Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 37: Etsali lyEgalikaneno

Ehokololo 37: Etsali lyEgalikaneno

OWA tseya kutya etungo ndino olyashike? Olyo etsali lyi ikalekelwa lyokugalikanena Jehova. Ohali ithanwa wo etsalihangano. Aa-ntu oya mana oku li tunga muule womvula yimwe konima sho ya thigi po Egipiti. Owa tseya mbela kutya osha li edhiladhilo lyalye oku li tunga?

Etsali

Osha li edhiladhilo lyaJehova. Manga Moses a li kOndundu yaSinai, Jehova okwe mu lombwele nkene e na oku li tunga. Ye okwa ti kutya yo oye na oku li ninga ngaaka tali vulu okuza kumwe nuupu. Opo nduno iitopolwa tayi vulu okuhumbatwa okufalwa kehala lilwe, naahono otayi shunwa kumwe natango. Ano uuna Aaisrael taa tembuka okuza kehala limwe nokuya kehala lilwe mombuga, yo oya yi pamwe netsali ndyoka.

Ngele ngoye to tala meni lyokala okashona konima metsali, oto vulu okumona oshiketha. Ohashi ithanwa oshiketha shehangano. Osha li shi na aayengeli yaali nenge aakerubi ya ningwa moshingoli, kehe kondungu gumwe. Kalunga okwa nyola ishewe Iipango Omulongo komayambi gomamanya gaali, oshoka gotango Moses okwe ga tatula. Nomamanya ngaka oga pungulwa meni moshiketha shehangano. Omu na wo oshitenga shomanna sha pungulwa meni lyayo. Oto dhimbulukwa mbela kutya omanna oshike?

Jehova ota hogolola Aaron omumwayina gwaMoses a kale omusaaseri omukuluntu. Oye ta kwatele oshigwana komeho megalikano lyasho kuJehova. Noyanamati oyo wo aasaaseri.

Ngashingeyi tala kela enene lyetsali. Enene lwiikando iyali li vule okala okashona. Ou wete oshiketha oshishona, mono tamu tsinagana olwithi? Osho oaltari moka aasaaseri haa fikile sha shi na ezimba ewanawa hashi ithanwa etsinino. Opu na wo oshihukikwanyeka shi na oolamba heyali. Noshinima oshititatu mela osho oshitaafula. Kusho ohaku pungulwa omihi 12 dhoomboloto.

Molugumbo lwetsalihangano omu na etemba enene lyu udha omeya. Aasaaseri ohaye li longitha okwiiyogela mo. Omu na wo oaltari onene. Muka iinamwenyo ya sa omo hayi fikilwa oyo eyambo lyaJehova. Etsali oli li naanaa pokati kontanda, nAaisrael oya kala momatsali gawo ge li dhingoloka.

Eksodus 25:8-40; 26:1-37; 27:1-8; 28:1; 30:1-10, 17-21; 34:1, 2; Aaheberi 9:1-5.



Omapulo

  • Etungo ndyoka tali tungwa mefano moka ohali ithanwa ngiini, nohali longithwa shike?
  • Omolwashike Jehova a li a lombwele Moses a ninge etsali ndyoka hali vulu okukuthwa kumwe nuupu?
  • Oshiketha shoka shi li mokala okashona kehulilo lyetsali oshashike, nomoshiketha omu na shike?
  • Jehova okwa li a hogolola lye oye a kale omusaaseri omukuluntu, noshike omusaaseri omukuluntu a li ha ningi?
  • Tumbula iinima itatu mbyoka yi li mela enene lyetsali.
  • Iinima iyali yini yi li molugumbo lwetsalihangano, noya li hayi longithwa shike?

Omapulo ga gwedhwa po

  • Lesha Eksodus 25:8-40; 26:1-37; 27:1-8; nosho wo 28:1.

    Aakerubi mboka ye li “kompungulilo yompango” oya li ye lile po shike? (Eks. 25:20, 22; Num. 7:89; 2 Aak. 19:15)

  • Lesha Eksodus 30:1-10, 17-21; 34:1, 2; nosho wo Aaheberi 9:1-5.

    Omolwashike Jehova a li a tsu omuthindo esimano lyokudhiginina uuyogoki wopalutu waasaaseri mboka ya li taya longo metsalihangano, noshi na oku tu guma ngiini nena? (Eks. 30:18-21, OB-1986; 40:30, 31, OB-1986; Heb. 10:22)

    Omuyapostoli Paulus oku ulike ngiini kutya etsalihangano nehangano lyOmpango kaya li tayi longo we pethimbo a nyolele Aakriste Aaheberi ontumwafo ye? (Heb. 9:1, 9; 10:1)