Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 61: David Ta Ningi Omukwaniilwa

Ehokololo 61: David Ta Ningi Omukwaniilwa

SAUL ota kambadhala ishewe okukwata David. Ye ota kutha 3 000 yomaakwiita ye aawanawa note ke mu konga. Sho David te shi uvu, ye ota tumu oondaadhi okutala mpoka Saul naalumentu ye yu unga ontanda molwuusiku. Opo nduno David ota pula yaali yomaalumentu ye: ‘Olye gwomune ta ka ya pamwe nangame kontanda yaSaul?’

David ti ithana omukwaniilwa Saul

‘Ongame,’ Abisai ta ti. Abisai omwanamati gwaSeruja, omumwayinakadhona gwaDavid. Manga Saul naalumentu ye ya kotha, David naAbisai otayi iyakele mo montanda. Otaa toola po egonga lyaSaul nombago ye yomeya, ndyoka yi li ontega nomutse gwaSaul. Nando gumwe e ya wete nenge e yu uvite, oshoka ayehe oya kotha ya pwila mo.

Tala ngashingeyi kuDavid naAbisai. Yo oya za mo noye li nombili pombanda yondungu yondundu. David oti ithana elenga lyaakwiita lyaIsrael: ‘Abner, omolwashike itoo gamene omuwa gwoye, omukwaniilwa? Tala! Egonga lye nombago ye yomeya oyi li peni?’

Saul ota penduka. Ye ota dhimbulula ewi lyaDavid nota pula: ‘Ongoye David?’ Mbela ngoye oto vulu okumona Saul naAbner mpeyaka pevi?

‘Eeno, omuwa gwandje omukwaniilwa,’ David ta yamukula. David nota pula: ‘Omolwashike to kambadhala u kwate ndje? Onda longa shike oshiwinayi? Egonga lyoye olyo ndi, omukwaniilwa. Gumwe gwomaalumentu yoye ne li ile.’

Omukwaniilwa Saul naAbner

‘Ngame onda yono,’ Saul ta zimine. ‘Ngame onda longo uugoya.’ Opo tuu mpono David ota yi nondjila ye, Saul nota shuna kegumbo. Ihe David oti ipopile: ‘Limwe lyomomasiku Saul ona ka dhipaga ndje. Ondi na okuya ontuku koshilongo shAafilisti.’ Nosho shoka ye ta ningi. David ota sindana mwaashika okufundjaleka Aafilisti note yi itaalitha kutya ye ngashingeyi oku li kombinga yawo.

Konima yokathimbo Aafilisti otaa yi ya ka kondjithe Israel. Molugodhi Saul naJonatan ayehe yaali otaa dhipagwa. Otashi yematitha David noonkondo, nota nyola eimbilo ewanawa moka ye ti imbi: ‘Ngame ondi uvite uuthigwa omolwoye, omumwameme Jonatan. Alikana ngoye owa li omuholike gwandje ngiini!’

Konima yaashino David ota galukile kuIsrael nota kala moshilando shaHebron. Opu na iita pokati kaalumentu mboka taa hogolola omwanamati gwaSaul Ish-Boshet oye a kale omukwaniilwa naalumentu mboka ya hala David oye a kale omukwaniilwa. Ihe lwahugunina aalumentu yaDavid otaa sindana. David oku na oomvula 30 sho ye ta ningi omukwaniilwa. Ye ota pangele uule woomvula heyali netata muHebron. Yamwe yomaamati mboka ye mu valelwa hoka, oyo Amnon, Absalom naAdonia.

Ethimbo olya thikana opo David naalumentu ye ya ka yuge ko oshilando oshiwanawa shedhina Jerusalem. Joab, omwanamati gulwe gwomu-mwayinakadhona gwaDavid Se-ruja, ota kwatele komeho molu-godhi. Ano David ota futu Joab e mu ninge elenga lyaakwiita ye. Ngashingeyi David ota tameke okupangela moshilando shaJerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Ondjalulahokololo 11:1-9.



Omapulo

  • Oshike David naAbisai ya li ya ningi manga Saul a li a kotha montanda ye?
  • Omapulo geni David a li a pula Saul?
  • David okwa yile peni konima sho a zi puSaul?
  • Oshike sha li sha yemateke unene David, opo a nyole eimbilo ewanawa?
  • David okwa li e na oomvula ngapi sho a ningi omukwaniilwa muHebron, noyamwe yomoyanamati oya li oolye?
  • Hugunina David okwa li a pangele peni e li omukwaniilwa?

Omapulo ga gwedhwa po

  • Lesha 1 Samuel 26:1-25.

    Oohapu dhaDavid dha nyolwa muSamuel gwotango 26:11 otadhi holola iikala yini kombinga yelandulathano lyopauteokratika? (Eps. 37:7; Rom. 13:2)

    Ngele tatu kambadhala twa mana mo okuulika uuwanawahenda, ihe oonkambadhala dhetu itadhi pandulwa, ongiini oohapu dhomuSamuel gwotango 26:23 tadhi tu kwathele tu kale tu na etaloko lyu uka? (1 Aak. 8:32; Eps. 18:21 [18:20, OB-1986])

  • Lesha 2 Samuel 1:26.

    Ongiini Aakriste nena taya vulu okukala ye na ‘ohole yokuholathana ya kola’ ya faathana naandjoka David naJonatan ya li ye ninathane? (1 Pet. 4:8; Kol. 3:14; 1 Joh. 4:12)

  • Lesha 2 Samuel 5:1-10.

    Oomvula ngapi David a li a kala omukwaniilwa, nongiini ethimbo ndyono lya topolwa? (2 Sam. 5:4, 5)

    Omolwashike taku vulu okutiwa kutya David okwa li omuntu a simana, nongiini shika shi li edhimbulukitho kutse nena? (2 Sam. 5:10; 1 Sam. 16:13; 1 Kor. 1:31; Fil. 4:13