Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 63: Salomo Omukwaniilwa Omunamayele

Ehokololo 63: Salomo Omukwaniilwa Omunamayele

SALOMO sho a ningi omukwaniilwa ye oku li omugundjuka. Ye oku hole Jehova, noha pulakene kepukululo ewanawa ndyoka he David a li e mu pe. Jehova okwa hokwa Salomo, nuusiku wumwe ano ye ota ti kuye mondjodhi: ‘Salomo, owa hala ndi ku pe shike?’

Kwaashino Salomo ota yamukula: ‘Jehova Kalunga kandje, ngame omugundjuka nokandi shi okupangela. Pe ndje omayele okupangela oshigwana shoye pamukalo omwaanawa.’

Jehova okwa nyanyukwa keindilo lyaSalomo. Ano Ye ota ti: ‘Molwashoka ngoye owa pula omayele, hamwenyo omule nenge uuyamba, otandi ku pe omayele ogendji ge vule gagumwe ngoka inaa kala ko nale. Ihe ngame otandi ku pe wo shoka ngoye inoo shi pula, eliko nesimano.’

Konima yokathimbo aakiintu yaali otaye ya kuSalomo nuupyakadhi uunene. ‘Ngame nomukiintu nguka otwa kala megumbo limwe,’ gumwe gwomuyo ta yelitha. ‘Ngame onda mono okamati nokonima yomasiku gaali naye wo okwa mono okamati. Ihe uusiku wumwe okanona ke oka si. Manga ngame nda kotha, ye okwa langeke okanona hoka ka sa ponto yandje nokwa kutha po kandje. Sho ngame nda penduka e tandi tala kokanona hoka ka sa, ngame onda mono kutya kake shi kandje.’

Opo nduno omukiintu gulwe ota ti: ‘Aawe! Okanona hoka okanamwenyo okandje, naahoka ka sa oke!’ Omukiintu gwotango ota yamukula: ‘Aawe! Okanona hoka ka sa okoye, naahoka okanamwenyo okandje!’ Osho aakiintu yaali taa ludhike. Salomo ota ka ninga po nee shike?

Ota ka talitha egongamwele nota ti nduno: ‘Teta okanona okanamwenyo pokati nou pe omukiintu kehe etata lyako.’

‘Aawe!’ yina gwolela ti igidha. ‘Alikana okanona inamu ka dhipaga. Ke mu peni!’ Ihe omukiintu gulwe ota ti: ‘Kake na okupewa gumwe gwomutse; ka teteni pokati.’

Omukwaniilwa Salomo ta kandula po uupyakadhi wa kwata miiti

Lwahugunina Salomo ota popi: ‘Inamu dhipaga okanona! Ka gandjeni komukiintu gwotango. Oye yina gwolela.’ Salomo oku shi shi, oshoka yina gwolela oku hole okanona unene sho a hala ka gandjwe komukiintu gulwe opo kaaka dhipagwe. Sho oshigwana tashi uvu nkene Salomo a kandula po uupyakadhi mbuka, sho otashi nyanyukwa okukala shi na omukwaniilwa omunamayele ngawo.

Pethimbo lyelelo lyaSalomo Kalunga ota laleke oshigwana nuuyamba mokweetitha evi iilya oyindji, omandjembele noonkwiyu niikulya yilwe. Aantu oya zala oonguwo oombwanawa noye li momagumbo omawanawa. Opu na iinima ya gwanenena iiwanawa kwaayehe.

1 Aakwaniilwa 3:3-28; 5:9-14 (4:29-34, OB-1986).



Omapulo

  • Jehova okwa li a pula Salomo shike, nokwe mu yamukula ngiini?
  • Molwaashoka Jehova okwa li a hokwa shoka shi indilwa kuSalomo, okwa li u uvaneke oku mu pa shike?
  • Uupyakadhi uunene washike aakiintu yaali ya li ye eta kuSalomo?
  • Ngaashi to vulu okumona mefano moka, Salomo okwa li a kandula po ngiini uupyakadhi mboka?
  • Salomo okwa li a lele ngiini, nomolwashike?

Omapulo ga gwedhwa po

  • Lesha 1 Aakwaniilwa 3:3-28.

    Oshike aalumentu mboka haya pewa iinakugwanithwa mehangano lyaJehova nena tayi ilongo moohapu tadhi zi komutima dhaSalomo dhi li mAakwaniilwa yotango 3:7? (Eps. 119:105; Omayel. 3:5, 6)

    Ongiini eindilo lyaSalomo li li oshiholelwa oshiwanawa shoshinima shu uka shoka tu na okugalikana kombinga yasho? (1 Aak. 3:9, 11; Omayel. 30:8, 9; 1 Joh. 5:14)

    Einekelo lini okukandula po oompata kwaSalomo pokati kaakiintu yaali taku tu pe shi na ko nasha nepangelo lyomonakuyiwa lyaSalomo Omunene, Jesus Kristus? (1 Aak. 3:28; Jes. 9:5, 6 [9:6, 7, OB-1986]; 11:2-4)

  • Lesha 1 Aakwaniilwa 5:9-14 (4:29-34, OB-1986).

    Jehova okwa li a yamukula ngiini okwiindila kwaSalomo omwenyo gu na oondunge? (1 Aak. 5:9 [4:29, OB-1986])

    Mokutala koonkambadhala dha li dha ningwa kaantu okupulakena kuunongo waSalomo, iikala yetu oyi na okukala ngiini shi na ko nasha nekonakono lyOohapu dhaKalunga? (1 Aak. 5:9, 14 [4:29, 34, OB-1986]; Joh. 17:3; 2 Tim. 3:16)