Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 44: Rahab Ta Holeke Oondaadhi

Ehokololo 44: Rahab Ta Holeke Oondaadhi

AALUMENTU mbano oye li muudhigu. Yo oye na okufadhuka po, ngele hasho otaa ka dhipagwa. Oyo oondaadhi Aaisrael, nomukiintu ngoka te ya kwatha oye Rahab. Rahab okwa kala megumbo li li menkolokuma lyoshilando Jeriko. Natu taleni kutya omolwashike aalumentu mbano ye li muudhigu.

Aaisrael oyi ilongekidha okutaaguluka Omulonga gwaJordan okuya moshilongo shaKanaan. Ihe tango Josua ota tumu mo oondaadhi mbali. Ye ota ti kuyo: ‘Indeni mu ka ndaadhe oshilongo noshilando shaJeriko.’

Rahab noondaadhi mbali

Sho oondaadhi tadhi ya muJeriko, otadhi yi megumbo lyaRahab. Ihe gumwe ota ti komukwaniilwa gwaJeriko: ‘Aaisrael yaali oye ya nena uusiku muka ya ndaadhe oshilongo.’ Omukwaniilwa sho te shi uvu, ye ota tumu aalumentu kuRahab notaye mu lombwele: ‘Eta mo aalumentu mboka ye li megumbo lyoye!’ Ihe Rahab oondaadhi okwe dhi holeka kontala yongulu ye. Ano ota ti: ‘Eeno, aalumentu oyi ile mpaka pegumbo lyandje, ihe kandi shi wo mpoka yo taa zi. Yo oya yi sho taku luudha, manga eyelo lyoshilando inaali patwa. Ngele otamu ningilile, otamu vulu oku ya kwata!’ Ano aalumentu oye ya landulilile po.

Konima Rahab ota yi mbalambala kontala yongulu. ‘Ngame ondi shi shi kutya Jehova oshilongo shika ote ke shi mu pa,’ ye ta ti koondaadhi. ‘Tse otu uvu nkene ye a kukutitha Efuta Etiligane sho mwa thigi po Egipiti, nonkene mwa dhipaga aakwaniilwa Sihon naOg. Ngame onda kala nane nombili, ano alikana uvanekelii ndje kutya otamu ka kala nangame nombili. Hupitheni tate nameme, naamwameme aalumentu naakadhona.’

Oondaadhi otadhi shi uvaneke, ihe Rahab oku na okuninga po sha. ‘Taamba ongodhi ndjika ontiligane yi dhitika pekende lyongulu yoye,’ oondaadhi tadhi ti, ‘nou ete iilyo yuukwanezimo woye ayihe megumbo lyoye. Nuuna tatu galuka okuyuga ko Jeriko, otatu ka mona ongodhi ndjika pekende lyoye nahagumwe ta ka dhipagwa megumbo lyoye.’ Sho oondaadhi tadhi galukile kuJosua, otadhi mu hokololele ashihe shoka sha ningwa po.

Josua 2:1-24; Aaheberi 11:31.



Omapulo

  • Rahab okwa li ha kala peni?
  • Aalumentu yaali mboka ye li mefano moka oyo oolye, nomolwashike ye li muJeriko?
  • Omukwaniilwa gwaJeriko okwa li a tumu aalumentu ya lombwele Rahab a ninge shike, na Rahab okwa li e mu yamukula ngiini?
  • Rahab okwa li a kwathele ngiini aalumentu mboka yaali, nokwa li e ya pula ye mu ningile shike?
  • Euvaneko lini oondaadhi mbali dha li dhu uvanekele Rahab?

Omapulo ga gwedhwa po

  • Lesha Josua 2:1-24.

    Euvaneko lyaJehova lya nyolwa muEksodus 23:27 olya li lya gwanithwa ngiini sho Aaisrael ya ponokele Jeriko? (Jos. 2:9-11)

  • Lesha Aaheberi 11:31.

    Oshiholelwa shaRahab oshu ulike ngiini nkene eitaalo lya simana? (Rom. 1:17; Heb. 10:39; Jak. 2:25)