Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 34: Oludhi Olupe lwIikulya

Ehokololo 34: Oludhi Olupe lwIikulya

OTO vulu mbela okuhokolola kutya aantu otaa toola shike pevi? Otashi monika sha fa omume. Osho oshitokele, noshishuushuu nuudhulumutu. Ihe kashi shi omume; osho sha shokuliwa.

Aaisrael taya gongele omanna

Konyala omwedhi owala gwa piti po okuza sho Aaisrael ya thigi po Egipiti. Yo oye li mombuga. Muka ohamu mene iikulya iishona, nomolwashono aantu taa nyenyeta taa ti: ‘Tse otwa halele Jehova e tu dhipage muEgipiti. Hoka tse otwa li tu na iikulya oyindjiyindji sha pitilila.’

Ano Jehova ota ti: ‘Ngame otandi ka lokitha iikulya okuza megulu.’ Naashika osho Jehova ta ningi. Ongula ya landula, sho Aaisrael ya mono iinima mbika iitokele mbyoka ya gu, yo otaa pulathana: ‘Oshike shika?’

Moses ota ti: ‘Shika osho iikulya mbyoka Jehova e mu pe okulya.’ Aantu otaye yi luku OMANNA. Oyi na omulyo gwa fa gwoshikuki shomagadhi goonyushi sha pepuka.

‘Omu na okutoola ye eleka kehe gumwe ngaashi to vulu okulya,’ Moses osho ta lombwele oshigwana. Ano shika osho yo haa ningi ongula kehe. Sho etango tali pupyala, omanna ngoka ga hupu po pevi otaga hengumuka.

Moses ota ti ishewe: ‘Hagumwe ta pungulile esiku tali landula omanna.’ Ihe yamwe yomaantu itaya pulakene. Owa tseya kutya oshike tashi ningwa po? Ongula ya landula omanna ngoka yo ya pungula oga li gu udha omazinyo, notaga tameke okunika!

Ihe opu na esiku limwe koshiwike, moka oshigwana hashi toola omanna ogendji lwaali, palombwelo lyaJehova. Olyo esiku etihamano. Jehova nota ti kutya yo oye na okwiipungulila gamwe gomugo sigo esiku tali landula, oshoka ye ita ka gwitha sha mesiku etiheyali. Sho yo taa pungula omanna sigo esiku etiheyali, itaga ningi omazinyo noitaga nika! Shika oshikumithalonga natango!

Oomvula adhihe ndhoka Aaisrael ye li mombuga, Jehova ote ya palutha nomanna.

Eksodus 16:1-36; Numeri 11:7-9; Josua 5:10-12.



Omapulo

  • Aantu otaya toola shike pevi mefano moka, nohashi ithanwa shike?
  • Moses okwa li a lombwele shike oshigwana shi na ko nasha nokutoola omanna?
  • Jehova okwa li a lombwele oshigwana shi ninge shike mesiku etihamano, nomolwashike?
  • Oshikumithalonga shini Jehova a li ha longo ngele omanna ga pungulwa sigo omesiku etiheyali?
  • Uule wethimbo li thike peni Jehova a li a palutha aantu nomanna?

Omapulo ga gwedhwa po

  • Lesha Eksodus 16:1-36 nosho wo Numeri 11:7-9.

    Eksodus 16:8 otu ulike shike shi na ko nasha nompumbwe yetu yokusimaneka iilonga yopauteokratika megongalo lyopaKriste? (Heb. 13:17)

    Aaisrael oya li ya dhimbulukithwa ngiini esiku kehe mombuga kutya oya li ya pumbwa Jehova? (Eks. 16:14-16, 35; Deut. 8:2, 3)

    Eityo lyopathaneko lini Jesus a gandja li na ko nasha nomanna, nongiini tatu mono uuwanawa ‘moshikwiila shomegulu’ shoka? (Joh. 6:31-35, 40)

  • Lesha Josua 5:10-12.

    Aaisrael oya li ya li omanna uule woomvula dhi thike peni, ongiini shika sha li emakelo kuyo, noshike tatu vulu okwiilonga mehokololo ndyoka? (Eks. 16:35; Num. 11:4-6, OB-1986; 1 Kor. 10:10, 11)