Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 35: Jehova Ta Gandja Oompango Dhe

Ehokololo 35: Jehova Ta Gandja Oompango Dhe

KONYALA oomwedhi mbali ko-nima sho yo ya thigi po Egipiti, Aaisrael oye ya pOndundu yaSinai, ndjoka yi ithanwa wo Horeb. Ndika olyo tuu ehala mpoka Jehova a popile naMoses moshihwa sha hwama. Oshigwana oshu ungu ontanda nosha kala mpaka okathimbo.

Manga oshigwana sha tegelela pevi, Moses ota londo kondundu. Pombanda kondungu yondundu Jehova ota lombwele Moses kutya Ye okwa hala Aaisrael ya vulike kuYe noya ninge oshigwana She shi ikalekelwa. Sho Moses te ya pevi, ota hokololele Aaisrael shoka Jehova a ti. Naantu otaa ti kutya yo otaa ka vulika kuJehova, oshoka yo oya hala okukala oshigwana she.

Ngashingeyi Jehova ota longo oshinima inaashi monika nale. Ye ota tsinitha ondungu yondundu olwithi, nota ndundumitha endundumo edhigu. Ye ota popi wo noshigwana: ‘Ongame Jehova Kalunga keni ngoka e mu tembudha muEgipiti.’ Opo nduno ye ote ya lombwele: ‘Kamu na okugalikana ookalunga yalwe kakele kangame.’

omayambi gomamanya gaali

Kalunga ota gandja natango iipango nenge oompango omugoyi kAaisrael. Aantu oya tila noonkondo. Yo otaa ti kuMoses: ‘Ongoye u popya natse, oshoka tse otwa tila ngele Kalunga okwa popi natse tse otatu ka sa.’

Konima Jehova ota lombwele Moses: ‘Londa kondundu u ye kungame. Ngame otandi ke ku pa omayambi gomamanya gaali moka nda nyola oompango ndhoka nda hala oshigwana shi dhi dhiginine.’ Ano Moses ota londo ishewe kondundu. Ota kala hoka omitenya nomausiku 40.

Kalunga oku nine oshigwana she oompango odhindjidhindji. Moses ota nyola oompango ndhika. Kalunga ota gandja wo omayambi gomamanya gaali kuMoses. Kwaangaka, Kalunga okwa nyola ko ye mwene oompango 10 ndhoka ye a popi koshigwana ashihe. Ohadhi ithanwa Iipango Omulongo.

Moses kOndundu yaSinai

Iipango Omulongo oyo oompango dha simana. Ihe osho wo shi li oompango adhihe dhilwe ndhoka Kalunga a gandja kAaisrael. Shimwe shomoompango ndhino osho: ‘U na okuhola Jehova Kalunga koye nomutima gwoye aguhe, nomadhiladhilo goye agehe, nomwenyo gwoye aguhe nonoonkondo dhoye adhihe.’ Nashilwe osho: ‘U na okuhola omukweni ngaashi wi ihole mwene.’ Omwana gwaKalunga, Jesus Kristus, okwa ti kutya mbika oyo iipango iyali iinenenene mbyoka Jehova a gandja koshigwana she Israel. Konima tse otatu ki ilonga iinima oyindji kombinga yOmwana gwaKalunga nomalongo ge.

Eksodus 19:1-25; 20:1-21; 24:12-18; 31:18; Deuteronomium 6:4-6; Levitikus 19:18; Mateus 22:36-40.



Omapulo

  • Oomwedhi mbali lwaampono konima yokuza muEgipiti, openi Aaisrael ya li yu ungu oontanda?
  • Jehova okwa li a popi shike osho a hala oshigwana she shi ninge, nosha li sha yamukula ngiini?
  • Omolwashike Jehova a li a pe Moses omayambi gomamanya gaali?
  • Kakele kIipango Omulongo, oompango dhilwe dhini Jehova a li a pe Aaisrael?
  • Iipango iyali yini Jesus Kristus a li a ti kutya oyo iinenenene?

Omapulo ga gwedhwa po

  • Lesha Eksodus 19:1-25; 20:1-21; 24:12-18; nosho wo 31:18.

    Ongiini oohapu dha nyolwa muEksodus 19:8 tadhi tu kwathele tu uve ko shoka sha kwatelwa mokukala Omukriste i igandja? (Mat. 16:24; 1 Pet. 4:1-3)

  • Lesha Deuteronomium 6:4-6; Levitikus 19:18; nosho wo Mateus 22:36-40.

    Aakriste ohayu ulike ngiini ohole yawo yokuhola Kalunga naantu ooyakwawo? (Mark. 6:34; Iil. 4:20; Rom. 15:2)