Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 60: Abigail naDavid

Ehokololo 60: Abigail naDavid

OWA tseya kutya omukiintu ngoka omwaanawa te ya kuDavid oye lye? Edhina lye oAbigail. Ye omunandunge, nota keelele opo David kaa ninge iinima iiwinayi. Ihe natu tale tango shoka sha ningilwa David pokati mpono.

Konima sho David a yi Saul ontuku, ye ota holama molumbogo. Aamwayina noshihupe shuukwanezimo we otaye ya wo ya kale moka. Otapu ya konyala aalumentu 400 ayehe kumwe, David nota ningi omuwiliki gwawo. David ota yi nduno komukwaniilwa gwaMoab nota ti: ‘Alikana tate nameme naya kale pungoye sigo ngame tandi mono shoka tandi ningilwa.’ Konima David naalumentu ye otaya tameke okuholama miikulundundu.

Konima yaashika David ota tsakaneke Abigail. Omulumentu gwe Nabal omunahambo omuyamba. Ye oku na oonzi 3 000 niikombo 1 000. Nabal oye omukwanyanya. Ihe omukiintu gwe Abigail omwaanawa noonkondo. Ye oku shi wo okulonga shoka shu uka. Nokuli oshikando shimwe ye ota hupitha uukwanegumbo we. Natu tale kutya ongiini.

David naalumentu ye oya ningile nawa Nabal. Yo oye mu kwathele okugamena oonzi dhe. Esiku limwe David ota tumu yamwe yomaalumentu ye okupula esilohenda kuNabal. Aalumentu yaDavid otaye ya kuNabal omanga ye naakwathi ye taa kulula ko omafufu goonzi. Olyo esiku lyoshituthi, Nabal noku na iinima oyindji iitoye yokuliwa. Ano aalumentu yaDavid otaa ti: ‘Tse otwe ku ningile nawa. Tse inatu yaka po oonzi dhoye, ihe otwe ku kwathele oku dhi tonatela. Alikana tu pa ngashingeyi iikulya.’

‘Ngame itandi gandja iikulya yandje kaalumentu ngaashi ne,’ Nabal ta ti. Ye ota longitha elaka ewinayi notu ula David iinima iiwinayi. Sho aalumentu taa galukile kuDavid notaye mu hokololele kombinga yaashono, David ota geyelele. ‘Ihomatekeni omagongamwele geni!’ ye ta lombwele aalumentu ye. Notaa yi ya ka dhipage Nabal naalumentu ye.

Gumwe gwomaalumentu yaNabal ngoka u uvu iitya yuuwinayi mbyoka Nabal a popi, ota hokololele Abigail shoka sha ningwa po. Abigail ota longekidha mbala iikulya. Ote yi londeke kokasino nota yi. Sho ye ta tsakaneke David, ye ota londoloka ko kokasino ke, ota tsu oongolo nota ti: ‘Alikana tatekulu, ino piyaganekwa komulumentu gwandje Nabal. Ye egoya noha ningi iinima yuugoya. Omagano ogo ngaka. Alikana ga taamba, nou tu dhimine po kwaashono sha ningwa po.’

Abigail te etele David iikulya

‘Ngoye omukiintu omunandunge,’ David ta yamukula. ‘Ngoye owa keelele ndje ndaa dhipage Nabal ndi mu shunithile uuwinayi we. Inda ngashingeyi kegumbo nombili.’ Konima, sho Nabal a si, Abigail ota ningi gumwe gwomaakiintu yaDavid.

1 Samuel 22:1-4; 25:1-43.



Omapulo

  • Omukiintu ngoka te ya okutsakaneka David mefano moka oye lye, nokwa li omuntu a tya ngiini?
  • Nabal oye lye?
  • Omolwashike David a li a tumu yamwe yomaalumentu ye ya ka pule Nabal e mu sile ohenda?
  • Nabal okwa li a lombwele shike aalumentu yaDavid, nongiini David a li i inyenge?
  • Abigail okwa li u ulike ngiini kutya ye omukiintu omunandunge?

Omapulo ga gwedhwa po

  • Lesha 1 Samuel 22:1-4.

    Ongiini uukwanegumbo waDavid wa li wa tula po oshiholelwa oshiwanawa shankene tu na okuyambidhidhathana muumwayinathana wopaKriste? (Omayel. 17:17; 1 Tes. 5:14)

  • Lesha 1 Samuel 25:1-43.

    Omolwashike Nabal a li a hokololwa nondhino onene? (1 Sam. 25:2-5, 10, 14, 21, 25)

    Aakiintu Aakriste otaya vulu okwiilonga shike nena moshiholelwa shaAbigail? (1 Sam. 25:32, 33; Omayel. 31:26; Ef. 5:24)

    Abigail okwa li i indike David a ninge iinima iyali iiwinayi yini? (1 Sam. 25:31, 33; Rom. 12:19; Ef. 4:26)

    Ongiini einyengo lyaDavid koohapu dhaAbigail tali kwathele nena aalumentu ya kale ya tala ko aakiintu ngaashi Jehova he ya tala ko? (Iil. 21:8, 9; Rom. 2:11; 1 Pet. 3:7)

Tseya oshindji

NATU HOLELENI EITAALO LYAWO

Abigajil okwa katuka pandunge

Otatu ilongo shike kuupyakadhi mboka wa holoka mondjokana yaAbigajil?