Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Oshihwa Sha Hwama: Oshihwa Sha Hwama

Oshihwa Sha Hwama: Oshihwa Sha Hwama

MOSES okwe ya okuza kokule sigo okondundu ndjino Horeb okukonga omwiidhi gwoonzi dhe. Mpaka okwa mono oshihwa sha hwama, ihe kasha li tashi pi po!

Moses e li poshihwa sha hwama

‘Shika inashi monika nale shi,’ Moses osho a dhiladhila. ‘Otandi hedha popepi ndi shi tale nawa.’ Sho e shi ningi, ewi olya zi moshihwa, tali ti: ‘Ino hedha popepi. Hula ko oongaku dhoye, oshoka owa thikama pevi eyapuki.’ Osha li oKalunga ta popi okupitila momuyengeli, ano Moses okwa siikile oshipala she.

Opo nduno Kalunga okwa ti: ‘Onda mono okuhepekwa kwoshigwana shandje muEgipiti. Ano otandi ke shi mangulula, nongoye gumwe ngoka tandi tumu okuwilika oshigwana shandje okuza muEgipiti.’ Jehova okwa li te ke eta oshigwana she moshilongo oshiwanawa shaKanaan.

Ihe Moses okwa ti: ‘Ongame olye? Ongiini ngame tandi vulu okulonga shika? Ihe nandi tye otandi yi. Aaisrael otaya ka tya kungame: “Olye e ku tumu?” Otandi ka tya nduno ngiini?’

‘Shika osho u na okutya,’ Kalunga a yamukula. ‘“JEHOVA Kalunga kaAbraham, Kalunga kaIsaak naKalunga kaJakob oye a tumu ndje kune.”’ Jehova nokwa gwedha ko: ‘Ndika olyo edhina lyandje sigo aluhe.’

‘Ihe natu tye itayi itaale ndje uuna tandi ti ongoye wa tumu ndje,’ Moses a yamukula.

‘Oshike shi li moshikaha shoye?’ Kalunga a pula.

Moses okwa yamukula: ‘Ondhimbo.’

‘Yi dhaadhiga pevi,’ Kalunga a ti. Naashono Moses e shi ningi, ondhimbo oya ningi eyoka. Opo nduno Jehova oku ulukile Moses oshikumithalonga shimwe. Ye okwa ti: ‘Homeka oshikaha shoye monguwo yoye.’ Moses okwe shi ningi, naashono a kutha mo oshikaha she, osha li sha toka to! Oshikaha osha li sha fa shi niwe kuuvu uuwinayi wuulepera. Konima Jehova okwa pe Moses oonkondo okulonga oshikumithalonga oshititatu. Lwahugunina okwa ti: ‘Uuna to ka longa iikumithalonga mbika, Aaisrael otaye ki itaala kutya ongame nde ku tumu.’

Konima yaashika Moses okwa yi kegumbo nokwa ti kuJetro: ‘Alikana pitika ndje ndi shune kaakwetu kuEgipiti ndi ka tale nkene ye li po.’ Ano Jetro okwa laleke Moses, Moses nokwa tameke olweendo lwe okushuna kuEgipiti.

Eksodus 3:1-22; 4:1-20.



Omapulo

  • Edhina lyondundu ndjoka yi li mefano moka olini?
  • Hokolola oshinima inaashi monika nando onale shoka Moses a li a mono sho a yi kondundu noonzi dhe.
  • Ewi okuza moshihwa sha hwama olya li lya popi shike, newi olya li lyalye?
  • Moses okwa li a yamukula ngiini sho Kalunga a li e mu lombwele kutya okwa li ta ka kwatela oshigwana shaKalunga komeho okuza muEgipiti?
  • Kalunga okwa li a lombwele Moses a popye shike ngele oshigwana tashi mu pula ngoka a li e mu tumu?
  • Moses okwa li te ku ulika ngiini kutya Kalunga oye e mu tumu?

Omapulo ga gwedhwa po

  • Lesha Eksodus 3:1-22.

    Oshimoniwa shaMoses otashi tu pe ngiini einekelo kutya nokuli ngele tu wete inaatu gwana okulonga oshilonga shopauteokratika, Jehova ote ke tu kwathela? (Eks. 3:11, 13; 2 Kor. 3:5, 6)

  • Lesha Eksodus 4:1-20.

    Elunduluko lini lya li lya ningwa miikala yaMoses pethimbo lyoomvula 40 ndhoka a kala muMidian, noshiilongomwa shini shoka mboka taya lalakanene okumona omauthembahenda megongalo taya vulu okwiilonga mwaashika? (Eks. 2:11, 12; 4:10, 13; Mika 6:8; 1 Tim. 3:1, 6, 10)

    Nokuli nongele tatu geelwa kuJehova okupitila mehangano lye, einekelo lini oshiholelwa shaMoses tashi vulu oku tu pa? (Eks. 4:12-14; Eps. 103:14; Heb. 12:4-11)