Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 58: David naGoliat

Ehokololo 58: David naGoliat

AAFILISTI otaye ya ishewe okukondjitha Israel. Ngashingeyi aamwayinamati yaDavid aakuluntu yatatu oye li metanga lyaakwiita lyaSaul. Ano esiku limwe Isai ota ti kuDavid: ‘Fala iishunga niikwiila kaamwanyoko. Tala nkene ye li po.’

Goliat

Sho David ta thiki pontanda yetanga lyaakwiita, ye ota matukile kelondo oku ka konga aamwayina. Ofule Omufilisti Goliat ota piti mo okusheka Aaisrael. Ye ote shi ningi ngashingeyi uule womasiku 40 ongula nongulohi kehe. Ye oti igidha: ‘Hogololeni omulumentu gumwe gwomaalumentu yeni e ye a kondjithe ndje. Ngele ye ota sindi ndje nota dhipaga ndje, tse otatu ka kala aapika yeni. Ihe ngele ngame otandi mu sindi notandi mu dhipaga, ne otamu ka kala aapika yetu. Ngame otandi mu shongo mu hogolole gumwe e ye a kondjithe ndje.’

David ota pula gumwe gwomaakwiita: ‘Omulumentu ngoka ta ka dhipaga Omufilisti nguka nota kutha po ohoni ndjika yaIsrael ota ka pewa shike?’

‘Saul ota ka yambapaleka omulumentu ngoka noonkondo,’ omukwiita ta ti. ‘Nota ka gandja omwanakadhona a ninge omukiintu gwe.’

Ihe Aaisrael ayehe oya tila Goliat molwashoka ye omunene ngawo. Ye oku na konyala uule woometa 3 noha humbatitha omukwiita gulwe ehuyanza lye.

Yalwe yomaakwiita otaa yi ya ka lombwele Omukwaniilwa Saul kutya David okwa hala a kondje naGoliat. Ihe Saul ota ti kuDavid: ‘Ngoye ito vulu okukondjitha Omufilisti nguka. Ngoye omumati owala, ye okwa kala nale uule wonkalamwenyo ye ayihe omukwiita.’ David ota yamukula: ‘Ngame onda dhipaga emwanka nonkoshi mbyoka ya ndjindjile po oonzi dhatate. Osho naanaa tashi ka ningilwa Omufilisti nguka ngaashi yimwe yomuyo ye shi ningilwa. Jehova ota ka kwatha ndje.’ Saul ota ti: ‘Inda, Jehova na kale pamwe nangoye.’

David ota yi kokalonga nota toola uumanya utano uuthenu note wu tula mompunda ye. Opo nduno ota kutha oshidhaadhigitho she note ende ta ka tsakaneka ofule. Sho Goliat te mu mono, ita vulu oku shi zimina. Ye ota dhiladhila kutya otashi ka kala oshipu lela okudhipaga David.

David ta dhaadhiga emanya

‘Ila kungame,’ Goliat ta ti, ‘ngame ndi vule okugandja olutu lwoye koondhila nokiilikama yi ku lye po.’ Ihe David ota ti: ‘Ngoye oto ya kungame negongamwele nonegonga neshigombanza, ihe ngame otandi ya kungoye medhina lyaJehova. Nena Jehova ote ke ku gandja miikaha yandje notandi ke ku lefula.’

Opo tuu mpono David ota matuka u uka kuGoliat. Ota kutha emanya mompunda ye, te li tula moshidhaadhigitho she note li dhaadhiga noonkondo dhe adhihe. Emanya otali yi lyu ukilila momutse gwaGoliat, nota gu a sa! Sho Aafilisti ye wete kutya ofule yawo oya sa, yo ayehe otaya piluka notaa fadhuka po. Aaisrael otaye ya landula notaa sindana molugodhi.

1 Samuel 17:1-54.



Omapulo

  • Eshongo lini Goliat a li a shongo nalyo etanga lyAaisrael?
  • Goliat okwa li e na uule u thike peni, nondjambi yini omukwaniilwa Saul a li u uvanekele omulumentu ngoka ta dhipaga Goliat?
  • David okwa li a ti shike sho Saul e mu lombwele kutya ita vulu okukondjitha Goliat molwaashoka oye okamatyona kowala?
  • Mokuyamukula kwe Goliat, ongiini David a li u ulike kutya okwi inekela Jehova?
  • Ngaashi to vulu okumona mefano moka, oshike David a li a longitha okudhipaga Goliat, noshike sha li sha ningilwa Aafilisti konima yaashono?

Omapulo ga gwedhwa po

  • Lesha 1 Samuel 17:1-54.

    Oshike sha li oshiholekwa shokwaahe na uumbanda kwaDavid, nongiini tatu vulu okuholela uulaadhi we? (1 Sam. 17:37, 45; Ef. 6:10, 11)

    Omolwashike Aakriste ye na okuyanda ombepo yethigathano ya fa ndjoka yaGoliat ngele taya kutha ombinga momaudhano nenge momainyanyudho? (1 Sam. 17:8; Gal. 5:26; 1 Tim. 4:8)

    Oohapu dhaDavid odha li dhu ulike ngiini kutya okwi inekela mokukwathelwa kuKalunga? (1 Sam. 17:45-47; 2 Ondjal. 20:15)

    Pehala lyokuhokolola owala ethigathano pokati komatanga gaali ngoka taga kondjithathana, ehokololo ndika otali ulike ngiini kutya olugodhi olwa li lela pokati kiikalunga naKalunga kashili, Jehova? (1 Samuel 17:43, 46, 47)

    Oshihupe shomugwayekwa otashi landula ngiini oshiholelwa shaDavid shokwiinekela Jehova? (1 Sam. 17:37; Jer. 1:17-19; Eh. 12:17)