Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 40: Moses Ta Dhenge Emanya

Ehokololo 40: Moses Ta Dhenge Emanya

OOMVULA otadhi piti po—oomvula 10, oomvula 20, oomvula 30, oomvula 39! NAaisrael onkene ngaa ye li natango mombuga. Ihe oomvula adhihe ndhino Jehova ota sile oshigwana she oshimpwiyu. Ye ote shi palutha nomanna. Omutenya ote shi kwatele komeho noluzigi lwoshikogo, nuusiku onoluzigi lwomulilo. Nopethimbo lyoomvula adhihe ndhino oonguwo dhawo itadhi kulupa noompadhi dhawo itadhi ehama.

Ngashingeyi ogwo omwedhi gwotango gwomumvo omuti-40 sho ya thigi po Egipiti. Aaisrael otayu ungu ishewe ontanda puKades. Opo tuu mpoka ya li sho oondaadhi 12 dha tumwa oku ka ndaadha oshilongo shaKanaan konyala oomvula 40 dha piti. Omumwayina gwaMoses Miriam okwa sile puKades. Mpaka opu na ishewe uupyakadhi ngaashi nale.

Aantu itaa vulu okumona omeya. Ano otaa nyenyetele Moses: ‘Ando otwa sile osha li hwepo. Omolwashike we tu kuthile muEgipiti we tu eta kehala ndino enyanyalithi ihaali mene sha? Kamu na iilya, kamu na oonkwiyu, kamu na omandjembele, kamu na oondunga dhomigranati. Kamu na nokuli omeya gokunwa.’

Moses ta dhenge emanya

Sho Moses naAaron taa yi ketsalihangano oku ka galikana, Jehova ota ti kuMoses: ‘Ithana oshigwana shi gongale. Popya nduno montaneho yasho nemanya ndyoka. Otamu ka za omeya ga gwana oshigwana niinamwenyo yasho ayihe.’

Ano Moses oti ithana oshigwana shi gongale nota ti: ‘Pulakeneni, ne mboka inaamu inekela muKalunga! Ngame naAaron natu mu zithile omeya memanya ndika?’ Opo nduno Moses ota dhenge emanya lwiikando iyali nondhimbo nekunguluko enene lyomeya olya kunguluka okuza memanya. Opu na omeya ga gwana okunuwa kaantu ayehe niimuna.

Ihe Jehova ota geyele Moses naAaron. Owa tseya kutya omolwashike? Osho molwashoka Moses naAaron oya ti kutya yo otaa ka zitha omeya memanya. Ihe osha li lelalela oJehova ngoka e shi ningi. Nomolwashono Moses naAaron inaya hokolola oshili moshinima shino, Jehova ota ti kutya ye ote ke ya geyela. ‘Ne itamu ka fala oshigwana shandje muKanaan,’ ye ta ti.

Mbala Aaisrael otaa thigi po Kades. Konima yokathimbo otaye ya pOndundu yaHor. Aaron okwa sile pombanda yondundu ndjika. Ye okwa li e na oomvula 123 pethimbo lyokusa kwe. Aaisrael oya nika oluhodhi noonkondo, noshigwana otashi lili Aaron omasiku 30. Omwanamati Eleasar ota ningi omusaaseri omukuluntu a landula ko gwo-shigwana shaIsrael.

Numeri 20:1-13, 22-29; Deuteronomium 29:4 (29:5, OB-1986).



Omapulo

  • Jehova okwa li a sile ngiini Aaisrael oshimpwiyu manga ya li mombuga?
  • Aaisrael oya li ya nyenyeta shike sho ya li tayu ungu ontanda puKades?
  • Jehova okwa li a pe ngiini oshigwana niinamwenyo omeya?
  • Omulumentu ngoka ti iyulike mefano moka oye lye, nomolwashike te shi ningi?
  • Omolwashike Jehova a li a geyela Moses naAaron, nongiini a li e ya geyele?
  • Oshike sha li sha ningwa pOndundu yaHor, nolye a li a ningi omusaaseri omukuluntu gwaIsrael?

Omapulo ga gwedhwa po

  • Lesha Numeri 20:1-13, 22-29 nosho wo Deuteronomium 29:4 (29:5, OB-1986).

    Oshike tatu ilongo momukalo moka Jehova a li a sile nago oshimpwiyu Aaisrael mombuga? (Deut. 29:4 [29:5, OB-1986]; Mat. 6:31; Heb. 13:5; Jak. 1:17)

    Jehova okwa li e shi tala ko ngiini sho Moses naAaron inaaye mu simaneka koshipala shAaisrael? (Num. 20:12; 1 Kor. 10:12; Eh. 4:11)

    Oshike tatu vulu okwiilonga momukalo moka Moses a li i inyenge kepukululo ndyoka a li a mono okuza kuJehova? (Num. 12:3; 20:12, 27, 28; Deut. 32:4; Heb. 12:7-11)