Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 54: Omulumentu Omunankondonkondo

Ehokololo 54: Omulumentu Omunankondonkondo

OWA tseya edhina lyomulumentu omunankondonkondo ngoka inaa kala ko nale? Oye omutokolihapu gwedhina Simson. Simson oonkondo dhe ohadhi zi kuJehova. Nokuli manga Simson inaa valwa, Jehova ota ti kuyina: ‘Meni lyokathimbo ngoye oto ka mona omumati. Ota ka kala omukwatelikomeho mokuhupitha Israel kAafilisti.’

Simson ta kondjo nonime

Aafilisti oyo aantu aawinayi mboka ya kala muKanaan. Yo oye na aakwiita oyendji mboka taa ningi nayi lela Aaisrael. Sho oshikando shimwe Simson e li mondjila okuya koshitopolwa shAafilisti, onime tayi kumbu otayi mu tsakaneke. Ihe Simson onime ote yi dhipaga niikaha ye yowala. Ye ota dhipaga wo Aafilisti aawinayi omathele.

Konima Simson ota kwatwa kohole okuhola omukiintu gwedhina Delila. Aapangeli Aafilisti otayu uvaneke okupa Delila iimaliwa 1 100 kehe gumwe ngele te ya hokololele shoka sha ningitha Simson oonkondo ngaaka. Delila okwa hala iimaliwa ayihe mbyoka. Ye ke shi kuume kashili kaSimson nenge koshigwana shaKalunga. Ano ye ota pula Simson a tsitsimika shoka she mu ningitha oonkondo ngaaka.

Delila naSimson

Lwahugunina Delila ota thiminike Simson e mu hokololele oshiholekwa shoonkondo dhe. ‘Omafufu gandje inaga tetwa nando natango,’ ye ta ti. ‘Okuza kevalo lyandje Kalunga okwa hogolola ndje ndi kale gumwe gwomaapiya ye yi ikalekelwa yedhina Aanasiri. Ngele omafufu gandje oga tetwa ko, ngame otandi ka kanitha oonkondo dhandje.’

Ihe sho Delila te shi uvu, ota kotheke Simson komatundji ge. Opo nduno oti ithana omulumentu e ye a tete ko omafufu ge. Sho Simson ta penduka, ye okwa kanitha oonkondo dhe. Aafilisti otaye ya mo notaye mu fala kondholongo. Yo otaa tsipula mo omeho ge notaye mu ningi omupika gwawo.

Simson ta teya po oongudhi

Esiku limwe Aafilisti otaa ningi oshituthi oshinene okusimaneka kalunga kawo Dagon, notaye eta mo Simson mondholongo oku mu ninga oshiyolitha shawo. Pokati mpono omafufu gaSimson oga koko ishewe. Simson ota lombwele omumati ngoka e mu kwata koshikaha: ‘Etha ndje ndi pampadhale oongudhi ndhoka dha kwatela po etungo.’ Opo nduno Simson ota galikana kuJehova e mu pe oonkondo, nota kwata oongudhi a dhiginina. Ye oti igidha: ‘Etha ndje ndi sile pamwe nAafilisti.’ Omu na Aafilisti 3 000 moshituthi, nopo nduno Simson ota petama notu undula oongudhi noonkondo dhe adhihe, etungo otali mbonyokele mumwe naantu ayehe mboka aawinayi otaa si.

Aatokolihapu ontopolwa 13 sigo 16.



Omapulo

  • Omulumentu omunankondonkondo ngoka a li ko oye lye, nolye a li e mu pe oonkondo?
  • Simson okwa li a ningile shike onime onene polumwe, ngaashi to vulu oku shi mona mefano moka?
  • Oshiholekwa shini Simson ta lombwele Delila mefano moka, nongiini shoka she mu falitha mokukwatwa po kAafilisti?
  • Simson okwa li a dhipaga ngiini aatondi Aafilisti ye li 3 000 mesiku ndyoka a sa?

Omapulo ga gwedhwa po

  • Lesha Aatokolihapu 13:1-14.

    Manoah nomukiintu gwe oya tulile po ngiini aavali oshiholelwa oshiwanawa mokuputudha aanona yawo? (Aatok. 13:8; Eps. 127:3; Ef. 6:4)

  • Lesha Aatokolihapu 14:5-9 nosho wo 15:9-16.

    Mbela ehokololo lyokudhipaga kwaSimson onime, lyokutokola kwe oongodhi oompe ndhoka dha li dhe mu manga nolyokulongitha kwe oluyego lwokasino okalumentu okudhipaga aantu 1 000 otali ulike ngiini okulonga kwombepo ondjapuki yaJehova?

    Ombepo ondjapuki ohayi tu kwathele ngiini nena? (Aatok. 14:6; 15:14; Sak. 4:6; Iil. 4:31)

  • Lesha Aatokolihapu 16:18-31.

    Simson okwa li a nwethwa mo ngiini komaendathano omawinayi, noshike tatu vulu okwiilonga mwaashika? (Aatok. 16:18, 19; 1 Kor. 15:33)