Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 45: Etaaguluko lyOmulonga gwaJordan

Ehokololo 45: Etaaguluko lyOmulonga gwaJordan

TALA! Aaisrael otaa taaguluka Omulonga gwaJordan! Ihe omeya oge li peni? Oominute dhimwe dha tetekele omulonga ogwa li gu udha noonkondo, molwashoka omvula oyindji ohayi loko pethimbo ndyono lyomumvo kehe. Ihe ngashingeyi omeya agehe othilu! NAaisrael otaa taaguluka pevi ekukutu ngaashi naanaa kEfuta Etiligane! Omeya agehe oga yi peni? Natu tale.

Aaisraeli taya taaguluka omulonga gwaJordan

Sho ethimbo lyAaisrael lya thikana okutaaguluka Omulonga gwaJordan, Jehova ota lombwelithitha oshigwana kuJosua tashi landula: ‘Aasaaseri ye na okukutha oshiketha shehangano noye ende ye li komeho getu. Uuna oompadhi dhawo tadhi lyata momeya gOmulonga gwaJordan, omeya otaga ka mwena okukunguluka.’

Ano aasaaseri otaa tumbu po oshiketha shehangano notaye shi humbata komeho gaantu. Sho taye ya puJordan, aasaaseri otaye ende naanaa momeya. Otage endelele noonkondo nomale. Ihe sho ngaa oompadhi dhawo tadhi lyata momeya, omeya otaga tameke taga mwena okukunguluka! Osho oshikumithalonga! Jehova okwa pwinike omeya ngoka kombanda. Ano mbala inamu hupa omeya momulonga!

Aasaaseri mboka ya humbata oshiketha shehangano, otaye ende naanaa sigo opokati komulonga gwa kukuta. Oto vulu mbela oku ya mona mefano? Manga yo ya thikama mpeya, Aaisrael ayehe otaye ende pevi ekukutu taa taaguluka Omulonga gwaJordan!

Sho ayehe ya piti, Jehova ota lombwelithitha Josua aalumentu aanankondo 12 ta ti: ‘Indeni momulonga mpoka aasaaseri ya thikama noshiketha shehangano. Tooleni omamanya 12 ga ndumbileni mpoka ne tamu ka lala nena. Uuna nduno aanona yeni taye mu pula monakuyiwa shoka omamanya ngaka taga ti, omu na okutya kutya omeya oga mwenene okukunguluka sho oshiketha shehangano shaJehova sha taagulukithwa Jordan. Omamanya otage ke mu dhimbulukitha oshikumithalonga shika!’ Josua ota ndumbile wo omamanya 12 mpoka aasaaseri ya li ya thikama mokati komulonga.

Josua

Lwahugunina Josua ota ti kaasaaseri mboka ya humbata oshiketha shehangano: ‘Londeni mu ze mo muJordan.’ Sho taye shi ningi, omulonga otagu tameke ishewe okukunguluka.

Josua 3:1-17; 4:1-18.



Omapulo

  • Oshikumithalonga shini Jehova a li a longo opo Aaisrael ya vule okutaaguluka Omulonga gwaJordan?
  • Iilonga tayi ulike eitaalo yini Aaisrael ya li ye na okulonga opo ya taaguluke Omulonga gwaJordan?
  • Omolwashike Jehova a li a lombwele Josua a gongele omamanya omanene ge li 12 mokati komulonga?
  • Oshike sha li sha ningwa po nziya sho aasaaseri taya londo taya zi muJordan?

Omapulo ga gwedhwa po

  • Lesha Josua 3:1-17.

    Ngaashi shu ulikwa kehokololo ndika, oshike twa pumbwa okuninga opo tu mone ekwatho lyaJehova nokulalekwa nuuyamba kuye? (Jos. 3:13, 15; Omayel. 3:5; Jak. 2:22, 26)

    Onkalo yOmulonga gwaJordan oya li ngiini sho Aaisrael ya li taye gu taaguluka okuya mEvi lyeuvaneko, nongiini shoka sha li sha simanekitha edhina lyaJehova? (Jos. 3:15; 4:18; Eps. 66:5-7)

  • Lesha Josua 4:1-18.

    Omamanya 12 ngoka ga li ga kuthwa kuJordan noga tulwa muGilgal oga li ge na elalakano lyashike? (Jos. 4:4-7)