhaDavid dha nyolwa mAatokolihapu yotango 28:9, 10, oshike tu na okukambadhala okuninga monkalamwenyo yetu yesiku kehe? (Eps. 19:15 [19:14, OB-1986]; Fil. 4:8, 9)

  • Lesha 2 Ondjalulahokololo 6:12-21, 32-42.

    Salomo okwa li u ulike ngiini kutya Kalunga Omukombandambanda iha kala mehala lya tungwa kaantu? (2 Ondjalul. 6:18; Iil. 17:24, 25)

    Oohapu dhaSalomo tadhi adhika mAatokolihapu aatiyali 6:32, 33 otadhi ulike shike shi na ko nasha naJehova? (Iil. 10:34, 35; Gal. 2:6)

  • Lesha 2 Ondjalulahokololo 7:1-5.

    Ngaashi naanaa oyanamati yaIsrael ya li yi inyengithwa okupandula Jehova sho ya mono eadhimo lye, tse nena otu na okugumwa ngiini ngele tatu tedhatedha nkene Jehova ha laleke nuuyamba oshigwana she? (2 Ondjal. 7:3; Eps. 22:23 [22:22, OB-1986]; 34:2 [34:1, OB-1986]; 96:2)

  • Lesha 1 Aakwaniilwa 11:9-13

    Onkalamwenyo yaSalomo oyu ulike ngiini esimano lyokukala omudhiginini sigo ehulilo? (1 Aak. 11:4, 9; Mat. 10:22; Eh. 2:10)